AGJEO (1;2)

Letôr: Lorenzo Marcolini

Tornait a fâ sù il templi!

11Tal secont an dal re Dario, tal sest mês, la prime dì dal mês, la peraule dal Signôr i je stade dite a Zorobabel, fi di Sealtiel, governadôr di Gjude, e a Gjosuè, fi di Jozedak, prin predi, midiant dal profete Agjeu.

2Il Signôr des schiriis al dîs cussì: Chest popul al dîs: “Nol è ancjemò rivât il moment di tornâ a fâ sù la cjase dal Signôr!”. 3Alore la peraule dal Signôr e je stade dite midiant dal profete Agjeu: 4“Isal mo par vualtris il moment di stâ pacjifics in cjasis riviestudis di len cuant che cheste cjase e je dute fiscade? 5Il Signôr des schiriis al dîs cussì: Stait atents a ce ch’o fasês! 6O semenais un grum, ma o cjapais sù pôc; o mangjais, ma no sês mai passûts; o bevês, ma no rivais a incjocâsi; si vistîs, ma cence rivâ a sclipîsi, e chel sot paron al cjape il salari par butâlu tun sacut sbusât. 7Il Signôr des schiriis al dîs cussì: 8Lait sù su la mont, a puartâ dongje legnam e a tornâ a fâ sù la cjase! Jo o metarai li la mê contentece e o varai la mê glorie – al dîs il Signôr. 9Si spietavis tant e o vês vût pôc e nuie; e cuant che se al puartavis a cjase, jo i soflavi parsore. Parcè? – sentence dal Signôr des schiriis –. Par colpe de mê cjase ch’e je in ruvine, biel che ognidun al bacile dome par sè. 10Par chel il cîl al à dineade la sô rosade e la tiere i siei prodots. 11Jo o ài clamât il sut sui cjamps e su lis monts, sul forment, sul vueli e sun dut ce ch’e bute la tiere; sui oms, sul besteam e sun dute la vore des mans”.

12Alore Zorobabel, fi di Sealtiel, e Gjosuè, fi di Jozedak, prin predi, e dut il rest dal popul a scoltarin la vôs dal Signôr lôr Diu e lis peraulis dal profete Agjeu, che ur al veve mandât il Signôr; e il popul al temè il Signôr. 13E Agjeu, mes dal Signôr, i disè al popul in cualitât di mes dal Signôr: “Jo o soi cun vualtris – sentence dal Signôr –”.

Inizi dai lavôrs

14Il Signôr al disveà il spirt di Zorobabel, fi di Sealtiel, governadôr de Gjudee, e il spirt di Gjosuè, fi di Jozedak, prin predi, e il spirt di dut il rest dal popul. Si moverin e a scomençarin lis voris pe cjase dal Signôr des schiriis, lôr Diu. 15Al jere il vincjecuatri dal sest mês, tal secont an dal re Dario.

La glorie dal gnûf templi

21Tal setim mês, ai vincjeun dal mês, la peraule dal Signôr i je stade dite al profete Agjeu. 2Disii cussì a Zorobabel, fi di Sealtiel, governadôr de Gjudee, e a Gjosuè, fi di Jozedak, prin predi, e a dut il rest dal popul: 3“Isal restât fra di vualtris cualchidun ch’al à viodude cheste cjase tal so sflandôr di prime? E cemût le viodêso cumò? No us parie propit un nuie? 4Alore sù mo, coragjo, Zorobabel! – Sentence dal Signôr –. Coragjo, Gjosuè, fi di Jozedak, prin predi! Coragjo, popul dut de tiere! – Sentence dal Signôr –. A vore, che jo o soi cun vualtris! – Sentence dal Signôr –. 5Il gno spirt al è framieç di vualtris; no stait a vê pôre!

6Il Signôr des schiriis al dîs cussì: Ancjemò un pôc e po o scjassarai il cîl e la tiere, il mâr e la tiere ferme; 7o scjassarai ducj i popui, e i tesaurs di ducj i popui a rivaran culì e o jemplarai di glorie cheste cjase – al dîs il Signôr des schiriis –. 8Gno al è l’arint e gno al è l’aur! – Sentence dal Signôr des schiriis –.9La glorie di cheste seconde cjase e sarà plui grande di chê de prime – al dîs il Signôr des schiriis – e a di chest lûc jo i darai pâs – sentence dal Signôr des schiriis –”.

De maludizion a la benedizion

10Ai vincjecuatri dal nono mês, tal secont an di Dario, la peraule dal Signôr i je stade dite al profete Agjeu: 11“Il Signôr des schiriis al dîs cussì: Domandiur ai predis une decision in merit di chest: 12Se un al puarte cjar consacrade tal ôr de sô tonie e cul ôr al tocje il pan, la mangjative, il vin, il vueli o cualunche altri gjenar, chestis robis restarano consacradis?”. I predis a rispuinderin: “No”. 13Agjeu al continuà: “Se un, che si è sporcjât tocjant un cadavar, al tocje une di chestis robis, deventarae soce?”. E i predis i rispuinderin: “Po sigûr ch’e devente soce!”. 14Alore Agjeu al zontà: “Cussì al è chest popul, cussì e je cheste gjernazie denant di me! – Sentence dal Signôr des schiriis –. Cussì e je ogni vore des lôr mans, e dut ce che mi ufrissin al è soç.

15Cumò tignît ben a ments par vuê e pal avignî. Prime ch’a metessin un clap sore chel altri tal templi dal Signôr, 16ce jeriso? Si rivave tun grum di vincj misuris e and jere dome dîs; si rivave li dal turcli par gjavânt fûr cincuante e and jere dome vincj. 17O ài pestât cul vier, cul rusin e cu la tampieste dute la vore des vuestris mans, ma vualtris no sês tornâts di me – sentence dal Signôr –. 18Cumò duncje tignît ben a ments par vuê e pal avignî: 19us mancje ancjemò la semence sul cjast? La vît, il figâr, il miluçâr ingranât e l’ulivâr no àno ancjemò fatis lis lôr pomis? Di vuê indenant jo us benedìs!”.

Zorobabel, l’elet di Diu

20La peraule dal Signôr i je stade dite a Agjeu pe seconde volte ai vincjecuatri dal mês: 21“Fevelii a Zorobabel, governadôr de Gjudee, e disii: Jo o scjassarai il cîl e la tiere, 22o savoltarai la sente dai reams, o fruçarai la potence des gjernaziis. O savoltarai cjars e cjavalîrs, un par colpe de spade di chel altri. 23In chê dì – sentence dal Signôr des schiriis – ti cjaparai sù, Zorobabel, fi di Sealtiel, gno servidôr – sentence dal Signôr – e ti metarai tant che un sigjîl, parcè che ti ài sielzût jo – sentence dal Signôr des schiriis –”.