SAPIENCE (13)

Letôr: Samuele Rota

Seconde digression

Matetât de idolatrie.

1. La religjon dal mont naturâl

131A son mo un nuje par nature ducj i oms

che no cognòssin Diu

e che dai bens che si viodiju no son stâts bogns

di cognossi chel ch’al è,

e nancje, resonant su lis voris,

no àn savût ricognossi chel che lis à fatis,

2ma o il fûc o l’ajar o la bueresine

o la volte des stelis o l’aghe viamente

o i lusôrs dal cîl ju àn spaçâts par dius, parons dal mont.

3Se, incantesemâts de lôr bielece,

e àn ritignûts dius chestis robis,

ch’a pènsin cetant plui grant di lôr ch’al è il Signôr,

parceche chel che ju à creâz

al è la risultive stesse de bielece.

4Se a son restâts scaturîts pe lôr fuarce e pe lôr vigorie,

ch’a ricognòssin cetant plui fuart di lôr

ch’al è chel che lis à dadis dongje.

5Difat de grandece e de bielece des creaturis,

resonant, si pò cognossi chel che lis à fatis.

6Instes però no si à di cridâur masse,

parceche salacôr lôr si imbròin

biel ch’a cìrin e ch’a vuelin cjatâ Diu.

7Vivint framieç des sôs voris, a cìrin

e si làssin cjapâ de parvence,

parceche al è biel ce che si viôt.

8Ma nancje lôr mo no àn scusis;

9parceche s’e àn rivât a cognossi tant,

di podê cjalâ a font il cors dal mont,

cemût mai che no àn cjatât plui a la svelte il lôr Signôr?

2. La religjon dai idui

Jentrade

10Disgraciâts ancje chei ch’a pòin

lis lôr sperancis in robis muartis,

chei ch’e àn clamât dius lis voris des mans dai oms,

aur e arint, lavorâts cun mistîr,

inmagjinis di nemâi

o une piere cence virtût, vore di man antighe.

Lis inmagjinis sculpidis

11Ve’ che un marangon

al à tajât un arbul di chei ch’a van ben di lavorâju;

al à tirade vie cun ingegn dute la scuarce,

le à lavorade come cu va

e al à fat parie un alc di podê doprâlu te vite,

12biel ch’al à brusât ce che j è vansât de vore

par prontâsi la bocjade e par passisi.

13Ce ch’al è vansât e che no si podeve fânt nuje,

un toc di len dut stuart e gropolôs,

lui lu à cjolt e lu à intajât cun passion par passâ il timp,

e, cence nancje pensâ, cun calme j à dât une sagume,

lu à lavorât sul stamp di un om,

14o ben lu à fat che j semei a cualchi nemâl che nol vâl nuje;

lu a vernisât cul minio e piturât di ros parsorevie,

fasint sparî dutis lis taculis;

15j à fate une nicje degne di lui

e lu à sistemât tal mûr, siguranlu cul fiêr.

16Par no ch’al coli, al à pensât ancje a chel,

savint che nol rive a judâsi dibessôl:

difat e je une inmagjine e j covente jutori.

17Preant pe robe,

pes gnocis e pai fîs,

no si vergogne pêl a fevelâj a di une robe cence vite;

pe salût al pree ce ch’al è flap,

18pe vite al pree ce ch’al è muart,

par un jutori al supliche ce ch’al à mancul esperience,

par un viaç chel che nol pò doprâ nancje i siei pîs,

19par un vuadagn, par un dafâ e pal bon esit di un afâr

j domande vigorie a di chel che nol à fuarce tes mans.