ISAIE (14)

Letôr: Paola Del Fabbro

Si tornarà dal esili

141Sigûr che il Signôr al varà dûl di Jacop, e al sielzarà ancjemò Israel, ju tornarà a meti te lôr tiere; il forest si darà dongje cun lôr e al sarà cjapât dentri te cjase di Jacop. 2I popui ju cjaparan e ju menaran te lôr tiere; la cjase di Israel sai fasarà siei su la tiere dal Signôr tant che servidôrs e siervis e a fasaran presonîrs chei che ju vevin fats presonîrs e a paronaran sun chei che ju vevin tibiâts.

Il re di Babilonie al va jù in chel altri mont

3E al sucedarà che te zornade che il Signôr ti varà liberât de tô pene, dal to torment e de dure sotanance che tu jeris stât tignût sot, 4tu intonarâs cheste sbeleade cuintri dal re di Babilonie e tu disarâs:

“Ce fin ch’al à fate chel che nus tibiave,

cemût ch’e je finide la rogance!

5Il Signôr al à crevade la vuiscje dai triscj,

il baston di comant dai parons,

6chel ch’al pestave rabiôs i popui

cun colps che no finivin mai,

che invelegnât al paronave i forescj

perseguitant cence padin.

7Dute la tiere e tire il flât, e je cujete,

e pete scriulis di gjonde.

8Ancje i ciprès a gjoldin par te

e i cedris dal Liban:

Di cuant che tu sês li, distirât,

i menaus no vegnin plui sù cuintri di nô.

9Là jù sot, lis inferis si remenin par te,

par vignîti incuintri cuant che tu rivis;

par te a svein lis ombris,

ducj i potents de tiere;

a àn fat jevâ sù des lôr sentis

ducj i rês dai forescj.

10Ducj a cjapin la peraule par dîti:

Ancje tu tu sês stât scanât come nô,

tu sês deventât compagn di nô!

11Il to lusso al è lât jù tes inferis,

come la musiche des tôs arpis.

Sot di te si slargje la materie,

i viers a son la tô cuvierte.

12Cemût che tu sês plombât jù dal cîl,

stele de buinore, fi da l’albe!

Cemût che tu sês stât sgnacât par tiere,

tu che tu ur davis la gafe a ducj i popui!

13Epûr tu tu pensavis dentri di te:

O larai sù fintremai tal cîl,

parsore des stelis di Diu

o sistemarai la mê sente.

Mi sentarai su la mont de semblee,

ai confins de tramontane.

14O montarai sui nûi plui alts,

o sarai compagn dal Altissim.

15E invezit tu sês stât sgnacât jù tes inferis,

tes sfondaris dal abìs!

16Ducj chei che ti viodin, ti cjalin fis,

si voltin de tô bande.

Isal chel chi chel ch’al faseve trimâ la tiere

e al faseve scjassâ i reams,

17ch’al à ridusût il mont tun desert,

al à sdrumadis lis sôs citâts,

e no ur à vierzudis lis presons ai siei presonîrs?

18Ducj i rês dai popui,

ducj a polsin cjamâts di glorie

ognidun tal so tombâl;

19tu invezit tu sês stât butât li cence sepulture,

tant che un butul ch’al fâs specie,

cuvierzût di int copade, di int passade fûr par fûr de spade,

butade jù sui claps de buse

tant che une carogne folpeade!

20Tu no tu sarâs cun lôr te sepulture,

parcè che tu âs fiscade la tô tiere,

tu âs massacrât il to popul

La dissendence dai triscj

nissun no le varà plui indiment.

21Prontait il maçalizi pai siei fîs,

par colpe de tristerie dai lôr paris,

no jevaran plui sù par cjapâ il mont

e par taponâ la face de tiere di ruvinis”.

22O jevarai sù jo cuintri di lôr, sentence dal Signôr des schiriis, e o fruçarai di Babilonie il non e il rest, çocje e dissendence, sentence dal Signôr. 23Le fasarai deventâ paronance dal riç, un palût ch’al infete; le netarai vie cu la scove de distruzion, sentence dal Signôr des schiriis.

Cuintri di Assur

24Il Signôr des schiriis al à zurât

disint: “Propit cussì!

Come ch’o ài pensât, cussì al sarà,

e come ch’o ài distinât, cussì al sucedarà.

25O crevarai Assur de mê tiere

e su lis mês monts lu tibiarai.

Il so jôf al sarà tirât vie di lôr,

e la sô cjame e sarà gjavade des lôr spalis”.

26Cheste e je la decision cjapade par dute la tiere

e cheste e je la man slungjade sun ducj i forescj.

27Cuant che il Signôr des schiriis

al cjape une decision,

cui podaràial fermâlu?

E cuant che la sô man e je slungjade,

cui podaràial fâjale tornâ indaûr?

Avîs pe Filistee

28Tal an ch’al è muart il re Acaz e je stade dite cheste sentence:

29“No sta gjoldi, Filistee dute interie,

par vie che la vuiscje che ti pestave e je stade crevade!

Parcè che de lidrîs dal sarpint e vignarà fûr une lipare,

e la sô gjernazie e sarà un dragon ch’al svole.

30I puars a passonaran sui miei prâts

e i misars a polsaran sigûrs,

ma la tô dissendence le fasarai murî di fan

e o coparai ce ch’al reste di te.

31Ciule, puarte; berle, citât,

trime, Filistee dute interie!

Parcè che de tramontane al rive un fum,

e nissun tes sôs schiriis no si piert”.

32Ce rispueste si daràie ai mes de nazion?

“Il Signôr al à fondade Sion

e li di jê a van a parâsi i puars dal popul”.