ISAIE (61;62)

Letôr: Erika De Cecco

Il mandât di Diu

611Il spirt dal Signôr Diu al è parsore di me,

parcè che il Signôr mi à onzût,

mi à mandât a puartâur la buine gnove ai puars,

a fassâ chei dal cûr crevât,

e a contaûr ai depuartâts ch’a son libars,

ai presonîrs ch’a puedin lâ,

2a proclamâ un an di gracie de bande dal Signôr,

une zornade di svindic de bande dal nestri Diu,

par confuartâ ducj chei ch’a son avilîts,

3par dâur une corone impen de cinise,

vueli di ligrie impen di un vistît di corot,

laut impen di un cûr avilît.

Ju clamaran “Rôi di justizie”,

“Plantigjon dal Signôr pe sô glorie”.

Restaurazion

4A tornaran a fâ sù lis ruvinis di une volte,

a tornaran a tirà sù i lûcs bandonâts par vieri,

a tiraran vie lis citâts sdrumadis,

bandonadis par etis.

5A vignaran forescj e a passonaran i vuestris trops;

i fîs dai forescj e araran par vualtris e us viodaran dai vignâi.

6Vualtris o sarês clamâts “Predis dal Signôr”,

us disaran “Servidôrs dal nestri Diu”.

O mangjarês de ricjece dai forescj,

si ingloriarês de lôr bondance.

7Impen de vuestre vergogne o cjaparês il dopli,

impen de umiliazion de bande vuestre o gjoldarês;

cussì te lôr tiere a ereditaran il dopli,

par lôr e sarà une contentece eterne.

8Parcè che a mi, Signôr, mi plâs la justizie,

o ài in asse la rapine e il delit;

ur darai la pae cun fedeltât,

e o fasarai cun lôr un pat par simpri.

9La lôr gjernazie e sarà cognossude framieç dai forescj

e la lôr dissendence framieç dai popui.

Ducj chei che ju viodaran, ju ricognossaran,

parcè che lôr a son une gjernazie che il Signôr al à benedide.

Poeme nuviçâl

10O gjoldarai une vore tal Signôr,

e la mê anime si indalegrarà tal gno Diu,

parcè che mi à riviestût cui vistîts de salvece,

e mi à taponât cu la manteline de justizie;

come un nuviç che si met une corone

e une nuvice che si furnìs cu lis sôs zois.

11Parcè che come la tiere e bute fûr i siei butui

e il zardin al fâs butulâ lis sôs semencis,

cussì il Signôr Diu al fasarà butulâ la justizie

e la laut in face di ducj i forescj.

La gnove Sion

621Par amôr di Sion no tasarai,

e par amôr di Gjerusalem no mi darai pâs,

fin che la sô justizie no crichi tant che l’albe

e la sô salvece no lusi tant che une torce.

2In chê volte i forescj a viodaran la tô justizie

e ducj i rês la tô glorie,

e tu sarâs clamade cuntun non gnûf,

che la bocje dal Signôr lu disarà.

3Tu sarâs une zoe sflandorose te man dal Signôr,

une corone reâl tal dret de man dal to Diu.

4No ti disaran plui “Bandonade”,

parcè che ti disaran “Il gno gust al è in jê”,

e la tô tiere “Maridade”;

parcè che il Signôr al cjate gust in te,

e la tô tiere e varà un nuviç.

5Propit, come un fantat al cjol une fantate,

ti maridarà chel che ti à fate sù;

e come che il nuviç si console cu la sô nuvice,

cussì il to Diu al gjoldarà di te.

6Su lis tôs muris, Gjerusalem,

o ài metudis vuaitis;

ducj i dîs e dutis lis gnots

no tasaran mai.

Vualtris che i ricuardais al Signôr,

no stait a dâsi padin!

7No stait a dâi padin a lui

fin che nol vedi tornât a sistemâ,

e fin che nol vedi fat di Gjerusalem

une braure su la tiere.

8Il Signôr al à zurât pe sô gjestre

e pal so braç fuart:

“Mai plui e mai altri no darai il to forment

in past ai tiei nemîs;

e i forescj no bevaran plui il to vin,

che tu âs fadiât daprûf;

9parcè che chei ch’a varan cjapât sù il forment

lu mangjaran e a laudaran il Signôr,

e chei ch’a varan vendemât

a bevaran il vin

tai curtîi dal gno santuari”.

La vignude dal salvadôr

10Passait, passait pes puartis!

Splanait la strade pal popul!

Metêt jù, metêt jù il pedrât te strade,

tirait vie i claps,

alçait une bandiere pai popui!

11Ve, il Signôr al fâs sintî

fin tai confins dal mont:

“Disêt a la fie di Sion:

Ve, al sta rivant il to salvadôr,

ve, al à daûrsi il so salari,

e la sô pae e je denant di lui.

12Ur disaran “Popul sant”,

“Sfrancjâts dal Signôr”,

e a ti ti disaran “Cirude”,

“Citât mai bandonade”.