ZACARIE (10;11:1-3)

Letôr: Mickaela Toso

Dome Diu al pò salvânus

101Domandait al Signôr la ploe,

te stagjon dal ultin slavin.

Al è il Signôr ch’al inmanie i folcs,

al mande la ploe a selis,

i dà il pan al om

e la jerbe ai nemâi.

2Parcè che i terafim a àn ditis bausiis,

i induvinins a àn viodudis fantasimis,

a contin sium fals,

ur dan un confuart cence tignince;

par chel a van torseonant tant che un trop,

a son disperâts, parcè che no àn pastôr.

Israel al torne plen di glorie

3Cuintri dai pastôrs s’infoghe la mê rabie,

cuintri dai rocs o volti il voli.

Propit! Il Signôr al larà a cjatâ il so trop,

al fasarà di lui il cjaval de sô parade.

4Di lui al saltarà fûr il cjantonâl e il pichet,

di lui l’arc di vuere.

5A saran ducj compats, come valorôs

ch’a folpein il paltan des placis;

a combataran, parcè che il Signôr al è cun lôr,

a saran svergognâts chei ch’a montin a cjaval.

6O rinfuarçarai la cjase di Gjude,

i darai salvece a la cjase di Josef;

ju fasarai tornâ a jevâ sù, parcè che ur vuei ben,

a saran come se no ju ves mai butâts di bande.

Propit! Jo o soi il Signôr, il lôr Diu

e ju scoltarai.

7Efraim al sarà tant che un valorôs,

il lôr cûr s’indalegrarà come cul vin;

i lôr fîs a viodaran e s’indalegraran,

il lôr cûr al gjoldarà intal Signôr.

8O darai une sivilade par tirâju dongje,

ant sarà tancj che mai, come prime.

9Ju ài sparniçâts framieç dai forescj,

ma di lontan si visaran di me;

i lôr fîs a cressaran e a tornaran.

10Ju tirarai dongje de tiere dal Egjit

e ju regonarai di Assur;

ju fasarai tornâ te tiere di Galaad,

ma no ’nt varan avonde.

11A traviersaran il mâr dal Egjit,

lis aghis fondis dal flum si suiaran.

La braure di Assur e sarà sdrumade

e il baston dal comant dal Egjit al sarà tirât vie.

12La lôr fuarce e sarà intal Signôr,

e a varan glorie tal so non

– sentence dal Signôr –.

Desolazion

111Spalanche, Liban, lis tôs puartis

e il fûc ch’al gloti i tiei cedris!

2Gem, ciprès, parcè che al è colât il cedri,

parcè che i arbulons a son par tiere.

Gemêt, rôi di Basan,

parcè che al è taiât chel bosc

che no si rivave a lâ dentri.

3Si sint il lament dai pastôrs,

parcè che la lôr braure e je fiscade;

si sint la rugnade dai leons,

parcè che il sflandôr dal Gjordan al è abàs!