ESODO (40)

Letôr: Bruna Minen

Erezion e consacrazion dal santuari

401Il Signôr i fevelà a Mosè cussì: 2“La prime dì dal prin mês tu metarâs sù il santuari, la tende de cunvigne. 3Tu metarâs dentri ancje l’arcje dal pat e tu taponarâs l’arcje cul vêl. 4Tu puartarâs dongje la taule e tu le prepararâs cui siei furniments. Tu puartarâs il cjandelîr e tu metarâs sù lis sôs lampadis. 5Tu metarâs l’altâr d’aur dai bonodôrs denant de arcje dal pat e tu metarâs il tendon su la jentrade dal santuari, de tende de cunvigne. 6Tu metarâs l’altâr dai olocauscj denant de jentrade dal santuari, de tende de cunvigne. 7Tu plaçarâs la concje fra la tende de cunvigne e l’altâr e tu le jemplarâs di aghe. 8Tu sistemarâs il sagrât torator e tu metarâs il tendon su la puarte dal sagrât. 9Tu cjolarâs il vueli de unzion e tu onzarâs il santuari e dut ce che al è dentri; tu lu consacrarâs, lui e dute la robe ch’e je dentri; e sarà une robe sante cence fin. 10Tu onzarâs l’altâr dai olocauscj cun ducj i siei furniments, tu consacrarâs l’altâr e l’altâr al deventarà une robe sante cence fin. 11Tu onzarâs la concje e il çocul e tu le consacrarâs. 12Po tu clamarâs Aron e i siei fîs dongje de jentrade de tende de cunvigne; tu ju lavarâs cu l’aghe, 13e tu i metarâs intor a Aron la munture benedide, tu lu onzarâs e tu lu consacrarâs par che mi fasi di predi. 14Tu clamarâs dongje ancje i siei fîs e tu ur metarâs intor la tonie, 15tu ju onzarâs precîs che tu varâs onzût lôr pari, par che mi fasin di predis. Cheste unzion ju fasarà predis par in eterni, pes lôr gjenerazions”.

A metin in vore i ordins dal Signôr

16Mosè al fasè cussì. Al fasè dut daûr che il Signôr i veve ordenât. 17La prime dì dal prin mês dal secont an, a meterin sù il santuari. 18Mosè al fasè sù il santuari; al metè i çocui, al plaçà lis breis, al metè i traviersins e al tirà sù lis colonis. 19Al slargjà la tende pal santuari e al metè parsore de tende un cuviert, come che il Signôr i veve ordenât a Mosè.

20Al cjolè la leç e le metè te arcje, al sistemà lis stangjis su l’arcje e al metè ancje il propiziatori parsore de arcje. 21Al puartà l’arcje dentri tal santuari e al sistemà la tendine dal vêl; al taponà ancje l’arcje dal pat come che il Signôr i veve ordenât a Mosè.

22Al metè la taule te tende de cunvigne, de bande disore dal santuari, a miegegnot, là che al finive il vêl. 23Al sistemà il pan denant dal Signôr, come che il Signôr i veve ordenât a Mosè.

24Al plaçà il cjandelîr te tende de cunvigne, in face de taule de bande disot dal santuari, 25e al sistemà lis lampadis denant dal Signôr, come che il Signôr i veve ordenât a Mosè.

26Al puartà l’altâr d’aur dentri te tende de cunvigne, denant dal vêl, 27e al brusà parsore l’incens profumât, come che il Signôr i veve ordenât a Mosè. 28Po al sistemà il tendon su la jentrade dal santuari. 29L’altâr dai olocauscj lu plaçà su la jentrade dal santuari, de tende de cunvigne, e al ufrì parsore l’olocaust e la ufierte, come che il Signôr i veve ordenât a Mosè.

30Al sistemà la concje fra la tende de cunvigne e l’altâr e le jemplà di aghe par lavâsi, 31par che Mosè, Aron e i siei fîs si lavassin lis mans e i pîts. 32Cuant che a jentravin te tende de cunvigne o che a levin dongje dal altâr si lavavin, come che il Signôr jal veve ordenât a Mosè.

33Al tirà sù il sagrât torator dal santuari e dal altâr e al metè il tendon su la puarte dal sagrât. E cussì Mosè al finì la sô vore.

Il nûl

34Alore il nûl al taponà la tende de cunvigne e la glorie dal Signôr e jemplà il santuari. 35Mosè nol podè jentrâ te tende de cunvigne, parcè che il nûl al jere simpri parsore di jê e la glorie dal Signôr e jemplave il santuari.

36A ogni tape, cuant che il nûl si alçave parsore dal santuari, i fîs di Israel si metevin in marce. 37Se il nûl no si alçave, no si metevin in viaç fintremai in chê dì che al tornave a alçâsi. 38Parcè che, vie pal dì, il nûl dal Signôr al stave parsore dal santuari e, di gnot, dentri al jere dut une fogule, che le viodevin dute la cjase di Israel. E cussì par dutis lis lôr tapis.