DENÊL (11:40-45;12)

Letôr: Valeria Salvador

La fin di Antioc IV

40Tal timp de fin il re di misdì lu frontarà. Il re di tramontane al plombarà sore di lui cun cjars, cun cjavalîrs e cuntun slac di nâfs: al jentrarà tes sôs tieris, lis inondarà e lis sumierzarà. 41Al vignarà te tiere dal Sflandôr e a colaran in tancj, ma a scjamparan des sôs sgrifis chei chi: Edom, Moab e ce ch’al vanze dai fîs di Amon. 42Al slungjarà la sô çate su lis tieris e la tiere dal Egjit no le scapolarà. 43Al brincarà i tesaurs d’aur e d’arint e di dutis lis robis di valôr dal Egjit; chei de Libie e de Etiopie si butaran denant dai siei pîts. 44Ma sunsûrs de jevade e de tramontane lu spaventaran e al plombarà cun grande viamence par fiscâ e par fruçâ une vore di lôr. 45Al plantarà lis tendis dal so cuartîr jenfri il mâr e la mont sante dal Sflandôr. Po al rivarà a la sô fin e nissun no i darà une man.

La resurezion finâl

121In chê volte al jevarà sù Micjêl, il grant princip ch’al vegle sui fîs dal to popul. Al sarà un timp di tribulazion che no ’nd è stade di compagne di cuant che a son i popui fint in chel moment. In chê volte il to popul al sarà salvât, ducj chei che si cjataran scrits tal libri.

2E une vore di chei ch’a duarmin te tiere dal pulvin si svearan: chescj pe vite eterne, ma chei altris pe vergogne, pe infametât eterne. 3I savis a lusaran come il lusôr de volte dal cîl e chei ch’a varan menâts une vore di lôr su la strade de justizie a saran come lis stelis in eterni, par simpri.

4E tu, Denêl, ten segretis chestis peraulis e sigjile il libri fintremai al timp de fin. Une vore di lôr a ciraran di lâ a font e la lôr cognossince e cressarà”.

Cuant la fin?

5Jo Denêl o cjalavi. Ve altris doi ch’a stavin un di ca su la rive dal flum e un di là su chê altre rive dal flum. 6Un i domandà al om vistût di fîl ch’al jere parsore des aghis dal flum: “Cuant sarae la fin di chestis robis cussì straordenariis?”. 7Alore o sintii l’om vistût di fîl ch’al jere parsore des aghis dal flum a zurâ, cu la gjestre e la çampe alçadis viers dal cîl, par chel ch’al vîf in eterni: “Par un timp, par plui timps e par mieç timp. Cuant che si varà finît di fiscâ la fuarce dal popul sant, dutis chestis robis a rivaran al colm”. 8O vevi sintût ben ma no vevi capît e alore o domandai: “Signôr gno, cuâl saraial il colm di dutis chestis robis?”. 9Mi rispuindè: “Va, Denêl, parcè che lis peraulis a son stadis scritis e sigjiladis fintremai al timp de fin. 10Une vore di lôr a saran smondeâts, lavâts, provâts; ma i triscj a restaran triscj; nissun trist nol capissarà, dome i sapients a capissaran. 11Dal moment ch’al cessarà il sacrifici eterni e al sarà metût impen il disordin de tribulazion a saran mil dusinte e novante dîs. 12Furtunât chel ch’al spietarà e ch’al rivarà a mil tresinte e trentecinc dîs. 13Tu va indenant fintremai a la fin; tu polsarâs e po tu tornarâs a jevâ sù par cjapâ la tô part, a la fin dai dîs”.