SALMS (87;88)

Letôr: Faustino Anzil

87 (86) Sion, citât preferide di Diu, mari di ducj i popui

1Dai fîs di Core. Salm. Cjant.

Lis sôs fondis a son su lis monts santis.

2Il Signôr al à a cûr lis puartis di Sion

plui che no dutis lis cjasis di Jacop.

3Di te si disin robononis,

citât di Diu!

4Raab e Babilonie ju segnarai

fra chei che mi cognossin.

Ve la Filistee e Tîr, e Cus insieme:

a son nassûts ducj aventi.

5Al è propit di Sion che si dîs:

“Tant un che chel altri al è nassût achenti

e le ten sù l’Altissim!”.

6Tal cjapâ note dai popui, il Signôr al segne:

“Al è nassût alì ancje lui!”.

7E balant a cjantin

ducj chei che in te a jerin stâts umiliâts.

88 (87) Un biât al berle la sô pôre di murî

1Cjant. Salm. Dai fîs di Core. Al mestri dal coro. Sul aiar di “Macalot”. Pal cjant. Maskil. Di Eman l’ezrait.

2Signôr, Diu de mê salvece,

o ài berlât dute la zornade,

e dute la mari gnot denant di te o stoi.

3Ch’e rivi denant de tô muse la mê preiere;

slungje al gno lament la tô orele.

4Parcè che la mê anime e je passude di disgraciis;

e su la puarte di chel altri mont e je rivade la mê vite.

5Aromai mi àn metût cun chei ch’a van jù te buse,

mi cjati come un om che nol à vigorie.

6E je là jù cui muarts la mê cjase,

come chei ch’a son stâts passâts fûr par fûr

e a polsin tai sepulcris:

di lôr tu nancje no tu ti visis,

lontans de tô man, a son cjonçâts vie.

7Tu mi âs sistemât te buse sot tiere,

tal scûr e tal foran plui font.

8Sore di me e à scravaçât la tô rabie,

tu mi âs fat colâ intor dutis lis tôs ondadis.

9Tu âs slontanât di me ancje chei che mi cognossevin,

tu mi âs fat deventâ une robe ch’e fâs riviel par lôr.

O soi sierât tune preson cence sortide.

10A sun di strussiâmi

ancje i miei vôi si consumin.

Ogni dì, Signôr, ti ài clamât,

lis mês mans viers di te lis ài slungjadis.

11Di cuant in ca fastu pai muarts i tiei spetacui?

Varano di jevâ sù lis ombris a cjantâ la tô misericordie?

12Si fevelaraial forsit dal to boncûr intal sepulcri?

O de tô fedeltât tal lûc là che dut si cidine?

13Si contarano i tiei spiei intal scûr?

O te tiere dai dismenteâts la tô justizie?

14Ma jo, Signôr, o clami il to jutori,

e dal cricâ dal dì che ti rivi la mê preiere.

15Parcè mo, Signôr, âstu di butâ di bande la mê anime

e di platâ denant di me la tô muse?

16O soi biât e cul pît su la buse di cuant che o jeri zovin;

o puarti il pês des tôs pôris che mi sfracain.

17Parsore di me e je passade la tô rabie,

lis pôris che tu mi âs fatis a àn finît di copâmi;

18dut il dì come aghe mi invulucin;

sore di me a plombin dutis intune.

19Tu âs slontanât di me amîs e cognossincis,

dome il scûr mi fâs companie.