ESODO (33)

Letôr: Sandra Bisaro

331Il Signôr i disè a Mosè: “Va, partìs di culì, tu e il popul che tu âs fat saltâ fûr de tiere dal Egjit, e va viers de tiere che ur ài zurât a Abram, a Isac e a Jacop di dâure a la lôr gjernazie. 2O mandarai il gno agnul denant di te e o fasarai fûr i cananeus, i amoreus, i itits, i perissits, i eveus e i gjebuseus. 3Va sù te tiere là che a scorin a riui lat e mîl, ma jo no vignarai gran cun te, che no mi vegni sù la tentazion di fâti fûr par viaç, parcè che tu sês un popul dûr di capîle”.

4Cuant che al sintì chestis peraulis duris, il popul al fasè corot e nissun nol metè intorsi nissune bielisie.

5Alore il Signôr i disè a Mosè: “Dîsiur ai fîs di Israel: Vualtris o sês un popul dûr di cjâf; se jo o vignìs cun te, magari un lamp sôl, jo ti fasarès fûr. E cumò tire vie ducj i tiei corais, che o sai jo ce che o ài di fâti”.

6Par chel i israelits, de mont di Oreb in ca, no puartarin plui corais.

La tende

7Mosè al cjoleve la tende e le plantave par lui fûr dal campament, lontan. I metè non tende de cunvigne e ducj chei che a vevin di fevelâ cul Signôr, a levin de bande de tende de cunvigne, che e jere fûr dal campament.

8Ogni volte che Mosè al jessive viers de tende, dut il popul al jevave sù e ognidun si meteve su la puarte de sô tende e al tignive di voli Mosè fintremai che al jere jentrât te tende. 9Ogni volte che Mosè al jentrave te tende, la colone di nûl e vignive jù, si fermave su la jentrade de tende e il Signôr al fevelave cun Mosè. 10Dut il popul al viodeve la colone di nûl ferme su la jentrade de tende e ducj a jevavin sù e si butavin cu la muse par tiere, ognidun denant de sô tende. 11Il Signôr al tratave cun Mosè muse a muse, precîs che un om al discôr cul so amì; po al tornave tal campament ma il so famei Gjosuè, fi di Nun, un fantaçut, al stave simpri dentri te tende.

Preiere di Mosè

12Mosè i fevelà al Signôr cussì: “Viôt mo, tu mi disis: Mene sù cheste int, e no tu mi fasis savê se tu vignarâs cun me. Tu vevis pûr dit: Jo ti cognòs par non e ti ài a grât. 13Se alore tu mi âs a grât, mostrimi la tô strade in mût che ti cognossi e che o sepi che tu mi âs di buine bande. E ten a ments ancje chest popul, che al è la tô gjernazie”.

14E il Signôr i rispuindè: “O vignarai jo in persone e ti lassarai polsâ”. 15Dissal Mosè: “Se no tu vegnis tu in persone, no sta nancje fâmi lâ sù me di chi. 16Cemût varessio di fâ savê che tu mi âs a grât, me e il gno popul? Dome se tu vignarâs sù cun nô, nomo? Dome cussì jo e il to popul o sarìn a part di ducj i popui di chest mont”.

17Il Signôr i disè a Mosè: “O fasarai ancjemò ce che tu mi âs dit, parcè che ti ài a grât e ti cognòs par non”.

18I disè: “Mostrimi, par plasê, la tô glorie!”.

19I rispuindè: “O fasarai passâ denant di te dut il gno sflandôr e o nomenarai denant di te il non dal Signôr. Jo i perdoni a di chel che o vuei perdonâi e o ài dûl di chel che o vuei vê dûl di lui”. 20“Ma però, dissal, no tu puedis viodi la mê muse, parcè che l’om nol pò viodimi me e restâ in vite”. 21Il Signôr al zontà: “Ve chi un puest dongje di me; tu tu restarâs su la crete. 22Cuant che e passarà la mê glorie, jo ti metarai intune fressure de crete e ti taponarai cu la man fintremai che no sarai passât. 23Subit dopo o tirarai vie la man e tu podarâs viodimi in schene; ma la muse no tu puedis viodime”.