ATS DAI APUESTUI (6)

Letôr: Rita Brollo

I dodis e i siet

61In chei dîs, biel che il numar dai dissepui al cresseve, al nassè un rusin dai eleniscj cuintri dai ebreus, par vie ch’a vignivin metudis di bande lis lôr veduis te spartizion di ogni dì. 2Alore i dodis a clamarin la semblee dai dissepui e ur diserin: “No va che nô o trascurìn la peraule di Diu par stâ a dâ fûr robe. 3Pluitost, fradis, cjataitsi fûr fra di vualtris siet oms di buine reputazion, plens di Spirtu Sant e di sintiment, e ur darìn cheste incariche. 4Noaltris invezit o restarìn salts te preiere e tal predicjâ la peraule”. 5La propueste i plasè a dute la semblee e a sielgerin Stiefin, om plen di fede e di Spirtu Sant, Filip, Procor, Nicanor, Timon, Parmen e Nicolau, proselit di Antiochie. 6Ur ai presentarin ai apuestui e lôr, dopo di vê preât, ur meterin lis mans sul cjâf.

7E la peraule dal Signôr si slargjave simpri plui; il numar dai dissepui al cresseve un stragjo a Gjerusalem e ancje un biel trop di predis si jerin sotoponûts a la fede.

Lis acusis cuintri di Stiefin

8Stiefin, incolm di gracie e di virtût, al faseve meracui e spiei di chei grancj framieç dal popul. 9Alore un trop de sinagoghe, che ur disevin dai “sfrancjâts”, int di Cirene, di Alessandrie e altris de Cilicie e de Asie si meterin di mieç e a scomençarin a contindi cun Stiefin. 10Ma no rivarin adore di tignîi teste a la sapience e al Spirt che lu faseve fevelâ. 11Alore a saborarin un trop di lôr ch’a diserin: “Lu vin sintût ch’al blestemave cuintri di Mosè e cuintri di Diu”. 12E cussì a scjaldarin la int, i anzians e i scrituriscj; podopo, a colp, lu gafarin e lu menarin denant dal sinedri. 13A presentarin testemonis fals ch’a diserin: “Chel li nol mole di fevelâ cuintri di chest lûc sant e cuintri de leç. 14Lu vin sintût nô ch’al diseve che Gjesù il nazaren al sdrumarà chest lûc e al mudarà lis leçs che nus à dât Mosè”.

15Ducj chei dal sinedri a vevin i vôi su di lui, e la sô muse ur semeà precise chê di un agnul.