ESODO (39)

Letôr: Ermanna Comelli

Munture dal sorestant dai predis

391Cu la purpure viole, scarlate e crem a faserin la munture pes funzions dal santuari. A faserin i vistîts liturgjics distinâts a Aron, come che il Signôr i veve ordenât a Mosè.

L’efod

2A faserin l’efod di aur, di purpure viole, scarlate e crem e di fîl rituart. 3A faserin lis plachis d’aur e lis taiarin a strissulis par dâlis dongje in strece cu la purpure viole, scarlate e crem e cul fîl, usance i ricamadôrs. 4I faserin al efod dôs spalinis che lis tacarin insomp e dapît: cussì al saltà fûr dut un toc unît. 5La siarpe, che lu tignive peât e ch’e jere parsore vie, e jere fate compagn e e jere ancje chê dute di un toc: e jere intiessude di aur, di purpure viole, scarlate e crem e di fîl rituart, come che il Signôr i veve ordenât a Mosè.

6A lavorarin lis pieris di cuarnaline dadis dongje tes rosetis d’aur, là che a forin picjâts, come intun sigjîl, i nons dai fîs di Israel. 7Tor des spalinis dal efod a tacarin lis pieris in memorie dai fîs di Israel, come che il Signôr i veve ordenât a Mosè.

Il petorâl e la manteline

8A faserin il petorâl, lavorât compagn dal efod, di aur, di purpure viole, scarlate e crem e di fîl rituart. 9Al jere cuadrât e dopli, lunc une cuarte e larc une cuarte. 10Lu furnirin di cuatri riis di pieris. Une cuarnaline, un topazi, un smeralt te prime rie; 11un turchês, un zafîr e un beril te seconde rie; 12une agate, un gjacint e une ametiste te tierce rie; 13un crisolit, un calcedoni e un jasp te cuarte rie. A jerin incjastrâts tes rosetis d’aur. 14Lis pieris a corispuindevin ai nons dai fîs di Israel: dodis, seont i lôr nons, e a jerin picadis usance i sigjîi, ognidune cul so non, come lis dodis tribûs. 15Sul petorâl a faserin ancje cjadenutis d’aur rût a forme di strece. 16A faserin dôs rosetis d’aur e doi anei d’aur e a meterin i doi anei dapît dal petorâl. 17A meterin lis dôs strecis d’aur tai doi anei tes dôs estremitâts dal petorâl 18e a meterin i doi cjavets des strecis tes dôs rosetis; ju meterin cussì su lis spalinis dal efod, par denant. 19A faserin ancje doi anei d’aur e ju meterin insomp e dapît dal petorâl, par dentri, de bande dal efod. 20A faserin ancjemò doi anei d’aur e ju tacarin tes spalinis par denant dal efod, sot, par denant, là che si zontave, parsore de siarpe dal efod. 21A pearin i anei dal petorâl cui anei dal efod midiant di un cordon di purpure viole, in mût che il petorâl al restàs simpri parsore de siarpe dal efod e che no si distacàs dal efod, come che al veve ordenât il Signôr.

22Po a faserin la manteline dal efod, tiessude dute di un toc di purpure viole. 23Il sclap tal mieç de manteline al jere compagn dal sclap di un corset di gucje; il sclap al veve torator un ôr che no si sbregave. 24Su la plete de manteline a meterin miluçs ingranâts di purpure viole, scarlate e crem e di fîl rituart. 25A meterin ancje campanelis d’aur e a plaçarin lis campanelis jenfri dai miluçs ingranâts, 26une campanele e un miluç ingranât, une campanele e un miluç ingranât torator de plete de manteline, che si meteve tes funzions, come che al veve ordenât il Signôr a Mosè.

27Po a faserin lis toniis di fîl tiessût, par Aron e pai siei fîs; 28il turbant di fîl, lis baretis di fîl, i mudandons di fîl rituart, 29lis cinturiis lavoradis di fîl rituart, di purpure viole, scarlate e crem, come che i veve ordenât il Signôr a Mosè.

Il segnâl de consacrazion

30A faserin ancje un flôr, il segnâl de sante consacrazion, di aur rût e a scriverin parsore, usance un sigjîl: “Bandît pal Signôr”. 31A meterin parsore vie un cordon di purpure viole par peâlu tor dal turbant, adalt, seont l’ordin che il Signôr i veve dât a Mosè.

32A forin cussì finîts i lavôrs dal santuari, de tende de cunvigne; a vevin fat propit come che il Signôr i veve ordenât a Mosè.

I consegnin lis voris a Mosè

33I puartarin a Mosè il santuari, la tende e ducj i furniments, i cjans, lis breis, lis colonis e i çocui; 34il cuviert di piel di roc tenzude di ros, il tapon di corean fin e il vêl de tendine; 35l’arcje dal pat cu lis sôs stangjis e il propiziatori; 36la taule cun ducj i furniments e i pans de ufierte; 37il cjandelîr di aur rût, lis sôs lampadis, une schirie di lampadis, cun ducj i siei furniments, comprendût il vueli par inluminâ; 38l’altâr d’aur, il vueli de unzion, l’incens profumât e il tendon pe jentrade de tende; 39l’altâr di bronç e la gridele di bronç, cu lis sôs stangjis e cun dut il furniment; la concje cul çocul; 40lis tendinis dal sagrât, lis sôs colonis, i siei çocui, il tendon pe puarte dal sagrât, lis sôs cuardis, i siei pichets e dut il furniment che al coventave pes funzions dal santuari, pe tende de cunvigne; 41la munture che a vevin di doprâ par funzionâ tal santuari, la munture benedide pal predi Aron e la munture pai siei fîs, par jessi in grât di funzionâ. 42I fîs di Israel a vevin fats ducj i lavôrs daûr che il Signôr i veve ordenât a Mosè. 43Mosè al viodè la vore: a vevin fat propit come che il Signôr al veve ordenât. Alore Mosè ju benedì.