ISAIE (26;27)

Letôr: Renata Micoli

Laut e ringraciament

261In chê dì si cjantarà chest cjant te tiere di Gjude:

“O vin une citât fuarte,

pe nestre salvece lui al à tiradis sù

muris e cuintrimuris.

2Spalancait lis puartis,

e ch’e jentri une gjernazie juste,

ch’e manten la fedeltât!

3Il so cûr al è salt,

tu tu i siguris la pâs,

parcè che si fide di te.

4Fidaitsi simpri dal Signôr,

parcè che il Signôr al è une crete eterne,

5parcè che al à butât abàs

chei ch’a jerin a stâ in alt;

la citât ch’e jere in alt

lui le à sbassade,

le à sbassade fin par tiere,

le à butade tal pulvin.

6I pîts le tibìin,

i pîts dal misar,

i pas dai puars”.

7Il troi dal just al è dret,

tu tu splanis la strade dal just.

8Propit, pe strade dai tiei judizis, Signôr,

nô o sperìn in te!

Il to non e la tô memorie

a son la brame da l’anime.

9La mê anime ti brame vie pe gnot,

ancje il gno spirt ti cîr dentri di me.

Parcè che cuant che i tiei judizis a rivin su la tiere,

la int dal mont e impare la justizie.

10Se si perdonii al trist,

lui nol impare la justizie;

su la tiere dal ben, lui al fâs mâl,

e nol ricognòs gran la maiestât dal Signôr.

11Signôr, une vore alte e je la tô man,

ma lôr no le viodin.

Ch’a viodin, vergognantsi,

la tô gjelosie pal popul,

anzit il fûc dai tiei nemîs che ju gloti vîfs!

12Signôr, tu tu nus darâs la pâs,

parcè che ogni nestre vore tu tu le fasis par nô.

13Signôr, Diu nestri,

parons fûr di te nus àn paronâts;

al è dome par te che nô o clamìn il to non.

14I muarts no tornaran a vivi,

lis ombris no risurissaran,

parcè che tu ju âs cjastiâts e fruçâts,

tu âs fate sparî ogni lôr memorie.

15Tu âs slargjade la gjernazie, Signôr,

tu âs slargjade la gjernazie,

tu ti sês glorificât,

tu âs slargjâts ducj i confins de tiere.

16Signôr, ti vin cirût te tribulazion,

il terôr de opression al è stât il to cjastic par nô.

17Come une parturient ch’e sta par parturî

si stuarç e e berle di dolôr,

cussì ancje nô denant di te, Signôr.

18O vin cjapât sù, o vin sintudis lis dois,

come s’o vessin di parturî aiar!

No i vin puartade la salvece a la tiere,

e no je nassude int tal mont!

19I tiei muarts a tornaran a vivi,

i lôr cadavars a resurissaran,

si svearan e a gjoldaran

chei ch’a son distirâts tal pulvin,

parcè che la tô rosade e je une rosade sflandorose,

e la tiere e parturissarà lis ombris.

Cjastic e salvece

20Va, popul gno, jentre tes tôs cjamaris,

e sieriti lis puartis daûr di te;

platiti par un lamp,

fin che no je passade la rabie.

21Parcè che il Signôr al salte fûr de sô cjase

par cjastiâ la tristerie de int de tiere;

la tiere e tornarà a butâ fûr il sanc supât

e no platarà plui i siei cadavars”.

271In chê dì il Signôr al cjastiarà

cu la sô spade dure, grande e fuarte

il Leviatan, sarpint sbrissot,

il Leviatan, sarpint inturtiçât,

e al coparà il dragon dal mâr.

Il cjant dal vignâl

2In chê dì si disarà:

“Il vignâl gjoldibil, cjantaitlu!

3Jo, il Signôr, lu vuardii,

lu bagni ogni moment,

par che no i fasin dams,

dì e gnot jo i fâs la vuaite.

4No soi inrabiât.

S’a fossin baraçs e spinis,

ur fasarès vuere,

ju brusarès ducj tun colp!

5O, miei, che si ciri ripâr chi di me,

che si fasi la pâs cun me,

che si fasi la pâs cun me”.

Cunvigne dal popul elet

6Tai dîs a vignî Jacop al metarà lidrîs,

Israel al florissarà e al butularà,

e il mont intîr si jemplarà des sôs pomis.

7Il Signôr lu àial forsit bastonât

come ch’al à bastonât i siei bastonadôrs?

Lu àial forsit copât come ch’al à copât i siei sassins?

8Tu lu âs cjastiât parantlu vie, parantlu fûr,

tu lu âs pocât vie cuntune soflade tremende

tune dì di aiar de jevade.

9Propit cussì e sarà parade jù la tristerie di Jacop,

e chest al gjavarà dutis lis conseguencis dal so pecjât,

cuant che al varà ridusudis dutis lis pieris dal altâr

come pieris che si frucilis pe cjalcine.

No tiraran sù plui pâi sacrâi e altârs pal incens.

10Parcè che la citât rinfuarçade

e je deventade une desolazion,

un lûc cence int e bandonât tant che un desert;

li al va a passonâ il vidiel,

si distire e al fische i siei ramaçs.

11Cuant che si secjin i ramaçs, si crevin,

a rivin lis feminis e ur dan fûc;

a son propit un popul cence inteligjence;

par chel nol varà dûl chel che lu à creât

e nol varà remission chel che lu à fat.

12In chê dì

al sucedarà che il Signôr al batarà i spîs

dal flum fint al riul dal Egjit,

e o sarês cjapâts sù un par un, vualtris, fîs di Israel.

13E al sucedarà che in chê dì

si sunarà cu la trombe grande,

e a vignaran chei che si jerin pierdûts te tiere di Assur,

e chei che si jerin sparniçâts te tiere dal Egjit,

e a adoraran il Signôr

su la mont sante, in Gjerusalem.