PROVERBIS (23)

Letôr: Walter Pianta

231Se tu sês sentât a la taule di un sorestant,

viôt di stâ atent a cui che tu às denant;

2e met un curtìs al to cuel,

se tu sês un ch’al à cetant pitic.

3No sta golâ lis sôs pietancis finis,

ch’a saressin par te un mangjâ d’ingjan.

4No sta bassilâ par deventâ siôr,

pare vie dal to cjâf chel pinsîr;

5tu butis li i tiei vôi

e nol è plui,

parcè che si fâs fâ lis alis,

tanche l’acuile ch’e svole viers dal cîl.

6No sta mangjâ il pan di un om trist

e no sta golâ lis sôs pietancis finis;

7parcè che lui al è precîs di ce ch’al pense:

“Mangje e bêf!” ti dîs,

ma il so cûr nol è cun te;

8la bocjade che tu mangjs, tu le gomitarâs

e tu pierdarâs il prodot dai tiei biei discors.

9No sta fevelâ tes orelis di un stupit;

al sbelearès i tiei discors savis.

10No sta spostâ il confin de vedue

e no sta meti pît tal cjamp dai vuarfins;

11parcè che chel che ju pare al è potent

e al difindarà cuintri di te la lôr cause.

12Impegne il to cûr te istruzion

e la tô orele tes peraulis de sience.

13No sta dineâj al zovin la corezion;

se tu j petis cul baston, nol murarà.

14Tu alore dâj jù cul baston

e tu lu liberarâs di chel altri mont.

15Fî gno, se il to cûr al è savi,

si indalegrarà ancje il gno cûr;

16a gjoldaran lis mês vissaris

se i tiei lavris a disaran robis justis.

17Il to cûr nol à di invidiâ i pecjadôrs,

ma al à di stâ ogni dì tal timôr dal Signôr.

18Parcè che di sigûr tu varâs un doman

e la tô sperance no sarà deludude.

19Fî gno, scolte e ve’ sintiment

e indrece il to cûr pe strade drete.

20No sta stâ framieç dai cjochelis,

ni framieç di chei che si sglònfin di cjâr;

21parcè che il cjochele e il mangjon al devente puar

e il durmion si vistis di catans.

22Scolte to pari che ti à dade la vite,

no sta spreseâ tô mari, ancje s’e je viele.

23Compre la veretât e no sta tornâle a vendi;

sapience, regule e inteligjence.

24Il pari dal just al è dut content

e chel ch’al à gjenerât un savi al è in gjonde.

25Che s’indalegri par te to pari,

ch’e gjoldi chê che ti à dade la vite.

26Dàmi, fi gno, il to cûr,

i tiei vôi che si consòlin cu lis mês stradis.

27Parcè che la sdrondine e je une busate fonde

e un poç stret e je la femine di chei altris.

28Propit come un lari e sta postade,

e moltipliche fra i oms i traditôrs.

29Par cui i “Joi!”, par cui i “Puar mai me!”?

Par cui lis barufis, par cui i lamenz?

Par cui lis feridis a stupit vie? Par cui i vôi inturgulâz?

30Par chel ch’al sgnotole par colpe dal vin,

par chel ch’al va a cirî vin dal plui bon.

31No sta cjalâ il vin, parcè che al è ros,

al mostre il so sflandôr in te tace,

e al va jù cussì di gust!

32Podopo tal ultim al muart tanche un sarpint

e tanche une lipare al invelegne.

33I tiei vôi a viodaran robis straniis

e il to cûr al disarà robis fûr di plomp.

34Tu sarâs tanche un ch’al è distirât tal mieç dal mâr,

tanche un sentât sul arbul plui grant:

35“Mi àn pestât! Ma jo no sint nuje!

Mi àn pacât! Ma no mi soi inacuart!

Cuant mi svearajo mo? An’ domandarai inmò!”.