FI DI SIRAC (10)

Letôr: Luisa Graffitti Osso

101Il judiç savi al ten in regule il so popul,

il guviêr di un savi al sarà ordenât.

2Tâl il judiç dal popul e tâi i siei fameis,

la int de sitât e je sul stamp di chel che le rêç.

3Il re cence regule al sassine il so popul,

e la savietât dai grancj e tire sù la sitât.

Cuintri de supierbie dai sorestanz

4Il guviêr dal mont al è tes mans dal Signôr,

e lui i mande tal moment just l’om ch’al va ben.

5Te man dal Signôr e je la furtune dal om,

al è lui che i dà al scriturist la sô glorie.

6No sta inrabiâti cul prossim pai siei fai,

e no sta fâ nuje mai in at di rabie.

7La supierbie i displâs a Diu e ai oms,

ducj i doi e àn in asse la injustissie.

8Il comant al passe di un popul a chel âtri,

cul imbroi, cu lis grandecis e cu la massepassuderie.

9Parcè mo si ingjalissial chel ch’al è tiere e cinise?

Al è inmò in vite e al bute za fûr i budiei.

10Une brute malatie e rît dal miedi,

chel che vuè al è re doman al mûr.

11Al è chest il distin dal om ch’al mûr:

sarpints, besteatis e viêrs.

12Chel che si slontane di Diu al è su la strade de supierbie,

al slontane il cûr dal creadôr.

13Parcè che la supierbie e scomence cul pecjât,

chel che le à piade al fâs porcariis;

par chel il Signôr ju cjastie cui siei spiei,

ju scjasse fin ch’a son fruçâts.

14Il Signôr al bute jù i princips des sentis

e tal lôr puest al fâs sentâ i bogns di cûr.

15Il Signôr al gjave lis lidrîs dai popui

e al plante i piçui tal lôr puest.

16Il Signôr al fische lis tieris dai popui

e lis svinidris fint a lis fondis;

17al peste certs oms e ju pare in fruç,

al scancele de tiere il lôr ricuart.

18La supierbie no je stade creade pai oms,

e nancje la rogance pai nassûts de femine.

Cariere politiche e timôr dal Signôr

19And’ese une gjernassie ch’e merte onôr? I oms.

And’ese une gjernassie ch’e merte onôr?

Chei ch’a àn timôr dal Signôr.

20And’ese une gjernassie ch’e merte svilanade? I oms.

And’ese une gjernassie ch’e merte svilanade?

Chei ch’a van cuintri de leç.

21Fra fradis al à onôr chel ch’al comande,

ma ai vôi dal Signôr chei che lu tèmin.

22Tant un siôr e un grant che un puar

al pò tignîsi in bon dal timôr dal Signôr.

23Nol è just spreseâ il puar ch’al à sintiment,

come che nol è ben fâi plait al pecjadôr.

24Princip, judiç, potent: ancje se onorâts,

a son mancul di chel ch’al tem il Signôr.

25I oms libars a servissaran il sclâf savi,

e chel ch’al à sintiment nol protestarà.

Cuintri des pratesis inutilis

26No sta fâ il saveon cuant che tu sês daûr a fâ il to mistîr,

e no sta sintîti grant cuant che tu sês te streme.

27Al vâl plui lavorâ e vê bondance di dut

che no torseonâ cun mafie e cence pan.

28Fî, viôt di jessi modest e pense al to onôr,

fasiti valê daûr dal to merit.

29Cui comedarajal il mâl che un si fâs dibessôl

e cui lu onorarajal se lui si disonore?

30Il puar si fasarà onôr cu la savietât

e il siôr si fasarà onôr cu la ricjece.

31L’onôr dal puar al cressarà cu la ricjece,

ma la sblefade dal siôr

e cressarà cu la miserie.