GJIONE (3;4)

Letôr: Flavia Degano

Diu ur perdone a la int di Ninive

31La peraule dal Signôr e plombà parsore di Gjone pe seconde volte. i disè: 2“Jeve sù e va a Ninive, la grande, a contâi il mes che jo ti doi”. 3Gjone si metè in viaç par lâ a Ninive seont la peraule dal Signôr. Ninive e jere une citât grande, lungje trê dîs di viaç. 4Gjone, dopo di vê cjaminât dentri de citât par une dì interie, al berlà: “Ancjemò corante dîs e Ninive e sarà fiscade!”. 5La int di Ninive i croderin a Diu e a ordenarin di zunâ, vistûts di sac dal plui grant al plui piçul.

6Cuant che la gnove i rivà al re di Ninive, chel al jevà sù de sô sente, si gjavà il mantel regâl, si vistì di sac e al lè a sentâsi te cinise. 7Al mandà fûr par Ninive un decret dal re e dai siei grancj: “Oms e besteam grant e minût no cerçaran un lafè di nuie, no passonaran e no bevaran aghe. 8Che si cuviergin ducj di sac e a clamin Diu cun dute la lôr fuarce. Ognidun che si mendi de sô brute condote e de violence che e à sporcjadis lis sôs mans. 9Pò stâi che Diu si ricrodi e al gambii idee, ch’al cessi dal fugôr de sô rabie e cussì no murarìn”. 10Diu al viodè lis lôr voris, ven a stâi che si jerin mendâts de lôr brute condote. Alore Diu si pintì dal mâl che ur veve professât e no lu fasè gran.

Gjone al contint cun Diu in merit dal boncûr

41Ma a Gjone chest i lè al cûr, e si stiçà. 2Al preà il Signôr e i disè: “Su mo, Signôr! No jerial forsit chest il gno pinsîr cuant che o jeri inmò inte mê tiere? Par chel jo, il prin viaç, o jeri scjampât a Tarsis, parcè che o savevi che tu tu sês un Diu plen di dûl e di boncûr, pegri tal inrabiâsi e splendit tal perdonâ e che tu ti pintissis dal mâl. 3Poben cumò, Signôr, cjol la mê vite, parcè che par me al è miei murî che no vivi!”. 4I rispuindè il Signôr: “Ise juste cheste tô fote?”.

5Alore Gjone al jessì de citât e si sentà denant de citât. Si fasè sù une staipe e si sentà li dentri, ta l’ombrene, par viodi ce che i sarès capitât a la citât. 6Alore il Signôr Diu al fasè cressi parsore di Gjone une plante di ricin, par ch’al ves ombrene sul so cjâf e al fos deliberât dal so malstâ. Gjone s’indalegrà une vore par chel ricin.

7Tal indoman, sul crichedì, Diu al mandà un vier a roseâ il ricin, che si secjà. 8Cuant che al jevà il soreli, Diu al mandà un aiar de jevade ch’al sofegave, e il soreli al plombà sul cjâf di Gjone. Si sintì a lâ denant-daûr e al clamà la muart, disint: “O ài miei murî che no vivi”.

9Diu i disè a Gjone: “Ise juste che tu te cjapis tant par une plante di ricin?”. I rispuindè: “E je propit juste, e o soi tant disdegnât ch’o ài miei murî”. 10Alore il Signôr al zontà: “Tu âs dûl dal ricin, che no tu âs fadiât nuie e che no tu lu âs fat cressi, stant ch’al è vignût sù intune gnot e intune gnot le à distrigade. 11E jo no varès vût di vê dûl de citât di Ninive, la grande, là ch’a son a stâ passe cent e vincj mil di lôr, che no rivin a diferenziâ la drete de çampe, e un stragjo di besteam?”.