SALMS (146;147;148;149;150)

Letôr: Giuliana Biasizzo

146 (145) Il Diu di Jacop no ur dinee la sô providence ai puars

1Aleluia.

Anime mê, laude il Signôr.

2O laudarai il Signôr par dute la mê vite,

fin ch’o tirarai flât i cjantarai al gno Diu.

3Sore dai potents no sta fidâti,

suntun fi di om che nol pò salvâti.

4Al dà l’ultin respîr e al torne te tiere:

in chê dì ducj i siei progjets si sfantin.

5Furtunât chel che tal Diu di Jacop al à un jutori,

ch’al à une sperance tal Signôr so Diu.

6Lui al à fat i cîi e la tiere,

il mâr cun dut ce ch’al à dentri.

Al manten la sô fedeltât par simpri.

7Ur fâs justizie ai tibiâts,

ur dà il pan a di chei ch’a son afamâts.

Il Signôr i presonîrs al libere.

8I vôi dai vuarps il Signôr al torne a viergi,

il Signôr al torne a tirâ sù chei ch’a son par tiere,

il Signôr i vûl ben a la int juste,

9il Signôr al vuarde la int foreste,

al viôt dal vuarfin e de vedue,

impen che lis trainis dai triscj lis savolte.

10Il Signôr al regnarà par simpri:

il to Diu, Sion, di ete in ete.

147 (146-147) La peraule di Diu e pò dut par chei che lu temin

1Aleluia.

Al è biel cjantâi al nestri Diu;

al è propit dolç dâi sù la laude.

2Il Signôr al torne a fâ sù Gjerusalem,

al tire dongje i fîs di Israel sparniçâts su la tiere.

3Chei ch’a àn il cûr crevât lui ju risane

e al medee dutis lis lôr feridis.

4Lui al conte il numar des stelis,

par non une par une lis clame.

5Grant al è il nestri Diu

e cence confin la sô potence;

ce ch’al sa lui nissun nol pò calcolâlu.

6Il Signôr al ten sù i piçui,

ma i triscj ju sdrume fin par tiere.

7Cun cjantis di agrât cjantait al Signôr,

cu la citare cjantait pal nestri Diu.

8Lui al cuvierç il cîl di nûi,

al prepare la ploe pe tiere,

su pes monts al fâs menâ la jerbe.

9Ur dà la bocjade a lis bestiis,

ai piçui dal corvat che viers di lui a piulin.

10Daûr de vigorie dal cjaval nol bacile

e nancje pes gjambis dal om nol bacile.

11Lui al preferìs chei che lu rispietin,

chei ch’a stan fidâts sul so boncûr.

12Gjerusalem, dài glorie al Signôr,

Sion, laude il to Diu;

13parcè che al à rinfuarçâts i clostris des tôs puartis,

al à benedît i tiei fîs dentri vie.

14Tai tiei confins lui al à metude pâs,

cu la flôr dal forment ti sostente.

15Al mande su la tiere i siei ordins,

e cor biel svelte la sô peraule.

16Al fâs colâ la nêf tant che la lane,

al sparnice la gilugne come cinise.

17Al mole jù come fruçons la tampieste;

de sô glace a sborfin fûr lis aghis.

18Al mande la sô peraule e lis disfe,

al fâs svintâ il so flât e lôr a scorin.

19I conte a Jacop la sô peraule,

a Israel i siei decrets e lis sôs sentencis.

20Chest no lu à fat cun nissun altri popul,

a nissun di lôr no ur à pandûts i siei judizis.

Aleluia.

148 I cîi e la tiere a laudin la maiestât universâl dal non dal Signôr

1Aleluia.

Laudait il Signôr dai cîi,

laudaitlu des sôs altecis.

2Laudaitlu, ducj vualtris siei agnui,

laudaitlu, dutis vualtris sôs schiriis.

3Laudaitlu, soreli e lune,

laudaitlu, dutis vualtris stelis lusintis.

4Laudaitlu, cîi dai cîi,

e vualtris aghis ch’o sês parsore dai cîi.

5Ch’a laudin il non dal Signôr,

parcè che al à dât ordin e a son stâts creâts;

6ju à metûts li in eterni, par simpri,

al à dade une leç che no passarà par mai.

7Laudait il Signôr de tiere,

vualtris besteonis dal mâr e ducj i abìs;

8fûc e tampieste, nêf e fumate,

aiar di burlaç ch’al ubidìs ai siei ordins.

9Vualtris monts cun ogni sorte di culinis,

arbui di pomis e cedris ducj vualtris.

10Vualtris bestiis dal bosc e ogni sorte di nemâi,

nemâi che si strissinin e ucei ch’a svualin.

11Rês de tiere e ducj vualtris popui,

princips e ducj vualtris judiçs de tiere.

12Fantats e fantatis,

viei e canais

13ch’a laudin il non dal Signôr:

parcè che al è grant dome il so non e vonde,

la sô glorie e je su la tiere e là sù tai cîi.

14Lui al à fate cressi la fuarce dal so popul.

Che lu laudin ducj i siei fedêi,

i fîs di Israel, popul che i è dongje.

Aleluia.

149 Vitorie finâl di Diu e dal so popul sun ducj i nemîs

1Aleluia.

Dait sù pal Signôr une cjante gnove:

che la sô laut te semblee dai fedêi si sinti.

2Israel tal so creadôr si indalegri,

ch’a gjoldin tal lôr Re i fîs di Sion.

3Ch’a laudin il so non cun tant di danze,

che i cjantin a sun di tamburel e citare;

4parcè che il Signôr al è content dal so popul,

ai piçui ur dà la zoe de vitorie.

5Ch’a gjoldin i fedêi te sô glorie,

ch’a fasin sagre seont lis lôr fameis:

6lis lauts di Diu su la lôr bocje

e inte lôr man la spade a dopli tai,

7par svindicâsi framieç de int foreste,

par cjastiâ ducj i popui;

8par peâ i lôr sorestants cu lis cjadenis

e i lôr plui grancj tal fier des smuarsis,

9par meti in vore sun lôr la sentence za scrite:

chest al è un onôr par ducj i siei fedêi.

Aleluia.

150 L’Aleluia finâl

1Aleluia.

Laudait Idiu dal so santuari,

laudaitlu tal firmament de sô potence.

2Laudaitlu pes grandis robis ch’al à fatis,

laudaitlu pe sô grandece inmense.

3Laudaitlu sunant la trombe,

laudaitlu cun arpe e citare.

4Laudaitlu cul tamburel e cu la danze,

laudaitlu su lis pivetis e su lis cuardis.

5Laudaitlu sdrissant lis covertoriis,

laudaitlu cun covertoriis sunsurosis.

6Dut ce ch’al respire

ch’al laudi il Signôr.

Aleluia.