ESODO (27)

Letôr: Lucio Michelini

L’altâr dai olocauscj

271Tu fasarâs l’altâr di len di agace: lunc cinc comedons e larc cinc, l’altâr al sarà cuadrât, e alt trê comedons. 2Tai cuatri cjantons tu fasarâs i cuars in mût che a fasin bloc cun lui, e tu lu riviestissarâs di bronç. 3Tu fasarâs fâ i vâs par puartâ vie lis cinisis grassis, lis paletis, i cjalderins par sborfâ, i pirons e lis fugheris. Dute la robe dal altâr tu le fasarâs di bronç. 4Tu fasarâs une gridele di bronç a rêt e tu fasarâs tai cuatri cjantons di cheste rêt cuatri anei di bronç. 5Tu le metarâs sot te curnîs dal altâr, abàs, in mût ch’e rivi, come altece, a mieç altâr. 6Tu fasarâs pal altâr ancje lis stangjis, stangjis di len di agace e tu lis riviestissarâs di plachis di bronç. 7Tu metarâs lis stangjis dentri tai anei in mût che lis stangjis a sedin di ca e di là dal altâr cuant che si lu puarte ator. 8Tu lu fasarâs çondar, in breis; tu lu fasarâs come che tal ài fat viodi jo su la mont.

Il sagrât

9Tu fasarâs un sagrât pal santuari. De bande disot, a misdì, i tendons dal sagrât, di fîl rituart, a saran luncs cent comedons pe prime bande. 10Lis vincj colonis e i vincj çocui a saran di bronç; i rimpins des colonis e i listei di arint. 11Ancje pe bande disore tu fasarâs telons luncs cent comedons e lis vincj colonis e i vincj çocui a saran di bronç; i rimpins des colonis e i listei di arint. 12De bande dal mâr, il sagrât al sarà larc cincuante comedons, al varà cincuante comedons di telon, cu lis sôs dîs colonis e i siei dîs çocui. 13Il sagrât al sarà larc, de bande di soreli jevât, cincuante comedons di tendon. 14Cuindis comedons di tendis suntune ale, lis sôs trê colonis e i siei trê çocui; 15e cuindis comedons di tendis su la seconde ale, lis sôs trê colonis e i siei trê çocui. 16Su la puarte dal sagrât a saran vincj comedons di tende damascade, di purpure viole, scarlate e crem e di fîl rituart, cu lis sôs cuatri colonis e i siei cuatri çocui. 17Dutis lis colonis torator dal sagrât a saran tignudis adun cun listei di arint; i rimpins a saran di arint e i çocui di bronç. 18Il sagrât, al sarà lunc cent comedons, larc cincuante comedons e alt cinc comedons. Ducj i tendons a saran di fîl rituart e i çocui di bronç. 19Ducj i furniments par funzionâ tal santuari, ducj i siei pichets e chei dal sagrât a saran di bronç.

20Tu ur disarâs ai fîs di Israel di proviodi vueli di ulivis masanadis par fâ lusôr, par che al sedi un cjandelîr che al art simpri. 21Aron e i siei fîs a sistemaran chest cjandelîr te tende de cunvigne, par difûr dal vêl che al cole jù par denant de testemoneance, par che al ardi di sere fintremai a buinore denant dal Signôr. Al è un ordin eterni pes gjenerazions dai fîs di Israel.