SALMS (34;35)

Letôr: Vania Cattarossi

34 (33) Furtunât l’om ch’al va a parâsi tal Signôr

1Di David, cuant che al fasè finte di jessi mat denant di Abimelec e chel lu lassà lâ.

Alef

2O vuei benedî il Signôr cence polse,

la sô laut simpri su la mê bocje.

Bet

3La mê vite tal Signôr si glorie,

che lu sepin i puars e s’indalegrin.

Ghimel

4Laudait cun me il Signôr,

puartìn il so non ducj insieme.

Dalet

5O ài clamât il Signôr e lui mi à dade rispueste,

mi à deliberât di ogni fastidi.

He

6Cjalaitlu lui e us lusaran i vôi,

lis vuestris musis no varan di deventâ rossis.

Zain

7Chest biât al à berlât e il Signôr lu à scoltât,

e lu à deliberât di dutis lis sôs penis.

Het

8L’agnul dal Signôr al fâs une trincee

ator di chei che lu rispietin e ju libere.

Tet

9Cerçait e o viodarês cetant bon ch’al è il Signôr:

furtunât l’om che li di lui si pare.

Jod

10Rispietait il Signôr, vualtris siei amîs,

parcè che no ’nd è miserie par chei che lu rispietin.

Caf

11I grancj a son colâts in miserie e la fan a patissin,

ma chei che si avodin al Signôr no ur mancje propit nuie.

Lamed

12Vignît, fîs, e scoltaitmi:

o vuei insegnâus il timôr dal Signôr.

Mem

13Cui isal chel om che i ten a la vite,

ch’al brame di gjoldi il ben par lungjis zornadis?

Nun

14Ten lontane dal mâl la tô lenghe

e i tiei lavris des cjacaris falsis.

Samec

15Tegniti lontan dal mâl e fâs robis justis,

cîr la pâs e corii daûr.

Ain

16I vôi dal Signôr a son dome pe int juste

e lis sôs orelis pai lôr berlis cuant che lu clamin.

Pe

17Il Signôr al ten di voli chei ch’a fasin robatis,

par scancelâ ancje il lôr ricuart di cheste tiere.

Zade

18I juscj a àn berlât e il Signôr ju à sintûts

e ju à deliberâts di ogni berdei.

Qof

19Se un al à il cûr displasint il Signôr i sta dongje,

se al à il cûr pentît lu salve.

Res

20Lis disgraciis dal just a son tantis,

ma il Signôr lu delibere di dutis.

Sin

21Ducj i siei vues lui ju vuarde,

in mût che nancje un no si crevi.

Tau

22Il trist al è fat fûr de sô tristerie;

chei ch’a odein il just a àn di purgâlis.

23Il Signôr al salve la vite dai siei fameis;

chei che si parin li di lui no varan cjastic di sorte.

35 (34) Apel a la justizie di Diu cuintri testemonis bausârs e triscj

1Di David.

Ven jù, Signôr, a fâ sentence cuintri di chei che mi incolpin;

combat cuintri di chei che mi tachin.

2Cjape sù il scût e l’armadure

e jeve sù a parâmi.

3Tire fûr la lance e sieriur la strade

a di chei che daûr mi corin.

Disii a la mê anime:

“O soi jo la tô salvece!”.

4Ch’a restin malapaiâts e plens di vergogne

chei ch’a cirin la mê vite;

che scuintiâts a cessin

chei ch’a smicjin di ruvinâmi.

5Ch’a sedin tant che la pule denant dal aiar,

cuant che l’agnul dal Signôr ju fâs cori.

6Ch’e sedi scure e sgliciote la lôr strade,

cul agnul dal Signôr che ur dà cuintri.

7Parcè che mi àn tindude la lôr rêt cence merit,

cence nissune reson a àn sgjavade une buse pe mê anime.

8Che i plombi intôr a sec la ruvine,

che lu gafi la rêt ch’al à tindude,

ch’al coli dentri e che si sfracai.

9La mê anime invezit e gjoldarà tal Signôr,

e sarà contente pe sô salvece.

10Ducj i miei vues a disaran alore:

“Cui isal mo come te, Signôr?

Tu che il biât tu deliberis

di chel ch’al è plui fuart di lui,

e il puar di chel che lu spele”.

11Si fasin indenant testemonis bausârs,

mi domandin cont di robis che no sai;

12il ben ch’o ài fat mi compensin cul mâl.

Ce disperazion pe mê anime!

13E pensâ che te lôr infermitât di sac mi vistivi,

la mê anime cul dizun o avilivi

– ch’e torni sore di me la mê preiere! –

14come par un compagn e par un fradi.

O levi ator come un ch’al vai pe muart di sô mari.

cul cjâf bas e dut avilît.

15Ma a pene ch’o ài clopât, a àn gjoldût e si son dâts dongje,

si son dâts dongje a fâmi cuintri;

forescj che nancje no ju cognossevi

mi àn sbrindinât cence soste.

16Mi tirin a ciment, mi cjolin vie,

cuintri di me i lôr dincj a crustin.

17Fin cuant mo, Signôr, starâstu li a cjalâ?

Gjave la mê anime des besteatis ch’a rugnin,

des çatis dai leons un che si dispere.

18Ti laudarai te grande semblee,

framieç di tante int ti laudarai.

19Che parsore di me no vedin di gjoldi

i miei nemîs cjamâts di bausie,

che fra di lôr no si cimiin

chei che cence un parcè mi àn in asse.

20Lôr no fevelin di pâs,

e cuintri la int buine de tiere

dome inicuitâts a masanin;

21a spalanchin cuintri di me la lôr bocje e a disin:

“Cjo mo, lu vin viodût cui nestris vôi”.

22No sta tasê, Signôr, tu che tu âs viodût;

Signôr, di me no sta slontanâti.

23Dismoviti, Diu gno, pe mê sentence;

jeve sù, Signôr, pe mê cause.

24Judichimi seont la mê justizie, Signôr, gno Diu.

Che su di me no vedin di cjantâ vitorie.

25Che tai lôr cûrs no disin: “Al è ce ch’o bramavin!”.

Che no disin: “Je vin petade!”.

26Ch’a sedin sbefâts ducj insieme

e jemplâts di vergogne

chei che s’indalegrin pe mê disgracie;

che si viestissin di disonôr e di vergogne

chei che cuintri di me a alcin la creste.

27Ch’a gjoldin invezit e s’indalegrin

chei che i tegnin a la mê justizie.

Ch’a puedin dî simpri: “Laudât seial il Signôr

ch’al cîr la pâs dal so famei!”.

28E la mê lenghe e contarà la tô justizie,

la tô laut dute la zornade.