FI DI SIRAC (36)

Letôr: Danilo Strizzolo

Prejere par Israel

361Ve’ dûl di nô, Signôr, Diu di dutis lis robis,

e mande la pore di te sun ducj i forescj.

2Alce la tô man cuintri dai popui forescj,

par ch’a viòdin la tô potence.

3Come denant di lôr tu às mostrât in nô la tô santitât,

cussì denant di nô mostre in lôr la tô potence.

4Che ti ricognòssin te come che nô ti vin ricognossût,

parcè che no ’nd’è Diu fûr di te, Signôr.

5Torne a fâ i spiei e ripet i meracui,

dài glorie a la tô man e al to braç gjestri.

6Dismôf la tô rabie e strucje la tô fumate,

fische l’aversari e svinidris il nemî.

7Spessee cui timps e visiti dal zurament,

par che si còntin lis tôs robonis.

8Tal fûc de rabie che si consumi chel ch’al jere stât sparagnât,

chei ch’a maltràtin il to popul ch’a cjàtin la ruvine.

9Fruce i cjâs dai princips forescj

ch’a van disint: “No ’nd’è nissun fûr di nô”.

10Tire dongje dutis lis tribùs di Jacop

e cjape paronance di lôr come par vieri.

11Ve’ dûl, Signôr, dal popul clamât cul to non,

di Israel, che tu t’al sês fat tant che prin fî.

12Ve’ dûl de sitât dal to santuari,

di Gjerusalem, lûc de tô polse.

13Jemple Sion cu la laut des tôs grandis voris

e il to templi cu la tô glorie.

14Ricognos cumò chei che tu às creâts sul imprin

e colme lis professiis ch’a son stadis fatis a non to.

15Dàur la pae a di chei che ti spiètin,

par dâur reson ai tiei profetis.

16Scolte, Signôr, la prejere dai tiei fameis,

pal boncûr che tu às pal to popul.

17Ch’a ricognòssin ducj sore la tiere

che tu, Signôr, tu sês il Diu dai secui.

Sielgi ben

18Il stomi al pare jù ogni mangjative,

ma cualchidune e je miôr di chês âtris.

19Come che il cîl de bocje al sint il savôr dal salvadi,

cussì il cûr ch’al pense al ricognos lis peraulis falsis.

20Il cûr trist al darà dolôr

ma l’om di sperience lu ricambiarà.

La sielte de femine

21La fantate e pò cjoli cualunche om,

ma une maridade no je compagn di un’altre.

22La bielece di une femine e indalegre la muse,

e rive a passâ ogni altre brame dal om.

23Se te sô lenghe e je bontât e gracie,

il so om nol è come chei altris oms.

24Chel ch’al cuiste une femine al scomence la sô furtune,

al à un jutori che i semee e une colone par poiâsi.

25Là ch’e mancje la cise, la robe e je rafade,

cussì là che no ’nd è femine, l’om al torseone e al gem.

26Cui podaraial fidâsi di un soldât torseon,

ch’al passe di une citât in chê altre?

27Cussì e je pal om che nol à un nît

e ch’al va a lozâsi là ch’e rive la gnot.