LAMENTAZIONS (3)

Letôr: Sterio Bertolissi

Tierce Lamentazion

Alef

31Jo o soi l’om ch’al à viodude la miserie

sot la mace de sô rabie.

2Mi à menât e mi à fat lâ indenant

tal scûr e no te lûs.

3Propit! Cuintri di me al volte e al torne a voltâ

la sô man dute la mari dal dì.

Bet

4Al à disfate la mê cjar e la mê piel,

al à crevâts i miei vues.

5Al à fat sù un mûr cuintri di me e mi à invuluçât

di velen e di marum.

6Mi à fat vivi in lûcs di gnot penge

come chei ch’a son muarts di dopomai.

Ghimel

7Al à tirât sù un mûr ator di me: no rivi a saltâ fûr,

al à fate deventâ plui grivie la mê cjadene.

8Ancje s’o berlàs e s’o preàs,

lui al scjafoe la mê preiere.

9Al à inmuradis lis mês stradis cun clapons scuadrâts,

al à fat straviâ i miei trois.

Dalet

10Al è stât par me tant che un ors in paisse,

un leon tes scuindarolis.

11Lis mês stradis al à straviât, mi à slambrât,

mi à jemplât di marum.

12Al à tindût il so arc e mi à metût

tant che bersai pe sô frece.

He

13Al à impirât tai miei rognons

i fîs dal so boç.

14O soi deventât il sbeleç di dut il gno popul,

ce che lui al va cjantuçant dut il dì.

15Mi à passût di jerbis maris

e mi à distudade la sêt cul arsinç.

Vau

16E mi à crevâts i dincj cu la glerie,

mi à fat colâ tal pulvin.

17La pâs si è slontanade de mê anime,

o ài dismenteât ce ch’al è ben.

18E o ài dite: “E je sparide la mê vigorie

e la mê sperance tal Signôr!”.

Zain

19Visiti de mê miserie e dal gno pelegrinâ:

arsinç e velen.

20Si vise, s’impense e si bute jù

dentri di me la mê anime.

21Chest jo o riclami tal gno cûr,

par ch’o puedi sperâ inmò:

Het

22lis graciis dal Signôr, che no son finidis,

e il so boncûr, che no si à suiât.

23A tornin a deventâ gnovis ogni buinore:

ce grande ch’e je la sô fedeltât!

24La mê anime e dîs: “Il Signôr al è la mê part”,

par chest o speri in lui.

Tet

25Il Signôr al è bon cun chel ch’al spere in lui,

cu l’anime che lu cîr.

26Al è ben spietâ, e tal cidin,

la salvece dal Signôr.

27Al è ben pal om ch’al puarti

un jôf di zovin in sù.

Jod

28Che si senti in bande e ch’al tasi

cuant che jal varà metût intor.

29Ch’al meti la sô bocje tal pulvin:

salacor and è inmò sperance!

30Ch’al ufrissi, a di chel che lu patafe, la muse,

che si passi di vergogne.

Caf

31Parcè che Adonai nol bute di bande par simpri.

32Parcè che, s’al fâs patî, al à dûl,

seont il so grant boncûr.

33Parcè che nol à gust di umiliâ

e di fâ patî i fîs dal om.

Lamed

34Cuant che un al tibìe sot dai siei pîts

ducj i presonîrs di une tiere,

35cuant che un al savolte il dirit di un om

denant de muse dal Altissim,

36cuant che un i fâs un dituart a di un om intal procès

Adonai no viodial?

Mem

37Cui àial dite une robe e e je stade fate?

No le àial forsit comandade Adonai?

38De bocje dal Altissim no vegnial fûr

il mâl e il ben?

39Parcè si lamential l’om, l’om ch’al vîf cun dut ch’al à pecjât?

Nun

40Cjalìn ben lis nestris stradis, scrutinìnlis,

e tornìn dal Signôr.

41Alcìn il nestri cûr su lis mans

a Diu ch’al è tai cîi.

42O vin pecjât, o sin stâts ribei

e tu no tu âs perdonât.

Samec

43Tu ti sês invuluçât di rabie e tu nus âs corût daûr,

tu âs copât: no tu âs vût dûl!

44Tu ti sês invuluçât tun nûl,

par no ch’e passas la preiere.

45Tu nus âs fats deventâ scovacis e refudums

framieç dai popui.

Pe

46A àn spalancade cuintri di nô la lôr bocje

ducj i nestris nemîs.

47Terôr e buse a son stâts il nestri distin,

svinidriment e ruvine.

48Il gno voli al spissule riui di lagrimis

pe ruvine de fie dal gno popul.

Ain

49Il gno voli si disfâs e nol à padin:

nol à ben

50fintremai che il Signôr

nol cjali jù dal cîl e nol viodi.

51Il gno voli al lambiche la mê anime

viodint lis fiis de mê citât.

Zade

52Mi àn dade la cjace come a un ucel

chei che mi àn in asse cence une reson.

53E à butade te buse la mê vite

e mi àn butât claps parsore.

54Lis aghis mi son rivadis fin parsore il cjâf;

o ài dit: “Cumò o soi lât!”.

Qof

55O ài berlât il to non, Signôr,

de buse plui fonde.

56Tu âs sintude la mê vôs: “No sta sierâ

la tô orele al gno suspîr, al gno berli!”.

57Tu mi sês vignût dongje te dì che ti ài clamât;

tu mi âs dite: “No sta vê pôre!”.

Res

58Tu âs parade, Adonai, la cause de mê anime,

tu âs sfrancjade la mê vite.

59Tu âs viodude, Signôr, la mê umiliazion;

pare il gno dirit!

60Tu âs viodûts ducj i lôr svindics,

ducj i lôr complots cuintri di me.

Sin

61Tu âs sintudis, Signôr, lis lôr ofesis,

ducj i lôr complots cuintri di me,

62i lavris dai miei nemîs e i lôr progjets

cuintri di me dute la mari dal dì.

63Ch’a sedin sentâts o ch’a jevin sù, tenju di voli:

a cjantucin cuintri di me.

Tau

64Dàur il lôr salari, Signôr,

seont la vore des lôr mans.

65Dàur un cûr dûr,

la tô maludizion ch’e sedi su di lôr.

66Dàur sot inte rabie e svinidrissiju

di sot dai tiei cîi, Signôr!