SAPIENCE (15)

Letôr: Fabiola Venier

Invocazion

151Ma tu, Diu nestri, tu sês bon e fedêl,

tu stentis a inrabiâti e tu regis ogni robe cun boncûr.

2Se ancje o pecjn, o sin tiei,

parceche o ricognossìn la tô potence,

ma no pecjarìn, savint ch’o sin tiei.

3Cognossiti te, difat, al è il colm de justissie

e ricognossi la tô justissie e je la lidrîs de inmortalitât.

4No nus à fats straviâ la orende invenzion dai oms,

ni la fadie dai pitôrs, che no coventave,

figuris pastrocjadis cun colôrs di ogni sorte,

5che, dome a viodilis, a invòin la brame dal basoâl

e a fàsin vê gole di une litrat cence vite

di une inmagjine muarte.

6Amants dal mâl e degns di sperancis di chê fate

a son chei che lis fàsin, che lis bràmin e che lis onòrin.

Lis inmagjinis d’argile

7Un vasâr, impastant a sun di vitis l’argile mulisite,

al dà dongje pal nestri consum ogni sorte di creps.

Ma cul stes paltan ur dà il stamp

tant ai creps distinâts a servissis decenz

che a chei contrârs, ducj tal stes mût;

ce ch’e àn di servî podopo ognun di lôr,

lu distine il vasâr.

8De stesse argile, cun fadie ch’e puarte damp,

al polee une divinitât cence tignince,

lui che, nassût che nol è trop de tiere,

in curt al tornarà là dontri ch’al è stât tirât fûr,

cuanche j sarà domandât di rispuindi de anime.

9Ma lui no si scompon di scugnî murî in curt,

e nancje di vê une vite curte;

che ansit al fâs lis garis cun chei ch’a lavòrin l’aur e l’arint,

al va daûr di chei ch’a lavòrin il brons

e si ten in bon di dâur il stamp a robis matis.

10Pulvin al è il so cûr, la sô sperance e vâl mancul de tiere

e la sô vite e je plui misare de argile,

11parceche nol cognos chel che lu à poleât,

che j à soflade un’anime vivarose

e che j à metût intôr un spirt di vite.

12Ma al à calcolade la nestre vite un mateç di fruz

e l’esistence un marcjât ch’al bute.

Al dîs: “Di ogni bande, ancje dal mâl,

si à di vuadagnâ”.

13Difat lui al sa di pecjâ plui di ducj,

fasint cun matereâl di tiere creps che si ròmpin e idui.

Conclusion

14Ma di ducj, plui storlocs

e plui indaûr che no l’anime di un canai,

a son i nemîs dal to popul, che lu àn tibiât,

15parceche e àn considerâts dius ancje ducj i idui dai forescj,

che no puedin ni doprâ i vôi par viodi,

ni lis narilis par tirâ dentri il flât,

ni lis orelis par sintî,

ni i dêts des mans pal palpâ

e che i lôr pîs no son bogns di lâ indenant.

16Ju à fats un om

e ju à poleâts chel ch’al à vût ancje lui il spirt ad imprest:

difat nissun om nol pò dâ dongje un diu che j semei.

17Jessint mortâl, cun mans sacrilighis

al dà dongje une robe muarte:

al è miei lui che no i siei idui,

parceche lui al à vivût e lôr nancje par idee.

SECONT CONFRONT (al finis)

I nemâi: cjastic e benefissi

18Ma lôr a onòrin ancje lis bestiis plui orendis,

che par stupiditât a son piês, a confront di chês altris;

19no son tant bielis di sintîsi invoâts,

come ch’al sucêt cjalant chei altris nemâi,

e no àn vude ni laut ni benedizion di Diu.