SALMS (96;97;98)

Letôr: Sandro Geatti

96 (95) Spietâ cun gjonde il Signôr, re e judiç di dut il mont

1Cjantait al Signôr une cjante gnove,

cjantait al Signôr di dute la tiere.

2Cjantait al Signôr, il so non onoraitlu,

contait di une dì daûr chê altre la sô salvece.

3A ducj i forescj contait de sô glorie,

framieç di ducj i popui i siei spetacui.

4Parcè che al è grant il Signôr e al merte laudât,

trement sore ducj i dius.

5Di fat i dius dai popui a son un nuie,

impen che il Signôr al à fat i cîi.

6Maiestât e sflandôr a cjaminin denant di lui,

potence e bielece a jemplin la sô cjase.

7Dait al Signôr, fameis dai popui,

dait al Signôr glorie e potence,

8dait al Signôr la glorie che al so non i spiete;

cjapait sù ufiertis e jentrait tai siei andits.

9Denant dal Signôr ingenoglaitsi

cuant che vistût di santitât si presente.

Ch’e trimi denant di lui dute la tiere.

10Disêt framieç dai popui:

“Il Signôr al regne!”.

Al ten sù il mont par no ch’al clopi,

al judiche i popui cun justizie.

11Ch’a gjoldin i cîi, che s’indalegri la tiere,

che si sgrisuli il mâr cun dut ce ch’al à dentri;

12la campagne cun dut il so sflandôr, ch’e fasi fieste,

ducj i arbui dal bosc che s’indalegrin

13denant dal Signôr ch’al rive,

ch’al ven a judicâ la tiere.

Al judicarà il mont cun justizie

e i popui cu la sô fedeltât.

97 (96) Il ream di Diu al puartarà gjonde e salvece a Sion

1Il Signôr al regne! Ch’e gjoldi la tiere,

che s’indalegrin dutis lis isulis.

2Nûl e scûr lu invulucin,

justizie e dirit a son il çocul de sô sente.

3Denant di lui il fûc i fâs strade,

al bruse dulintor ducj i siei nemîs;

4i siei folcs a sclarissin la tiere,

cuant che ju viôt, il mont si sgrisule.

5Denant dal Signôr lis monts come cere si dislidin,

denant dal paron di dute la tiere.

6I cîi a contin la sô justizie

e ducj i popui a restin pe sô glorie.

7A restaran malapaiâts ducj chei ch’a servissin i dius,

chei che si vantin di un nuie.

I dius a son ducj ingenoglâts denant di lui.

8Sion al à sintût e si è jemplât di gjonde,

ur è vierzût il cûr a lis fiis di Gjude,

par vie dai tiei judizis, Signôr.

9Tu sês tu, Signôr, l’Altissim

sun dute la tiere,

puartât cetant di plui di ducj i dius.

10Il Signôr ur vûl ben a di chei che il mâl a odein,

al ten cont de vite dai siei amîs,

ju salve des sgrifis de intate.

11Pai onescj une lûs si è impiade,

par chei che a àn il cûr just une reson di ligrie.

12Gjoldêt, onescj, tal Signôr,

il so non sant onoraitlu.

98 (97) Il ream di Diu al à palesade la salvece in face di ducj i popui

1Salm.

Cjantait al Signôr une cjante gnove,

parcè che al à fatis robonis.

Lu à fat vinci la sô gjestre,

il braç de sô santitât.

2Il Signôr al à palesade la sô salvece,

in face di ducj i popui

al à pandude la sô justizie.

3Si è visât dal so boncûr,

de sô fedeltât pe cjase di Israel.

Ducj i confins de tiere a àn viodude

la salvece dal nestri Diu.

4Che i cjanti al Signôr dute la tiere,

berlait, scriulait cu lis cjantis plui legris.

5Fasêt al Signôr une cjante cu la citare,

cu la citare e cul sun dal salteri;

6cul sun dal cuar e cu lis trombis;

in face dal re, dal Signôr scriulait.

7Che si sgrisuli il mâr cun dut ce ch’al à dentri,

il mont cun dute la int che si cjate;

8ch’a batin lis mans lis aghis,

e lis monts ch’a berlin di gjonde

9denant dal Signôr ch’al rive,

ch’al rive a judicâ la tiere;

al judicarà il mont cun justizie

e i popui cun cussience.