SALMS (90;91;92)

Letôr: Giuseppina Bellina

LIBRI IV

90 (89) La vite no je nuie a preference de eternitât e dal boncûr di Diu

1Preiere. Di Mosè, om di Diu.

Tu sês stât par nô un ripâr, Signôr,

di une ete in chê altre.

2Prin che lis monts a nassessin

e a fossin parturîts il mont e la tiere,

di simpri e par simpri, Diu, tu sês.

3Tu tu fasis che l’om in pulvin al torni

dome cul dî: “Tornait indaûr, fîs dai umign”.

4Parcè che mil agns pai tiei vôi

a son come la zornade di îr, biel passade,

o tant che vie pe gnot une volte di vuaite.

5Intal sium tu ju sfantis;

a son precîs de jerbe ch’e sverdee:

6a buinore e dà fûr e e sverdee,

sore sere, seade, si secje.

7O sin propit fruçâts de tô fumate,

si voltìn di sanc cuant che tu ti discjadenis.

8Tu metis denant di te lis nestris colpis,

ancje i pecjâts plui platâts a la lûs de tô muse.

9Ducj i nestris dîs si sfantin par colpe de tô rabie,

i nestris agns a finissin come une soflade.

10I agns de nestre vite a saressin setante,

e otante pai plui fuarts;

ma lambic e rude fadie a son la pluritât.

Propit, a passin e nô o svolìn vie.

11Cui rivial a capî l’impit de tô fumate?

Cui àial la teme de viamence de tô rabie?

12Insegninus a contâ i nestris dîs,

e cussì o podarìn rivâ a la sapience dal cûr.

13Voltiti, Signôr; fint cuant mo…?

Ve dûl dai tiei servidôrs.

14Saciinus a buinore cu la tô gracie,

e o gjoldarìn in contentece par ducj i nestris dîs.

15Torninus la ligrie pai dîs che tu nus âs batûts,

par rifondinus des anadis ch’o vin viodudis dome disgraciis.

16Ch’a puedin viodi i tiei fameis dutis lis tôs voris

e che si slargji la tô glorie parsore dai lôr fîs.

17Ch’al sedi sore di nô il boncûr dal Signôr nestri Diu.

La vore des tôs mans par nô rinfuarce.

91 (90) L’ombre dal Onipotent ripâr sigûr cuintri dai pericui dal mâl

1Chel ch’al sta sot la protezion dal Altissim

e a l’ombre dal Onipotent si pare,

2che i disi al Signôr: “Gno ripâr e mê fuartece,

Diu gno, ch’o stoi fidât sun lui!”.

3Propit lui ti gjavarà dal laç dal cjaçadôr,

de peraule che a mâl partît e mene.

4Lui ti taponarà cu lis sôs plumis,

tu cjatarâs ripâr sot des sôs alis.

La sô fedeltât e je scût e corace.

5Lis pôris di vie pe gnot no tu varâs di paventâ,

ni la frece che vie pal dì e svole,

6ni la peste che ator dal scûr e baline,

ni la pidemie che sul misdì si sbroche.

7Ant colarà tacâts di te un miâr,

dismil a la tô gjestre;

ma te no ti sfiliarà par mai.

8Dome che ator tu ti cjalis,

tu viodarâs ce pae che ai triscj ur tocje.

9Stant ch’al è tal Signôr il to ripâr

e che tu âs fat dal Altissim la tô cjase,

10no ti capitarà mâl di sorte

e disgracie no rivarà inte tô tende.

11Parcè che ur darà ordin ai siei agnui

in ducj i tiei pas di tignîti vuardât:

12cu lis lôr mans a vignaran a cjapâti

par che il to pît tai claps no s’inçopedi.

13Sui sarpints e su lis liparis tu cjaminarâs,

dragons e leonuts tu tibiarâs.

14Za che mi vûl ben, jo lu salvarai;

par vie ch’al cognòs il gno non, lu puartarai.

15Cuant che mi clamarà, i rispuindarai;

o sarai cun lui inte disgracie;

lu salvarai e i darai une grande innomine.

16Lu saciarai cuntune vite lungje;

i fasarai gjoldi la mê salvece.

92 (91) Cjante di laut a Diu pe sô justizie tal regi il mont

1Salm. Cjante. Pal dì di sabide.

2Al è biel laudâ il Signôr,

fâ une cjante al to non, Altissim,

3contant il to boncûr a buinore

e la tô fedeltât gnotvie,

4cul liron e cu l’arpe a dîs cuardis,

cuntun intono di fieste, cu la citare.

5Parcè che tu mi âs jemplât di gjonde, Signôr, cu lis tôs voris,

lis voris des tôs mans jo me gjolt a cjalâ.

6Cetant grandis ch’a son, Signôr, lis tôs voris,

cetant insot che a van i tiei pinsîrs!

7L’om cence sintiment nol sa chestis robis,

chel ch’al è cence cjâf nol rive a capîlu.

8Se i triscj a menin come la jerbe

e ducj i delincuents a sfloregjin,

al è parcè che ju spiete l’eterne ruvine.

9Invezit tu, Signôr,

tu restis l’Altissim par simpri.

10Parcè che ve: i tiei nemîs, Signôr,

a laran a finîle malamentri,

ducj i delincuents a saran fruçâts.

11Tu tu âs fate cressi la mê fuarce come chê di un taur salvadi,

tu mi âs imbombât di vueli ch’al lûs.

12I miei vôi a àn cjalât contents i miei nemîs,

brutis gnovis a àn sintût lis mês orelis

a rivuart de int triste,

di chei che a jerin vignûts a fâmi cuintri.

13I juscj a florissin come palmis,

a vegnin sù come i cedris dal Liban;

14riplantâts te cjase dal Signôr,

a florissin tai andits dal nestri Diu.

15A butaran parfin te lôr vecjae,

a restaran frescs e vivarôs,

16par contâ che il Signôr al è just, la mê crete,

e che in lui no ’nd è ombre di injustizie.