FI DI SIRAC (45)

Letôr: Adriano Pugnale

Mosè

451E di lui al à fat saltâ fûr un om fedêl

ch’al è stât benviodût di ducj,

benvolût di Diu e dai oms,

Mosè, che la sô memorie ducj le benedissin.

2I à dade une glorie a pâr di chê dai sanz

e la virtût di spaventâ i nemîs.

3Cu la sô peraule al à fat cessâ i spiei;

il Signôr i à dade glorie denant dai res,

i à dâts i comandaments pal so popul,

i à palesade la sô glorie.

4Pe sô fede e umiltât lu à consacrât,

sielginlu a preference di ducj i oms.

5I à fate sintî la sô vôs,

lu à fat jentrâ in tal nûl dut scûr,

i à dâts muse a muse i comandaments,

une leç di vite e di inteligjence,

par che i insegnas a Jacop il pat

e i siei judissis a Israel.

Aron

6Al à puartât in alt Aron, om sant come lui,

so fradi, de tribù di Levi.

7Lu à stabilît tant che un pat par simpri

e i à dât il sacerdozi dal popul.

Lu à onorât cun splendits ornamenz

e lu à riviestût cuntune tonie di glorie.

8Lu à furnît cul onôr plui grant

e lu à incoronât cui segnâi dal podê:

bregons, tonie e manteline.

9I à fat meti a la tonie un ôr di miluçs ingranâz

e picjâ toratôr tancj campaneluts d’aur

ch’a sglinglinavin cuant che al moveve il pas,

par che il sglinghinament sintût tal templi

al fos un reclam pai fîs dal so popul.

10I à fat meti intôr la tonie sante,

lavorade di un ricamadôr

cun aur, jacint e porfiri;

il petorâl dal judissi e i Urim de veretât,

sclarlat filât, vore di artist,

11cun pieris pressiosis, incidudis tant che sigji,

montadis sul aur, vore di un intajadôr,

par ch’a ricuardassin cul scrit incidût

il numar des tribùs di Israel.

12Parsore dal turbant i à metude une corone d’aur

cul segnâl dal sigjl de consacrazion,

segnâl di onôr, vore di restâ,

fate biele par indalegrâ i vôi.

13Robis tant bielis no son stadis prime di lui,

ni un forest nol podarà mai metilis intôr,

fûr dai siei fîs,

dome lôr e i lôr dissendents, par simpri.

14I siei sacrificis a son ufierts a mût di olocaust

ogni dì par dôs voltis, cence mai cessâ.

15Mosè al à jempladis lis sôs mans

e lu à onzût cul vueli sant;

cheste e je stade par lui une aleance eterne,

e ancje pai siei dissendents, fin ch’al dure il cîl:

par che lu servissin e a fasessin i predis,

e tal so non a benedissin il popul.

16Lu à sielzût a preference di ducj i oms

par ufrîi lis primissiis al Signôr,

il memoriâl profumât dal incens,

par ch’al espias a pro dal popul.

17I à consegnâts i siei comandamenz

cu l’autoritât di mandâ fûr sentencis,

par insegnâi a Jacop i siei decrez

e par fâi lûs a Israel in merit de sô leç.

18Cuintri di lui e àn complotât forescj,

in tal desert si son ingjelusîts di lui

chei ch’a jerin cun Datan e cun Abiron

e la clape di Core, dute int scjaldinose.

19Il Signôr al à viodût e si è disdegnât,

a son stâts fiscâts tal impit de sô rabie,

al à fats ancje spiei cuintri di lôr

par arsinîju tal fûc de sô flame.

20Podopo al à reonzude la glorie di Aron

e i à dât un vêr patrimoni:

i à dadis lis primissiis dai prins prodots,

i à sigurât soredut pan tant ch’an’ voleve.

21Par chel a màngjn cui sacrificis dal Signôr,

che lui i à dât a Aron e a la sô dissendence.

22Dome che nol à vude legjtime te tiere dal popul,

no i è tocjade une purizion framieç di lôr,

parcè che al è il Signôr la sô purizion e legjtime.

Finees

23Finees, fi di Eleazar, al à il tierç puest te glorie

parcè che al à vude passion tal timôr dal Signôr

e al à palesât, tal rivolton dal popul,

la bontât e il spirt dal so cûr;

cussì al à podût espiâ a pro di Israel.

24Par chel al è stât stabilît cun lui un pat di pâs,

par ch’al fos lui a indreçâ i sants e il so popul;

cussì e restave cun lui e cu la sô dissendence

l’incariche di prin predi tai secui.

25Pal pat fat cun David,

fî di Jesse de tribù di Gjude,

il ream al passave dal pari a di un sôl fî;

ma la ereditât di Aron e passe

a dute la dissendence.

26Il Signôr che us dedi la sapience dal cûr

par judicâ il so popul cun justissie,

par no ch’a sparissin lis virtûts dai vons

e la lôr glorie e duri tes etis.