SALMS (85;86)

Letôr: Lena Vidoni

85 (84) Israel al spiete cun fede dal so Diu la justizie e la pâs dopo dal esili

1Al mestri dal coro. Dai fîs di Core. Salm.

2Tu sês stât bon, Signôr, cu la tô tiere,

il distin di Jacop tu âs tornât a indreçâ.

3Tu âs perdonade la tristerie dal to popul,

tu âs parâts jù ducj i lôr pecjâts.

4Tu âs bonade dute la tô rabie,

tu âs cessât de fumate che ti ardeve.

5Torne a metinus in sest, Diu, nestre salvece;

la fote che tu âs cuintri di nô, distude.

6Po âstu di vênus in asse par simpri?

Àe di sprolungjâsi la tô ire di ete in ete?

7No volarâstu propit tornânus a dâ la vite,

par che il to popul in te al puedi gjoldi?

8Mostrinus, Signôr, la tô misericordie,

e danus la tô salvece.

9O vuei scoltâ ce ch’al dîs Diu;

il Signôr sigûr di pâs al fevele

pal so popul e pai siei fedêi,

par chei che là di lui a tornin.

10Sigûr che la salvece e je dongje

par chei che lu rispietin;

la sô glorie e tornarà di cjase te nestre tiere.

11Bontât e fedeltât si son strenzudis,

justizie e pâs si son bussadis.

12La fedeltât e menarà sù de tiere

e e cucarà jù dal cîl la justizie.

13Di fat il Signôr nus darà ogni ben di sorte

e e butarà il so prodot la nestre tiere.

14La justizie e cjamine denant di lui,

e su l’olme dai siei pas la dretece.

86 (85) Ricors al boncûr dal Signôr di un fedêl perseguitât

1Preiere. Di David.

Slungje la orele, Signôr, e rispuindimi,

parcè che o soi biât e puar.

2Ten di voli la mê anime, ch’o soi un dai tiei;

salve il to famei che in te al spere,

tu che tu sês il gno Diu.

3Ve dûl di me, Signôr,

ch’o stoi berlant viers di te dute la zornade.

4Indalegre l’anime dal to famei,

intant ch’o alci viers di te, Signôr, la mê anime.

5Tu, Signôr, tu sês bon e tu perdonis,

tu sês cjamât di boncûr

cun ducj chei che ti clamin.

6Slungje la tô orele, Signôr, cuant che ti prei,

sta atent a la mê vôs che ti sconzure.

7Cuant che mi gafe la disperazion, jo ti clami simpri,

parcè che tu mi rispuindis.

8No ’nd è nissun fra i dius, Signôr, che ti semei;

a pâr des tôs no ’nd è nissune vore.

9Dutis lis gjernaziis che tu âs creadis

a vignaran di te, Signôr,

si butaran in genoglon a la tô presince

e i daran al to non la laude:

10“Tu tu sês grant e tu fasis robonis;

dome tu tu sês Diu!”.

11Insegnimi, Signôr, la tô strade:

o larai indenant inte tô fedeltât.

Fâs che tal gno cûr

dome il timôr dal to non al regni.

12Ti disarai graciis cun dut il gno cûr, Signôr gno Diu,

i darai glorie al to non par simpri;

13parcè che grant al è cun me il to boncûr:

des sfondaris di chel altri mont

tu âs gjavade la mê anime.

14Int prepotente si è metude cuintri di me, o Diu,

une sdrume di sfolmenâts e cîr di gafâmi la vite;

no ti àn metût denant dai lôr vôi.

15Ma tu, Signôr, tu sês un Diu plen di dûl e di boncûr,

pegri tal inrabiâti

e splendit te misericordie e te fedeltât.

16Ven incuintrimi cul to boncûr;

dài al to servidôr la tô fuarce,

salve il fi de tô sierve.

17Fâs di me un segnâl dal to boncûr,

par ch’a restin vergognâts chei che mi àn in asse,

viodint che tu mi âs judât e confuartât.