FI DI SIRAC (16;17)

Letôr: Aldo Di Bernardo

I cjastics di Diu

161No sta bramâ une vore di fîs, se a son par nuje,

e no sta indalegrâti dai fîs ch’a son cence religjon.

2Cuant che a son in tancj, no sta jèssint content,

se no àn intorsi il timôr dal Signôr.

3No sta fâ stât su la lôr zovine etât

e no sta fâ cont sul lôr numar,

parcè che al vâl plui un fi sôl che no mil,

plui murî cence fiolance che cun fîs cence religjon.

4Un sôl, s’al è savi, al tire sù une sitât,

ma une tribù interie di stupits e sarà svinidride.

5Il gno voli and’à viodudis tantis di chestis robis,

e robis inmò plui fuartis lis à sintudis la mê orele.

6Tes cunvignis dai pecjadôrs si impie il fûc

e tal popul cjaviestri si impie la rabie.

7Lui no ur à perdonât ai omenons di une volte

che si son rivoltâts cu la lôr fuarce.

8Nol à sparagnade la gnove patrie di Lot,

al à tacât a odeâju pe lôr rogance.

9Nol à vût dûl di un popul pierdût,

ch’al è stât parât vie pai siei pecjâts,

10ni di siscentmil oms a pît,

ch’a vevin fate traine parvie dal lôr cûr dûr.

11Se ancje al fos un sôl di cjuce dure,

al sares di maraveâsi s’al fos perdonât;

12parcè che in lui and’è boncûr e rabie,

lui al è fuart cuant che al perdone

e cuant che al bute fûr la sô rabie.

13Al è grant tal boncûr

e trement tal cjastic;

al judiche l’om daûr des sôs voris.

14Il pecjadôr nol scjamparà cu la robe rafade

e nancje no restarà deludude la sperance dal bon.

15Al ricognossarà ogni at di boncûr,

ognidun al cjaparà seont lis sôs voris.

Diu al viôt dut

16No sta dî: “Mi platarai lontan dal Signôr!

Lassù cui si visarajal di me?

17Cun tante int no mi ricognossaran,

ce sojo jo in dute la creazion, ch’e je tant grande?”.

18Ve’, il cîl e il cîl dal cîl,

l’abis e la tiere a trìmin cuant che si presente.

19Ancje lis monts e lis fondis de tiere

a trìmin di spavent cuant che lui lis cjale.

20Nol metarajal rifles il cûr sun chestis robis,

nol resonarajal su lis sôs stradis?

21Tant che un burlaç che l’om no lu viôt,

cussì ungrum des sôs voris a son platadis.

22“Cui contarajal lis voris de sô justissie,

e cui lis spietarajal,

se l’aleance e je ancjemò lontane?”.

23L’om ch’al à il cûr meschin le pense cussì,

il mauc al çavarie tes matetâts dal so cûr.

La provedence dal Creadôr

24Scolte, fî, impare a capî,

impegne il to cûr a lis mês peraulis.

25O palesarai cun precision la dutrine,

cun dut il scrupul o contarai la sience.

26Cuant che il Signôr al à creadis lis sôs voris, tal imprin,

dopo di vêlis fatis, ur à metût i lôr confins.

27Al à metût ordin tes sôs voris par simpri,

al à distinade la lôr paronance pes diferentis etis;

no àn fan e no si stràchin,

no sòstin di fâ il lôr lavôr.

28Ognune no trusse chê ch’e je dongje,

no si rivòltin mai a la sô peraule.

29Il Signôr al à ancje cjalade la tiere,

e le à colmade dai siei bens.

30Al à riviestude la sô face cun ducj chei ch’a vìvin,

ch’a varan di tornâ li di jê.

171Il Signôr al à creât l’om de tiere,

e a jê lu fâs tornâ di gnûf.

2I à dât sornadis contadis e timp stabilît,

i à dade paronance sun dut ce ch’e à dentri.

3Ju à riviestûts di une fuarce compagne de sô,

ju à fats seont il so stamp.

4Al à metût il timôr di lui in ogni cjâr,

par che lui al paroni lis bestiis e i ucei.

5Il sintiment, la lenghe, i vôi, lis orelis e il cûr

ur à dât par resonâ.

6Ju à colmâts di sintiment e di inteligjence,

e ur à fat viodi il ben e il mâl.

7Al à metût tai lôr cûrs il so timôr

par mostrâ la grandece des sôs voris.

8A laudaran il so non sant,

par contâ i spetacui des sôs voris.

9Ur à dade l’inteligjence,

ju à furnîts di une leç di vite.

10Al à fat cun lôr un pat par simpri

e ur à fat cognossi i siei judissis.

11I lôr vôi e àn viodût il sflandôr de sô glorie,

la lôr orele e à sintût il spetacul de sô vôs.

12E ur à dit: “Vuardaisi di ogni injustissie”;

e i à ordenât a ognidun di viodi dal prossim.

La ricompense di Diu

13Lis lôr stradis a son simpri denant di lui,

no son platadis pai siei vôi.

14Al à stabilît par ogni popul un sorestant,

ma Israel al è il toc dal Signôr.

15Dutis lis lôr voris a son denant di lui tant che il soreli,

i siei vôi a son simpri su lis lôr stradis.

16Lis lôr tristeriis no i rèstin platadis,

e ducj i lôr pecjâts a son denant dal Signôr.

17Par lui la caritât dal om e je tant che un sigjl,

al ten cont dal ben fat dal om tant che de lûs dai vôi.

18Tal ultim al jevarà sù par dâur la pae,

sul lôr cjâf al fasarà vignî il premi.

19Instes però ur lasse vierte la strade ai pintûz

e a di chei ch’a son malsigûrs ur dà la fuarce di tignî dûr.

Invît a la conversion

20Torne dal Signôr, distachiti dal pecjât,

pree denant di lui, e finissile di ofindi.

21Torne dal Altissim e volte lis spalis a la injustissie:

cîr di odeâ a font ce che lui nol pò nancje nulî.

22Cui laudarajal l’Altissim ta chel âtri mont,

impen dai vîs che i dìsin grassie?

23Pal muart, al è come che nol fos, e finis la laut;

chel ch’al è vîf e san al laude il Signôr.

24Cetant grant ch’al è il boncûr dal Signôr,

e il so perdon par chei ch’a tòrnin di lui!

25Nol pò jessi dut in tai oms,

parcè che un fi dal om nol è inmortâl.

26Ce esal mo plui sflandorôs dal soreli? Ancje lui si scurìs!

Cussì l’om di cjâr e di sanc al imbastis dome mâl.

27Diu al passe in rassegne lis stelis tal plui alt dai cîi,

biel che i oms a son ducj pulvin e tiere.