MATIEU (18)

Letôr: Thomas Lavia

Il plui grant tal ream dai cîi

Mc 9,33-36; Lc 9,46-47

181In chê volte si svicinarin a Gjesù i siei dissepui par dîi: “Cui isal alore il plui grant tal ream dai cîi?”. 2E lui, clamât dongje un frut, lu metè framieç di lôr e ur disè: 3“Us al dîs in veretât: se no si convertissarês e no deventarês come i fruts, no jentrarês tal ream dai cîi. 4Partant chel che si fasarà piçul come chest frut, chel al sarà il plui grant tal ream dai cîi. 5Se un al acete ancje un sôl frut come chel chi tal gno non, mi acete me.

Il scandul dai piçui

6Ma se un i darà scandul a un di chescj pitinins ch’a crodin in me, al è miei par lui che i pein tor dal cuel une muele di chês ch’al tire il mus e ch’al sedi sgurlât tal font dal mâr. 7Puar mai il mont par colpe dai scandui! Di fat, se no puedin no capitâ i scandui, puar mai chel om che midiant di lui al capite il scandul.

8Se la tô man o il pît ti è di scandul, cjoncilu e butilu vie. Al è miei par te jentrâ te vite mucul o çuet che no jessi butât tal fûc eterni cun dôs mans o doi pîts. 9E se il to voli ti è di scandul, gjavilu; al è miei par te jentrâ te vite cuntun voli sôl che jessi butât cun doi vôi te Gheene dal fûc.

10Vuardaitsi dal dispreseâ un sôl di chescj pitinins, parcè che us dîs che i lôr agnui tai cîi a contemplin di un continui la muse dal Pari gno ch’al è tai cîi. (11Di fat il Fi dal om al è vignût a puartâ a salvament ce ch’al jere pierdût).

La piore pierdude

Lc 15,3-7

12Ce us parial? Se un om al à cent pioris e une di lôr si piert, no lassial lis novantenûf su pes monts e no vadial a cirî chê pierdude? 13E se i capite di cjatâle, us al dîs in veretât: al fasarà fieste par jê plui che par chês altris novantenûf che no si jerin pierdudis. 14Propit cheste e je la volontât dal Pari vuestri ch’al è tai cîi: che nancje un di chescj pitinins nol ledi pierdût.

La corezion fra fradis

Lc 17,3

15Se to fradi al pecje cuintri di te, va, coregilu dome fra te e lui; se ti scoltarà, tu varâs vuadagnât to fradi. 16Se invezit nol ves di scoltâti, cjol cun te une o dôs personis par che su la peraule di doi o trê testemonis si sclarissi ogni robe. 17Se nol ves di scoltâju nancje lôr, consegnilu al judizi de Glesie e, se nol ves di scoltâ nancje la Glesie, ch’al sedi par te come il paian o il publican. 18Us al dîs in veretât: dut ce che o varês peât su la tiere al restarà peât ancje in cîl; e dut ce che o varês dispeât su la tiere al restarà dispeât ancje tal cîl.

La prejere fate insieme

Zn 15,7.16

19Ancjemò: us al dîs in veretât che, se doi di lôr su la tiere a saran d’acuardi tal domandâ une robe, ur sarà dade dal Pari gno ch’al è tai cîi. 20Di fat là ch’a son dâts dongje doi o trê tal gno non, li o soi ancje jo, framieç di lôr”.

Perdonâ simpri

Lc 17,4; Lc 23,34

21Alore Pieri si fasè indenant e i domandà: “Signôr, se gno fradi al pecjarà cuintri di me, tropis voltis varaio di perdonâi? Fint a siet voltis?”. 22Gjesù i dîs: “No ti dîs fint a siet voltis, ma fint a setante voltis siet.

23Par chel il ream dai cîi si pò metilu a pâr di un re ch’al volè fâ i conts cui siei servidôrs. 24Tacant duncje a domandâ i conts, i presentarin un ch’al veve un debit di dismil talents. 25Midiant che nol rivave a paiâ, il paron al comandà ch’al fos vendût lui, la femine, i fîs e dut ce ch’al veve e ch’al paias il debit. 26Alore chel servidôr, cu la muse par tiere, lu sconzurave disint: Signôr, ve remission di me e ti paiarai dut. 27Il paron al vè remission di chel servidôr, lu lassà lâ e i parà jù dut il debit. 28Ma, a pene saltât fûr, chel servidôr li s’intivà intun dai siei compagns ch’al veve di tornâi cent denârs. Lu brincà che dibot lu scjafoiave e i disè: Tornimi dut ce che tu âs di dâmi. 29Chel altri, butât in genoglon, lu preave disint: Ve remission di me e ti paiarai. 30Ma lui nol volè savênt; al lè a fâlu butâ in preson fin che nol veve finît di paiâ dut il debit.

31Sintût il câs, chei altris servidôrs a restarin une vore malapaiâts e a lerin a contâi dut al lôr paron. 32Alore il paron lu clamà denant di sè e i disè: Servidôr trist, ti ài parât jù dut il debit parcè che tu mi vevis preât; 33no vevistu mo ancje tu di vê remission dal to compagn, come che jo o ài vude remission di te? 34Alore il paron, disdegnât a muart, lu consegnà ai gjendarmis fin che nol ves tornât dut ce ch’al veve di dâi. 35Propit cussì il Pari gno celest us tratarà vualtris se ognidun no i pararà jù di cûr a so fradi