ESODO (10:21-29;11)

Letôr: Federico Iob

IX plae: il scûr

21Il Signôr i disè a Mosè: “Alce la tô man viers dal cîl e che un scûr di palpâlu al cuviergi l’Egjit”. 22Mosè al alçà la man viers dal cîl e par trê dîs e vignì jù sore la tiere dal Egjit une scuritât mai viodude une tant penge. 23La int no rivavin a viodisi in muse un cul altri e nissun nol podè movisi di li che al jere par trê dîs di file; i israelits, invezit, a vevin lusôr tes lôr cjasis.

24Il faraon al clamà Mosè e i disè: “Vualtris o podês lâ a fâi un sacrifici al Signôr ma il vuestri besteam, tant la robe minude che chê grande, e à di restâ culì. Ancje lis vuestris feminis e i vuestris fruts a podaran partî cun vualtris”. 25Dissal Mosè: “Tu âs tu di metinus a disposizion i nemâi che o vin di sacrificâju e di brusâju par ufrîjai al Signôr nestri Diu. 26Lis nestris mandriis ses menarìn daûrsi e nol restarà un cjâf, parcè che nus coventin par fâi i sacrificis al Signôr nestri Diu. No savìn nancje nô cemût che o varìn di fâ i sacrificis al Signôr fintremai che no sarìn rivâts là vie”. 27Ma il Signôr al indurì il cûr dal faraon, che no ju lassà partî gran. 28Il faraon i disè a Mosè: “Fûr di chi! Tegniti vuardât di me e no sta presentâti denant dai miei vôi parcè che la dì che tu mi rivis denant, par te e je finide!”. 29Dissal Mosè: “Cemût che tu vûs. No tu mi viodarâs altri denant di te”.

Predizion de muart dai primarûi

111Il Signôr i disè a Mosè: “I mandarai ancjemò une plae al faraon e al Egjit; daspò us lassarà lâ vie di chi. Ma cuant che us lassarà lâ vie, e sarà finide, che anzit al scugnarà lui parâus fûr. 2Vise alore il popul che ogni om al domandi a di chel dongje di lui e ogni femine a di chê che e je puarte cun puarte robis d’aur e d’arint”.

3Il Signôr al fasè in mût che i egjizians a vessin il popul di buine bande. Ancje Mosè al jere une persone une vore cognossude in dut l’Egjit e preseade dai fameis dal faraon e dal popul.

4Alore Mosè al disè: “Il Signôr al dîs cussì: Tor miegegnot jo o passarai l’Egjit fûr par fûr, 5e ducj i prins nassûts de tiere dal Egjit, comprendût ancje il prin fi dal faraon che al varès di sentâsi su la sô sente, il prin fi de sclave ch’e je daprûf de muele e ducj i prins nassûts dal besteam, a muraran. 6Ta chê volte l’Egjit al sarà dut un berli, che no si visisi di un compagn e nancje no ’nt vignarà. 7Ma là che a son a stâ i israelits nancje un cjan nol vuacarà cuintri di nissun, om o nemâl, par che tu sepis che il Signôr nol cjape Israel pal Egjit.

8Alore ducj chescj fameis chi a vignaran di me e si butaran par tiere denant di me disint: Vatint, tu e dute la int ch’e ven daûr di te! Daspò jo mi ’nt larai”. E Mosè, disdegnât al ultin fin, si slontanà dal faraon.

9Il Signôr i disè a Mosè: “Il faraon nol volarà scoltâus, par che o puedi fâ ancjemò plui spiei te tiere dal Egjit”. 10Mosè e Aron a faserin ducj chescj spiei in presince dal faraon, ma il Signôr al veve indurît il cûr dal faraon che nol lassà lâ gran i fîs di Israel de sô tiere.