SALMS (114;115;116)

Letôr: Stefania Dereani

114 (113a) L’Esodo, manifestazion sflandorose dal Diu di Israel

1Cuant che Israel dal Egjit al è jessût,

la famee di Jacop di une int foreste,

2Gjude al è deventât il so santuari,

Israel la tiere de sô paronance.

3Il mâr al è scjampât viodintlu,

il Gjordan al à cessât indaûr;

4tant che rocs lis monts a saltuçavin,

tant che agnei dal trop lis culinis.

5Ce âstu po, mâr, che tu scjampis,

e tu, Gjordan, che tu siruchis?

6Parcè po vualtris, monts, tant che rocs saltuçaiso,

e tant che agnei dal trop, vualtris culinis?

7Presince dal Signôr di dute la tiere,

presince dal Diu di Jacop:

8lui al tramude tun sfuei la crete,

e il clap tune risultive di aghe.

115 (113b) La fede tal Diu vivent, risultive di benedizion par Israel

1No a nô, Signôr, no a nô,

ma al to non dài glorie:

par vie dal to boncûr,

in gracie de tô fedeltât.

2Parcè mo varessino di dî i popui:

“Dulà isal po il lôr Diu?”.

3Il nestri Diu al è a stâ intai cîi;

lui al à fat dut ce che i à parût.

4I lôr dius invezit a son arint e aur,

vore des mans dai umign.

5A àn bocje ma no fevelin,

a àn vôi ma no viodin.

6A àn orelis ma no sintin,

a àn narilis ma no nulin.

7A àn mans ma no palpin,

a àn pîts ma no cjaminin,

nol salte fûr un fîl di vôs de lôr bocje.

8Ch’a deventin compagns di lôr chei che ju fasin,

e ducj chei che su di lôr si fidin.

9Cjase di Israel, sta fidade sul Signôr:

lui al è lôr scût e lôr jutori.

10Cjase di Aron, sta fidade sul Signôr:

lui al è lôr scût e lôr jutori.

11Vualtris che lu rispietais, stait fidâts sul Signôr:

lui al è lôr scût e lôr jutori.

12Il Signôr si è impensât di nô par benedînus;

al benedissarà la cjase di Israel,

al benedissarà la cjase di Aron.

13Al benedissarà chei ch’a rispietin il Signôr,

i piçui cui grancj ducj insieme.

14Che il Signôr us moltiplichi,

vualtris e i vuestris fîs.

15Ch’o sedis benedîts dal Signôr:

lui al à fat cîl e tiere.

16I cîi a son cîi dal Signôr,

ma la tiere ai fîs dal om le à dade.

17No son i muarts ch’a laudin il Signôr,

e nancje chei che tal cidin a dismontin;

18nô invezit o benedìn il Signôr,

cumò e par simpri!

Aleluia.

116 (114-115) Pal Signôr la vite dai siei fedêi e vâl un grum

1I vuei ben al Signôr, parcè che al à scoltade

la vôs de mê preiere;

2parcè che al à slungjade viers di me la sô orele

cuant che lu clamavi.

3Cuardis di muart mi strengevin,

i laçs di chel altri mont mi cerclavin,

la disperazion e l’aviliment mi sfracaiavin.

4Ma jo o ài clamât il non dal Signôr:

“Salvimi, Signôr, ti prei!”.

5Il Signôr al à dûl e al ten pe justizie;

al è dolç di cûr il nestri Diu.

6Il Signôr al pare la int puare:

lui mi à salvât cuant che o jeri te streme.

7Torne, anime mê, a la tô pâs,

parcè che il Signôr ti à beneficade.

8Propit, al à liberade de muart la mê vite,

il gno voli des lagrimis,

il gno pît de colade.

9O cjaminarai presince dal Signôr

inte tiere dai vîfs.

10O ài vude fede, cun dut ch’o disevi:

“La mê disperazion e je masse cjalcjade”,

11ancje se o ài dite tal moment de pôre:

“A son ducj bausârs i umign”.

12Cemût fasaraio a paiâ il Signôr

di dut il ben che mi à fat lui?

13O alçarai il cjaliç de salvece

e o clamarai il non dal Signôr.

14O sodisfasarai ducj i miei avôts cul Signôr,

in face di dut il so popul.

15E je cetant preseade pai vôi dal Signôr

la muart dai siei amîs.

16E jo, Signôr, o soi un to famei,

to famei e fi de tô sierve.

Tu tu âs crevadis lis mês cjadenis.

17Un sacrifici di laut ti ufrissarai

e o clamarai il non dal Signôr.

18O sodisfasarai ducj i miei avôts cul Signôr

in face di dut il so popul,

19tai andits de cjase dal Signôr,

tal mieç di te, Gjerusalem.

Aleluia.