ISAIE (19;20)

Letôr: Giovanni Vidale

Judizi sul Egjit

191Sentence sul Egjit.

Ve il Signôr ch’al cjavalgje un nûl lizêr

e si ’nt va ventijù pal Egjit.

A triculin i dius dal Egjit denant di lui

e tal pet ur cangje il cûr ai egjizians.

2O stiçarai l’Egjit cuintri dal Egjit,

a combataran un cuintri di chel altri,

ognidun cuintri dal so prossim

citât cuintri citât, ream cuintri ream.

3La potence dal Egjit e sparissarà framieç di lui,

e o ridusarai a nuie il so consei;

pa la cuâl a laran dai idui e dai incjantadôrs,

de int ch’e interpele i muarts e dai induvinins.

4O metarai i egjizians

tes mans di un paron dûr,

un re cence cûr al paronarà sun lôr,

sentence dal Signôr, Diu des schiriis.

5Lis aghis dal mâr si suiaran,

il flum al calarà e al deventarà sut.

6I canâi a deventaran un infet,

si disvuedaran e si secjaran i riui,

cjanis e vencjârs a pendolaran.

7I papîrs ad ôr dal Nîl e te fôs dal Nîl

e dutis lis plantis dal Nîl si secjaran,

a sparissaran dal dut.

8A gemaran i pescjadôrs, a fasaran corot

ducj chei ch’a butin l’am tal Nîl,

e a fasaran lament ducj chei ch’a slargjin

lis rêts sul pêl da l’aghe.

9Chei ch’a lavorin il lin a saran sconsortâts,

chês che lu petenin e i tiessidôrs a varan muse sbatude.

10I tiessidôrs a saran disperâts,

ducj i lavorents a zornade avilîts dentri di sè.

11A son propit basoâi i princips di Soan

i plui savis conseîrs dal faraon a dan conseis stupits.

Cemût fasêso a dîi al faraon:

“Jo o soi dissepul dai savis, dissepul di rês antîcs”?

12Dulà sono po i tiei savis?

Che ti contin e che ti fasin savê

ce ch’al à progjetât il Signôr des schiriis

sul cont dal Egjit.

13A son deventâts basoâi i princips di Soan,

si sbalgjin i princips di Nof,

i sorestants des sôs tribûs.

14Il Signôr al à mandât framieç di lôr

un spirt ch’al fâs pierdi il cjâf,

e a fasin straviâ l’Egjit in dut ce ch’a fasin,

precîs dal cjoc ch’al va in trambulis parsore di ce ch’al à gomitât.

15In pro dal Egjit no si fasarà nissune vore

de part dal cjâf o de code, de palme o dal vencjâr.

Conversion des grandis potencis

16In chê dì i egjizians a saran tant che lis feminis, a trimaran di pôre denant de man che il Signôr des schiriis al scjassarà cuintri di lôr. 17La tiere di Gjude e deventarà un terôr pal Egjit; ogni volte che Gjude lu varan indiment, a varan ducj pôre par colpe dal progjet che il Signôr des schiriis al à prontât cuintri di lui.

18In chê dì in Egjit a saran cinc citâts ch’a fevelaran la lenghe di Canaan e ch’a zuraran pal Signôr des schiriis; une di lôr si clamarà “citât dal soreli”. 19In chê dì tal mieç de tiere dal Egjit al sarà un altâr consacrât al Signôr, dongje dal so confin un colonel in onôr dal Signôr. 20Te tiere dal Egjit al sarà un segnâl e une testemoneance pal Signôr des schiriis. Cuant che a clamaran il Signôr denant di chei che ju tibiaran, lui ur mandarà un salvadôr che ju pararà e ju liberarà. 21Il Signôr si pandarà al Egjit; i egjizians in chê dì a ricognossaran il Signôr; lu servissaran cun sacrificis e cun ufiertis, i fasaran avôts al Signôr e ju mantignaran. 22Il Signôr al pestarà ancjemò i egjizians, ju pestarà ma podopo ju vuarissarà; si convertissaran al Signôr, ch’al varà dûl di lôr e ju vuarissarà.

23In chê dì e sarà une strade dal Egjit fint a la Assirie. Assur al vignarà in Egjit e l’Egjit al larà a Assur e i egjizians a servissaran il Signôr insieme cun chei di Assur. 24In chê dì Israel, il tierç cul Egjit e cun Assur, al sarà une benedizion framieç de tiere. 25Il Signôr des schiriis ju benedissarà disint: “Benedet seial l’Egjit, il gno popul, Assur, vore des mês mans, e Israel la mê ereditât”.

Crot e discolç

201L’an che il Tartan, mandât di Sargon re di Assur, al è rivât a Asdod, al à marçât cuintri di Asdod e le à cjapade.

2In chê volte il Signôr al à fevelât midiant di Isaie, fi di Amos, cussì: “Va e dispee il sac dai tiei ombui e gjaviti i sandui dai pîts”.

Lui al à fat cussì e al è lât ator crot e discolç.

3Po il Signôr al à dite: “Come che il gno famei Isaie al va ator crot e discolç par trê agns tant che segnâl e avîs pal Egjit e par Kus, 4cussì il re de Assirie al menarà i presonîrs dal Egjit e i depuartâts di Kus, zovins e viei, crots e discolçs cu lis clapis distaponadis, vergogne dal Egjit! 5A saran scaturîts e sconsortâts par colpe di Kus, ch’a vevin tant sperât, e par colpe dal Egjit, che si tignivin tant in bon. 6In chê dì la int di chest oramâr e disarà: “Ve, cussì i à capitât a di chel ch’o vevin dade la nestre fiducie, ch’o jerin lâts a parâsi li di lui par vê un jutori, par jessi liberâts denant dal re di Assur! E cumò cemût fasarìno a salvâsi?”.