PROVERBIS (2;3)

Letôr: Margherita Picco

Il Signôr par chel ch’al cîr la sapience

21Fî gno, se tu acetarâs lis mês peraulis

e i miei comandaments tu ju tignarâs dongje di te,

2slungjant la tô orele viers de sapience

tu plearâs il to cûr viers de inteligjence,

3ansit se tu fasarâs ricors al sintiment,

berlant viers de savietât;

4se tu larâs a cirîle tanche l’arint

e tanche un tesaur tu le larâs sgarfant;

5alore tu scuvierzarâs il timôr dal Signôr

e tu cjatarâs la sience di Diu.

6Pardabon al è propit il Signôr ch’al dà la sapience

de sô bocje a vegnin sience e inteligjence.

7Lui al ten di bande il so jutori pai jusc’,

scût par chel ch’al va indenant cun dretece.

8Vuardant lis stradis de justissie

al ten di voli il troi dai siei amîs.

9Alore tu capissarâs la justissie e la dretece,

l’ecuilibri e dutis lis stradis de contentece.

I vantaçs de sapience

10Cuanche la sapience e sarà jentrade tal to cûr

e il savê al varà racreade la tô anime,

11la prudence e veglarà parsore di te

e la savietât ti tignarà vuardât,

12slontananti de strade dal mâl,

dal om ch’al à dome pinsirats trisc’,

13di chei ch’a bandònin lis stradis dretis

par butâsi tes stradis scuris,

14che si consòlin a fâ mâl,

ch’a gjòldin des tristeriis dal mâl,

15ch’a stravìin tes lôr stradis,

ch’a sgàrin tai lôr trois.

16Ti gjavarà de femine di chei altris,

de foreste ch’e sa doprâ peraulis dolcis,

17ch’e à bandonât il compagn de sô zoventût

e ch’e à dismenteât il pat dal so Diu.

18La sô cjase e va propit viers de muart

e i siei trois viers des ombris.

19Chel che si invie de sô bande nol torne indaûr

e nol rive par mai tai trois de vite.

20Cussì tu larâs indenant pe strade dai bogns

e tu tignarâs cont dai trois dai jusc’.

21Pardabon i drets a vivaran in te tiere,

e li a saran lassâts i monçs.

22Invessit i trisc’ a saran menâts vie

e chei che no son di peraule a saran svinidrîçs.

Bogns conseis di un pari

31Fî gno, no sta dismenteâ il gno insegnament

e il to cûr ch’al tegni cont dai miei precets,

2parcè che cu la lungjece dai dîs e dai agns de vite

ti puàrtin furtune.

3L’amôr e la fedeltât che no ti bandònin mai!

Peiju tor dal to cuel,

scriviju su la breute dal tô cûr.

4Tu cjatarâs gracie e furtune

denant di Diu e dal om.

5Fiditi dal Signôr cun dut il cûr

e no sta pojâti sul to sintiment.

6Tenlu denant di te in dutis lis tôs stradis

e lui al splanarà i tiei trois.

7No sta crodi par mai di jessi savi!

Viôt di vê timôr dal Signôr e sta lontan dal mâl.

8Al sarà une midisine pal to cuarp,

un racreâsi pai tiei vues.

9Onore il Signôr cui tiei bens

e cu lis primissiis di dut ce che tu às.

10I tiei cjasc’ a saran incolms di forment,

i tiei brantiei a stranfaran di most.

11No sta spreseâ la corezion dal Signôr

e cuanche ti rimprovere no sta metiti cuintri,

12parcè che lui al rimprovere chel che j ûl ben

come un pari cul fi ch’al preferis.

Lis furtunis dal savi

13Furtunât l’om ch’al à cjatade la sapience,

l’om che si è intivât tal sintiment.

14Parcè che il so vuadagn al è miôr di chel dal arint

e ce ch’al bute al vâl plui che no l’aur.

15E je plui pressiose che no lis perlis

e dut ce che tu puedis bramâ no j sta a pâr.

16Lungjece di dîs e je te sô gjestre

e te sô çampe ricjece e onôr.

17Lis sôs stradis a son gjoldibilis

e duc’ i siei trois a son di pâs.

18Arbul di vite par chel che le à grampade

e chei che le tègnin strente a son furtunâçs.

19Il Signôr al à fondade la tiere cu la sapience

e al ten sù i cîi cu l’inteligjence.

20Midiant dal so savê si son spalancâts i abis

e i nûi a àn lassade gotâ la rosade.

Altris bens de sapience

21Fî gno, che no si slontànin mai dai tiei vôi,

ma ten cont de prudence e dal sintiment.

22A saran vite pe tô anime,

furniment pal to cuel.

23Alore tu larâs indenant sigûr pe tô strade

e il to pît nol cloparà.

24Cuanche tu ti distirarâs no tu varâs pore;

tu larâs a durmî e il to sium al sarà dolç.

25No sta vê pore di un spavent ch’al rive a colp,

ni dal burlaç dai trisc’ cuanche si sdongje;

26parcè che il Signôr al sarà il to ripâr,

al vuardarà il to pît dal laç.

Dovês viers dal prossim

27No sta dineâj un plasê a di chel che t’al domande,

cuanche la tô man e à la pussibilitât di fâlu.

28No sta dîj al to prossim: “Va e torne a passâ!

T’al darai doman!”, cuanche tu lu às.

29No sta furducjâ par fâj mâl al to prossim

cuanche lui si sint sigûr cun te.

30No sta cavilâ cun tun altri cence un parcè,

co no ti à fat nuie di mâl.

31No sta vê invidie dal prepotent

e no sta sielgi nissun dai siei trois.

32Parcè che il Signôr al à riviel dal trist

ma ai oms onesc’ lui ur fâs plait.

33La maludizion dal Signôr su la cjase dal trist,

e invessit al benedis la cjase dai jusc’.

34Ai malcustumâts ur rispuint cun rabie,

ai puars invessit ur dà la gracie.

35I savis a varan simpri onôr,

cu la cuâl che i matucei a varan vergogne.