SAPIENCE (3;4)

Letôr: Ornella Baiutti

Il tribulâ dal just e il gjoldi dal trist

31Lis animis dai juscj, invessit, a son tes mans di Diu

e nissun torment no lis tocjarà.

2Ai vôi dai stupits al à semeât ch’a murissin,

il lôr distacâsi di nô al à parût une disgracie,

3e il lôr viaç lontan di nô une ruvine,

ma lôr a son te pâs.

4Ancje se ai vôi dai oms a son cjastiâts,

la lôr sperance e je incolme di inmortalitât.

5Dopo di un curt patî, a varan une grande ricompense,

parceche Diu ju à provâz

e ju à cjatâts degns di sè;

6ju à stazâts tanche aur tal crosul

e ju à vûts agrât tanche un olocaust.

7Tal timp ch’al vignarà a cjatâju a splendaran

e tanche lusignis tal stranc a coraran.

8A rezaran i forescj e a varan podê sui popui

e il Signôr al sarà il lôr re par simpri.

9Chei ch’a stan fidâts sun lui a capissaran la veretât

e chei ch’a son fedêi a vivaran dongje di lui tal amôr,

parceche gracie e boncûr a son pai siei elez.

10I triscj, invessit, a varan il cjastic daûr di ce ch’a pènsin,

lôr che no àn bassilât pal just

e che si son slontanâts dal Signôr.

11Chel ch’al sbelee la sapience e la regule nol à furtune,

al spere ma dibant, e si strussie cence costrut

e lis sôs voris no servissin a nuje.

12Lis lôr feminis a son cence dret, triscj i lôr fîs,

maludide la lôr gjernazie.

La sterilitât dal just e la feconditât dai triscj

13Furtunade la sterpe che no je stade sporcjade,

che no à cognossude union intal pecjât,

parceche e racuejarà cuanche lis animis a saran visitadis.

14(Furtunât) ancje il cjastrât,

che nol à fatis robatis cu lis mans,

e nol à vûts pinsirats triscj cuintri dal Signôr;

a lui, pe sô fedeltât, j sarà dade une gracie a part

e un distin unevore biel tal templi dal Signôr.

15Parceche la ricompense des buinis oparis e je plene di glorie

e la lidrîs dal sintiment no pò secjâsi.

16Invessit i fîs dai adultars a restaràn malmadûrs

e la semence di une union fûr de leç e sarà svinidiride.

17Ancje s’a varàn une vite lungje, no saran calcolâts in nuje,

e tal ultim la lôr vecjae no varà ombre di onôr.

18Se po a muraran adore, no varan sperance,

ni confuart te dì dal judissi,

19parceche la fin di une gjernazie triste e je tremende.

41Miei restâ cence fîs e vê l’onestât,

parceche il so ricuart nol mûr par mai:

e je ricognossude di Diu e dai oms.

2Cuanche e jè, j van daûrj; cuanche no je plui, le vàin,

e te eternitât e trionfe cun tant di corone,

parceche e à vinçude la gare

dai combatiments cence magle.

3Ma la sdrume cence fin dai triscj no servissarà a nuje;

nassude di menadis bastardis, no metarà lidrîs in sot

e nancje no cjatarà une fonde ch’e tegni.

4Ancje se par un trat di timp e butule intai ramaçs,

sint balarine, e sarà scjassade dal ajar

e a sarà dislidrisade de viamence dal burlaç.

5I ramaçuts, ancjemò tenars, a saran screvaçâts,

lis lôr pomis no valaran nuje,

masse malmaduris par jessi mangjadis,

di no podê doprâlis in niò.

6Difat i fîs nassûts di unions fûr de leç

a son testemonis de tristerie dai gjenitôrs

cuanche a saran interpelâz.

Il just ch’al mûr prin da l’ore

7Il just, ancje s’al mûr prin da l’ore, al cjatarà pâs.

8Difat une vecjae di rispiet no je tal vivi a lunc

e nancje no si misurile cul numar dai agns,

9ma cjavei blancs, pai oms, al è il sintiment

e une etât indenant e je une vite cence magle.

10Deventât cjâr a Diu, lui j à volût ben,

e stant ch’al viveve framieç dai pecjadôrs

al è stât puartât di un’altre bande.

11Al è stât puartât vie par no che la tristerie e mudas il so cûr

o l’ingjan nol imbrojas la sô anime,

12parceche la golositât dal vissi e scurìs il ben

e il gorc de passion al glot un cûr cence malicie.

13Rivât in pôc timp a la perfezion,

al à fate une lungje strade.

14La sô anime Diu le veve a grât,

par chel al à spesseât a tirâle vie dal mâl.

I popui a viòdin ma cence capî

e cence meti rifles sul fat

15che gracie e boncûr a son pai siei elez

e che Diu al ten cont dai siei sanz.

16Il just, murint, al condane i triscj restâts in vite

e une zoventût rivade in pôc timp a la perfezion

e condane la lungje vecjae dal trist.

17La pluritât a viodaran la fin dal savi,

ma no rivaran a capî

cuale ch’e jere la volontât di Diu sun lui

e la reson che il Signôr lu à metût tun puest sigûr.

18A viodaran e a spresearan;

ma il Signôr al ridarà di lôr.

19Tal ultim a deventaran un cadavar cence onôr

e une vergogne framieç dai muarts par simpri:

Diu ju sgnacarà par tiere cence ch’a puedin dî verbo,

ju scjassarà des fondis,

a saran svinidrîts cence remission,

a saran tes penis

e il lôr ricuart al sparissarà.

Distin dal just e dal trist tal judissi finâl

20Si presentaran cjamâts di pore a rispuindi dai lôr pecjâz

e lis lôr inicuitâts a saran li, cuintri di lôr, par incolpâju.