LAMENTAZIONS (5)

Letôr: Chiara Viola

Cuinte Lamentazion

51Visiti, Signôr, di ce che nus à capitât,

cjale e viôt le nestre vergogne!

2La nestre ereditât le àn gafade i forescj,

lis nestris cjasis int mai cognossude.

3O sin deventâts vuarfins, cence pari,

lis nestris maris a son come veduis.

4O bevìn la nestre aghe paiantle a presit d’arint,

o comprìn i nestris lens a paiament.

5O sin perseguitâts cuntun jôf sul cuel:

o sin scanâts e no nus dan recuie.

6I vin slungjade une man al Egjit,

a Assur, par passisi di pan.

7I nestris vons a àn pecjât e no son plui,

e nô si vin cjamadis su pe schene lis lôr colpis.

8Sclâfs nus fasin di parons,

nissun nol rive a gjavânus des lôr sgrifis.

9Si procurìn il pan riscjant la nestre vite

denant de spade dal desert.

10La nestre piel si è scridelide tant che il fôr

pal brusôr de fan.

11In Sion a àn dopradis lis feminis,

lis fantatis te citât di Gjude.

12A àn picjât i sorestants cu lis lôr mans,

no àn pêl di rivuart pe muse dai anzians.

13I zovins a son stâts peâts tor de muele dal forment,

i fruts a son colâts sot de cjame dai lens.

14I viei a àn finît di dâsi dongje inte puarte,

i zovins a àn molât di cjantâ.

15E je finide la gjonde dal nestri cûr:

il nestri bal si è tramudât in corot.

16E je colade la zoe dal nestri cjâf:

puars mai nô, ch’o vin pecjât!

17Par chel si è inmalât il nestri cûr,

par chel si son intorgulîts i nestris vôi:

18pe mont di Sion, ch’e je bandonade:

le talpinin lis bolps.

19Ma tu, Signôr, tu restis par simpri,

la tô sente e je di ete in ete.

20Parcè mo âstu di dismenteânus par simpri?

Âstu propit di bandonânus fin ch’and è zornadis?

21Fasinus tornâ di te, Signôr, e nô o tornarìn,

torne a fâ gnûfs i nestris dîs come par vieri!

22Nus butistu di bande propit par simpri?

Sêstu disdegnât cuintri di nô fûr di misure?