ATS DAI APUESTUI (14)

Letôr: Lorenzo Mitri

Predicazion a Iconi. A scuegnin scjampâ

141Ancje a Iconi a jentrarin dai gjudeus e a fevelarin tant pulît che une vore di gjudeus e di grêcs si viergerin a la fede. 2Ma chei gjudeus che no vevin crodût, a stiçarin i paians e ju invelegnarin cuintri dai fradis. 3A restarin però alì par un pieçut e a fevelavin fidantsi tal Signôr, ch’al tignive sù la peraule de sô gracie fasint spiei e meracui midiant des lôr mans. 4La int de citât si dividè, butantsi ce de bande dai gjudeus ce de bande dai apuestui. 5Ma cuant che i paians e i gjudeus dutune cui lôr sorestants, a tentarin di pacâju e di clapadâju, 6lôr si inacuargerin e a lerin a parâsi tes citâts de Licaonie, a Listre e a Derbe, e dulintor. 7E ventilà a scomençarin a contâ la buine gnove.

Il paralitic di Listre

8A Listre al jere un om paralizât tes gjambis, nassût strupiât, che nol veve mai rivât a cjaminâ. 9Al scoltave il discors di Pauli e chel, cjalantlu fis e viodint ch’al veve fede di jessi vuarît, 10i disè a fuart: “Jeve e sta sù ben dret sui pîts!”. Chel altri al petà sù e si metè a cjaminâ. 11Alore la int, viodint ce che Pauli al veve fat, e tacà a vosâ par licaonês: “I dius a son vignûts framieç di nô sot forme di umign!”. 12E i diserin a Barnabe Zeus e a Pauli Ermis, ch’al veve plui batule.

13Intant il predi di Zeus, ch’al jere il templi biel jentrant te citât, al menave su lis puartis bûs inflochetâts, par fâ un sacrifici insieme cu la int. 14Vignûts a savêlu, i apuestui Barnabe e Pauli si sbregarin i vistîts e si butarin framieç de int berlant: 15“Po ce cumbinaiso, amîs? Ancje nô o sin oms, mortâi compagn di vualtris, e us predicjìn di bandonâ chestis matetâts par butâsi cul Diu vivent, ch’al à fat il cîl e la tiere, il mâr e dut ce ch’al è dentri. 16Lui, par vieri, al à lassât che ogni popul al les pe sô strade, 17ancje se us à simpri lassât un segnâl dal so boncûr mandantjus dal cîl lis plois e lis buinis stagjons, furnintjus de bocjade e colmant di ligrie i vuestris cûrs”. 18E cussì a rivarin par un pêl a inibîi a la int di fâur un sacrifici.

19A rivarin però di Antiochie e di Iconi un trop di gjudeus, ch’a voltarin la int de lôr bande. A tacarin a claponâ Pauli e lu strissinarin fûr de citât, crodint ch’al fos muart. 20Alore si derin dongje i siei dissepui e lui, jevât sù, al jentrà in citât. Tal indoman al partì cun Barnabe par Derbe.

Conclusion dal viaç missionari

21Dopo di vê predicjât il vanzeli in dì di sabide e di vê fat un biel trop di dissepui, a tornarin a Listre, a Iconi e a Antiochie, 22dant spirt ai dissepui e racomandantjur di stâ salts te fede parcè che, a disevin, si à di passâ par un grum di tribulazions prin di jentrâ tal ream di Diu. 23Ur meterin par ogni glesie un trop di anzians e, dopo di vê preât e zunât, ju racomandarin a di chel Signôr che i vevin crodût. 24Scjavaçant la Pisidie, a rivarin te Panfilie 25e, dopo di vê predicjât la peraule di Diu a Pergje, a dismontarin a Atalie. 26Di li si imbarcjarin par Antiochie, d’indulà ch’a jerin partîts racomandâts a la gracie dal Signôr pe vore ch’a vevin juste finide.

27A pene rivâts, a derin dongje la glesie e ur contarin dut ce che Diu al veve fat midiant di lôr e cemût che ur veve spalancade ai paians la puarte de fede. 28E si fermarin un biel pieç insieme cui dissepui.