FI DI SIRAC (2;3)

Letôr: Lauro Dri

Passience e fidance in te prove

21Fî, se tu às chê di servî il Signôr

prepare il to cûr a la prove;

2ten pront il to cûr, fasiti fuart,

no sta vê presse tal timp de disgracie;

3peiti tôr di lui e no sta slontanâti,

par che a la fin tu gjoldis te bondance.

4Cjape dut ce che ti plombe intôr

e tai câs plui grivis ten dûr:

5come che l’aur si spurghe tal fûc,

cussì i elets tes boris dal dolôr.

6Sta fidât sun lui, lui ti judarà,

drece lis tôs stradis e spere in lui.

7Vuâtris ch’o temeis il Signôr, spietait il so boncûr,

no stait a straviâ, par no colâ.

8Vuâtris ch’o temeis il Signôr, fidaisi di lui,

parcè che no us mancjarà la sô pae.

9Vuâtris ch’o temeis il Signôr, sperait tai siei bens,

te gjonde ch’e dure e tal so boncûr.

10Pensait a lis etis di un volte e faseit câs:

cui mai si esal fidât dal Signôr e esal restât malapajât?

cui àjal tignût dûr tal so timôr e esal stât bandonât?

cui lu àjal clamât e lui nol à sintût?

11Parcè che il Signôr al è plen di dûl e di boncûr,

al perdone i pecjâts e al salve tal timp de tribulazion.

12Puars mai lôr i cûrs spaurôs e lis mans che si làssin lâ,

il pecjadôr ch’al va indenant par doi trois.

13Puar mai lui il cûr ch’al mole e che nol crôt,

parcè che nol varà chel che lu pare.

14Puars mai vuâtris ch’o veis pierdude la vuestre tignince:

ce fasareiso mo te visite dal Signôr?

15Chei ch’a tèmin il Signôr no son malfidents cu lis sôs peraulis,

e chei che i vuelin ben a bàtin lis sôs stradis.

16Chei ch’a tèmin il Signôr a cìrin di plasêj,

e chei che i vuelin ben a mètin in vore la sô leç.

17Chei ch’a tèmin il Signôr a tegnin il lôr cûr pront

e si sbàssin denant di lui.

18Butinsi tes mans dal Signôr e no tes mans dai oms,

parcè che tâl e je la sô grandece e tâl al è il so boncûr.

Onore il pari e la mari

31Fîs, scoltait la racomandazion dal pari,

meteile in vore s’o voleis jessi salfs:

2il Signôr al ûl che il pari al sedi onorât dai fîs,

al à imponût sui fîs il dirit de mari.

3Chel ch’al rispiete il pari al pare jù i pecjâz

4e chel ch’al onore la mari al ingrume tesaurs.

5Chel ch’al rispiete il pari al varà gjonde dai fîs

e te dì de sô prejere al sarà scoltât.

6Chel ch’al onore il pari al varà vite lungje,

chel ch’al ubidis il Signôr al console la mari.

7Chel ch’al tem il Signôr al onore so pari

e al servis i gjenitôrs tant che parons.

8Onore to pari cu lis voris e cu la peraule,

par ch’e passi sun te la sô benedizion:

9la benedizion dal pari e rinfuartis lis cjasis dai fîs,

la maludizion de mari ur svinidris lis fondis.

10No tu puedis tignîti in bon se to pari al è tal disonôr,

la sô vergogne no je par te une glorie:

11e je glorie par un om la reputazion dal pari

e e je une vergogne pai fîs la mari cjacarade.

12Fî, viôt dal pari cuant che al è vieli

e no sta dâi displasês fin ch’al è in vite;

13ancje s’al piert il sintiment, compatissilu,

no sta spreseâlu dome parcè che tu sês tal colm de vigorie.

14La compassion pal pari no sarà dismenteade,

e sarà un tesaur par parâ jù i pecjâz;

15te dì de tô tribulazion e sarà ricuardade,

e tant che gilugne sot dal soreli si disfasaran i tiei pecjâts.

16Bandonâ il pari al è tant che blestemâ,

il Signôr al maludis chel ch’al fâs inrabiâ la mari.

Umiltât e supierbie

17Fî, fâs lis tôs voris cun modestie,

parcè che ti volaran plui ben a ti che no a di chel ch’al fâs regâi.

18Plui grant tu sês e plui tu às di sbassâti,

cussì tu cjatarâs gracie denant dal Signôr.

19Parcè che la potence dal Signôr e je grande,

20lui al cjape glorie dai piçui.

21No sta cirî robis masse dificilis,

e no sta lâ a sgarfâ in chês masse intrigosis;

22met rifles su lis robis comandadis,

parcè che no ti covèntin chês platadis.

23No sta pierditi daprûf di ce ch’al è plui grant di te,

parcè che ti è stât pandût ce ch’al è plui in alt dal cjâf dal om.

24Difat la presunzion e à imbrojâts ungrum di lôr,

e la false inlusion e à ingjanade la lôr inteligjence.

25Il cûr indurît al fasarà une brute fin,

e chel ch’al ame il pericul si pierdarà li dentri.

26Il cûr indurît al sarà cjamât di fastidis,

e il pecjadôr al zontarà pecjât a pecjât.

27Pe disgracie dal supierbeôs no ’nd’è rimiedi,

parcè che la plante dal mâl e à metudis lis lidrîs dentri di lui.

28Il cûr dal savi al pense su lis parabulis,

une orele atente, chê e je la sô brame.

Judâ i puars

29L’aghe e distude il fûc ch’al art,

cussì la caritât e pare jù i pecjâts.

30Chel ch’al rispuint cul ben al è ricuardât ancje dopo,

e cuant che al colarà lu tiraran sù.