GJENESI (11)

Letôr: Bons. Duilio Corgnali

La torate di Babêl

111Dut il mont al fevelave la stesse lenghe e al doprave lis stessis peraulis. 2Cuant che i oms si plaçarin a soreli jevât, a rivarin tune concje de tiere di Senaar e si fermarin li. 3Si diserin un cul altri: “Dai! Metìnsi a fâ modons e a cueiju tal fûc”. A dopravin il modon impen dal clap e il catram impen de malte. 4A diserin: “Parcè no fasìno une citât e une torate ch’e rivi cu la spice fint in cîl? Fasìnsi un non e no stin a dividisi ator pal mont!”. 5Il Signôr al vignì jù a dâi une cjalade a la citât e a la torate che i oms a stavin butant sù. 6Dissal il Signôr: “Veju, che a son un popul sôl e a fevelin ducj la stesse lenghe! Chest al è dome il cjaveç di ce che a àn voe di fâ. Se a van indenant cussì, a rivaran a fâ dut ce che a volaran. 7Anin! Dismontìn jù e confusionìnju tal lôr lengaç, par che no rivin a capîsi un cul altri”. 8E di li il Signôr ju sparniçà par dut il mont e no lerin plui indevant cu la lôr citât. 9Cussì i meterin non Babêl, parcè che al è stât alì che il Signôr al à confusionât il lengaç di ducj i oms e di li si son sparniçâts par dut il mont.

La dissendence benedide di Sem

10Cheste e je la gjernazie di Sem. A cent agns, Sem al à vût Arpacsad, doi agns dopo dal diluvi. 11Dopo nassût Arpacsad, Sem al à vivût cinccent agns e al à vût altris fîs e fiis.

12A trentecinc agns, Arpacsad al à vût Selac. 13Dopo nassût Selac, Arpacsad al à vivût cuatricent e trê agns e al à vût altris fîs e fiis.

14A trent’agns, Selac al à vût Eber. 15Dopo nassût Eber, Selac al à vivût cuatricent e trê agns e al à vût altris fîs e fiis.

16A trentecuatri agns, Eber al à vût Peleg. 17Dopo nassût Peleg, Eber al à vivût cuatricent e trent’agns e al à vût altris fîs e fiis.

18A trent’agns, Peleg al à vût Reu. 19Dopo nassût Reu, Peleg al à vivût dusinte e nûf agns e al à vût altris fîs e fiis.

20A trentedoi agns, Reu al à vût Serug. 21Dopo nassût Serug, Reu al à vivût dusinte e siet agns e al à vût altris fîs e fiis.

22A trent’agns, Serug al à vût Nacor. 23Dopo nassût Nacor, Serug al à vivût dusinte agns e al à vût altris fîs e fiis.

24A vincjenûf agns, Nacor al à vût Terac. 25Dopo nassût Terac, Nacor al à vivût cent e disenûf agns e al à vût altris fîs e fiis.

26A setant’agns, Terac al à vût Abram, Nacor e Aran.

LIS TRADIZIONS DE STORIE DAI PATRIARCJiS

L’ALEANCE DI ABRAM

Dissendence di Terac

27Cheste e je la gjernazie di Terac: Terac al à vût Abram, Nacor e Aran. Aran al à vût Lot. 28Aran al murì che al jere ancjemò vîf so pari Terac, tal paîs che al jere nassût, a Ur dai caldeus. 29Abram e Nacor si sposarin: la femine di Abram e veve non Sarai, la femine di Nacor e veve non Milche, fie di Aran, che al jere il pari di Milche e di Ische. 30Ma Sarai e jere sterpe e no podeve vê fruts.

31Terac al cjolè so fi Abram, so nevôt Lot, fi di Aran, e sô brût Sarai, femine di Abram. Ju fasè jessî di Ur dai caldeus par lâ te tiere di Canaan. Rivâts però a Caran si fermarin li.

32Terac al à vivût, in dut, dusinte e cinc agns, po al murì a Caran.