ZUAN (17)

Letôr: Pre Daniele Alimonda

4. LA PREIERE DI GJESÙ

La preiere di Gjesù e la sô glorificazion

171Cussì al fevelà Gjesù. Po al alçà i vôi viers dal cîl e al disè: “Pari, e je rivade l’ore. Glorifiche to fi par che il fi ti glorifichi te. 2Midiant che tu i âs dât podê su dut ce ch’al è cjar, che ur dedi la vite eterne a ducj chei che tu i âs dâts. 3E je cheste la vite eterne: che ti cognossin te, l’unic vêr Diu, e chel che tu âs mandât, Gjesù Crist. 4Jo ti ài glorificât su la tiere, puartant al colm l’opare che tu mi vevis dade di fâ. 5E cumò tu, Pari, glorifichimi me denant di te cun chê glorie ch’o vevi denant di te ancjemò prin ch’al fos fat il mont.

6Jo ur ài fat cognossi il to non ai oms che tu mi âs dât dal mont. A jerin tiei e tu tu mai âs dâts a mi e lôr a àn metude in pratiche la tô peraule. 7Cumò a son vignûts a savê che dut ce che tu mi âs dât al ven di te, 8parcè che lis peraulis che tu mi âs dadis, jo ur es ài dadis a lôr e lôr lis àn acetadis e a àn ricognossût che o soi vignût fûr propit di te e a àn crodût che tu mi âs mandât tu.

La preiere pai dissepui

9Jo ti prei par lôr; no prei pal mont, ma par chei che tu mi âs dât, parcè che a son tiei. 10E dut ce ch’al è gno al è to e ce ch’al è to al è gno, e jo o soi stât glorificât in lôr. 11E jo no soi plui tal mont, ma lôr a son tal mont, intant che jo o ven di te. Pari sant, tenju cont tal to bonvolê chei che tu mi âs dât, par ch’a sedin un come nô.

12Cuant che o jeri cun lôr, jo o tignivi cont tal to non chei che tu mi âs dât e o ài viodût di lôr e nissun di lôr no si è pierdût, fûr dal fi de perdizion, par che si colmàs la Scriture. 13Cumò jo o ven di te e chestis robis ur es dîs biel ch’o soi tal mont, par ch’a vedin in lôr la mê gjonde in dute la sô plenece. 14Jo ur ài dade la tô peraule e il mont ju à odeâts, parcè che no son dal mont, come che nancje jo no soi dal mont.

15No ti domandi che tu ju tiris vie dal mont, ma che tu ju tegnis vuardâts dal trist. 16Lôr no son dal mont, come che nancje jo no soi dal mont. 17Fasiju sants te veretât. La tô peraule e je veretât. 18Come che tu tu mi âs mandât me tal mont, cussì ancje jo ju ài mandâts lôr tal mont. 19E par lôr jo mi fâs sant me par che ancje lôr a sedin fats sants te veretât.

La preiere pe glesie

20No prei dome par chei chi, ma ancje par chei ch’a crodaran in me in gracie de lôr peraule; 21che ducj a sedin un, come tu, Pari, in me e jo in te, par ch’a sedin ancje lôr in nô, di mût che il mont al cognossi che tu mi âs mandât tu.

22E jo ur ài dade a lôr la glorie che tu mi vevis dade a mi, par ch’a sedin un come che ancje nô o sin un: 23jo in lôr e tu in me, par ch’a sedin rifinîts te unitât, e il mont al ricognossi che tu tu mi âs mandât me e che tu ur âs volût ben come che tu mi âs volût ben a mi. 24Pari, chei che tu mi âs dât a mi, o vuei che là ch’o soi jo a sedin ancje lôr dutun cun me, par ch’a contemplin la mê glorie che tu mi âs dade, parcè che tu mi âs volût ben ancjemò prime de creazion dal mont.

25Pari just, se il mont no ti à cognossût, jo invezit ti ài cognossût e chei chi a àn ricognossût che tu mi âs mandât tu. 26E jo ur ài fat cognossi il to non e o continuarai a fâural cognossi, par che il bonvolê che tu âs vût par me al sedi in lôr e jo in lôr”.