EZECHIEL (14;15)

Letôr: Maria Pia Foschi

Istruzions dal predi-profete su la nature dai cjastics di Diu

141A vignirin di me un trop di anzians di Israel e biel ch’a jerin sentâts denant di me, 2mi rivà la peraule dal Signôr: 3“Fi dal om, chei li si àn tirâts sù i lôr idui tal lôr cûr e si àn tindude dibessôi la palisse des lôr colpis. Varessio mo di lassâmi interpelâ di lôr? 4Par chel feveliur e dîsiur: Il Signôr, gno Diu, al dîs cussì: Se un de cjase di Israel, un che si à tirâts sù i siei idui tal cûr e che si à tindût dibessôl la palisse des sôs colpis al va dal profete, je darai ben jo, il Signôr, la rispueste, cun ducj i siei idui! 5O brincarai chei de cjase di Israel, che si è distacade di me par ducj i siei idui. 6Par chel dîsii a la cjase di Israel: il Signôr, gno Diu, al dîs cussì: Mendaitsi dai vuestris idui e slontanait la muse des vuestris porcariis. 7Di fat se un de cjase di Israel o dai forescj ch’a vivin in Israel si distache di me e si tire sù i idui tal so cûr e si tint dibessôl la palisse des sôs colpis e po al ven dal profete par interpelâmi, je darai ben jo, il Signôr, la rispueste! 8Mi voltarai cuintri di lui e lu fasarai deventâ un segnâl e un spieli; lu cjonçarai dal gno popul e o ricognossarês che jo o soi il Signôr.

9Se un profete si lasse imbroiâ e i conte la mê peraule, jo lu imbroiarai e o slungjarai il gno braç cuintri di lui e lu pararai jù dal gno popul, Israel. 10A puartaran la lôr colpe; tâl e je la colpe di chel che lu à interpelât e tâl e sarà la colpe dal profete. 11Chest par che no vedis plui di straviâ lontans di me, cjase di Israel, e no si maglais plui di sporcjetât cun dutis lis vuestris ribelions e par ch’o sedis il gno popul e jo il vuestri Diu. Sentence dal Signôr, gno Diu”.

12Mi rivà la peraule dal Signôr: 13“Fi dal om, se une tiere e pecje cuintri di me butantsi te infedeltât, o slungjarai il gno braç cuintri di jê e i crevarai la palote dal pan; i mandarai la fan e i cjonçarai oms e nemâi. 14Se si intivassin a vivi i trê grancj personaçs: Noè, Denêl e Jop, cu la lôr justizie si salvaressin dome lôr, sentence dal Signôr, gno Diu. 15O ben s’o fasês plombâ sun chê tiere besteatis salvadiis, che le svinidrissin e le fasessin deventâ un desert là che nol passe plui nissun par pôre di chês besteatis, 16chei siei trê personaçs – pe mê vite, sentence dal Signôr, gno Diu – no salvaressin ni fîs ni fiis; si salvaressin dome lôr e la tiere e restarès un desert.

17O ben se jo o fasès rivâ cuintri di chê tiere la spade e o des ordin che la spade le fischi e o fruçàs oms e nemâi, 18chei siei trê personaçs – pe mê vite, sentence dal Signôr, gno Diu – no salvaressin ni fîs ni fiis. Si salvaressin dome lôr.

19O ben s’o mandàs cuintri di chê tiere la peste e o strucjàs cuintri di jê la mê rabie insanganade, in mût di svinidrî oms e nemâi, 20i siei Noè, Denêl e Jop – pe mê vite, sentence dal Signôr, gno Diu – no salvaressin nancje un fi o une fie. Si salvaressin dome lôr, pe lôr justizie.

21Di fat il Signôr, gno Diu, al dîs cussì: La stesse robe e sucêt s’o mandi cuintri di Gjerusalem lis mês cuatri tremendis condanis: spade, fan, bestiis salvadiis e peste, di mût di svinidrî oms e nemâi. 22Ve, al restarà cualchidun; le scapolaran fîs e fiis. A pene ch’a rivaran di vualtris, o viodarês la lôr condote e lis lôr voris e si consolarês dal mâl ch’o ài fat rivâ su Gjerusalem, di dut ce che i ài fat rivâ cuintri. 23Lôr us consolaran parcè che o viodarês la lôr condote e lis lôr voris. O ricognossarês che no ài fat cence une reson dut ce che i ài fat”. Sentence dal Signôr, gno Diu.

La parabule dal vignâl

151Mi rivà la peraule dal Signôr: 2“Fi dal om, ce isal mai il len de vît rispiet a ducj chei altris lens ch’a son tal bosc?

3Si doprial forsit chel len

par fâ une vore?

Ant cjolino un tocut

magari dome par picjâ intor alc?

4Viodistu mo? Al è distinât a jessi brusât.

E cuant che il fûc lu à brusât insom e dapît,

il toc tal mieç si puedial forsit lavorâlu?

5Ma se cuant che al jere intîr

no si lu doprave par fâ nissune vore,

cumò che il fûc lu à consumât e al è arsinît

vuelistu ch’al sedi doprât par cualchi vore?

6Pa la cuâl il Signôr, gno Diu, al dîs cussì:

Come il len de vît, fra ducj i lens dal bosc,

al è distinât a jessi consumât dal fûc,

cussì o trati la int di Gjerusalem.

7Mi voltarai cuintri di lôr:

di un fûc le àn scapolade,

ma chel altri ju fruçarà.

O ricognossarês che jo o soi il Signôr

cuant che o voltarai cuintri di lôr la mê muse.

8E o fasarai deventâ la tiere une desolazion,

parcè che a àn mancjât di fedeltât”.

Sentence dal Signôr, gno Diu.