SALMS (12;13;14;15)

Letôr: Laura Marrone

12 (11) Preiere cuintri dai supierbeôs

1Al mestri dal coro. Su l’otave. Salm. Di David.

2Judimi, Signôr, parcè che il bon al è finît,

a son sparîts framieç dai fîs dai oms i fedêi.

3L’om i conte al so compagn dome bausiis,

lavris bausârs di un cûr dopli a son lis sôs peraulis.

4Ch’al çoncj il Signôr ducj i lavris ch’a imbroin,

ogni lenghe ch’e incjoche cun grandis peraulis.

5Parcè che a àn dit: “Cu la nestre lenghe o fasarìn robonis,

i nestris lavris a son come armis,

cui rivaraial a sumierginus?”.

6“Pal vaî dai puars, pal gemi dai biâts

o jevarai sù, al dîs il Signôr,

i darai une man a di chel che le brame”.

7Lis promessis dal Signôr a son scletis,

tant che arint rifinît intal crosul,

spurgât de tiere siet voltis.

8Tu, Signôr, tu lis mantegnarâs

e tu nus vuardarâs di cheste gjernazie par in eterni.

9I triscj a balinin di ogni bande,

i plui sfolmenâts a cjapin pît framieç dai fîs dai umign.

13 (12) Lament e preiere dal just cul pît su la buse

1Al mestri dal coro. Salm. Di David.

2Fin cuant mo, Signôr, âstu di dismenteâmi?

Fin cuant âstu di tignîmi platade la tô muse?

3Fin cuant àio di tormentâmi tal savoltament de mê anime,

tal marum dal gno cûr dute la zornade?

Fin cuant il gno nemi varaial di fâmi cuintri?

4Cjalimi, rispuindimi, Signôr gno Diu,

dàur lûs ai miei vôi

par che il sium de muart no mi brinchi,

5par no ch’al disi il gno nemì: “Lu ài metût sot i pîts”,

e, viodintmi a clopâ, no se gjoldin i miei contraris.

6Jo però tal to boncûr o ài fede;

che s’indalegri il gno cûr te tô salvece.

I cjantarai al Signôr che mi à judât.

14 (13) Diu al pare il just intun mont là ch’e regne la coruzion

1Al mestri dal coro. Di David.

L’om cence sintiment al dîs dentri di sè: “No ’nd è Diu di sorte”.

A van fûr di strade, a fasin dome robatis;

no ’nd è nancje un ch’al fasi robis justis.

2Il Signôr dai cîi al slungje i siei vôi sui fîs dai umign

par viodi s’and è un ch’al capissi, ch’al ciri Diu.

3A son lâts ducj fûr di strade, si son stralegnâts un cul altri:

no ’nd è un ch’al fasi il ben, un di numar.

4No metarano judizi ducj chei ch’a fàsin robatis,

e come ch’a mangjassin pan il gno popul a glotin?

5No àn clamât il Signôr e cumò a son cjamâts di pôre,

parcè che Diu al sta cu la gjenerazion de int juste.

6I progjets dal biât vualtris ju butais sotsore,

ma il Signôr al è il so ripâr.

7La salvece par Israel ch’e vegni di Sion!

Cuant che il Signôr al tornarà a comedâ il so popul,

ch’al gjoldi Jacop, che Israel s’indalegri.

15 (14) I “comandaments” par cjatâ sotet in Diu

1Salm. Di David.

Signôr, cui podaraial vivi te tô tende,

cui podaraial stâ su la tô mont sante?

2Chel ch’al cjamine te onestât,

ch’al pratiche la justizie e tal so cûr al dîs la veretât.

3Chel che nol met fûr cjàcaris cu la sô lenghe,

che no i fâs mâl al so prossim

e chel dongje di lui nol svilane.

4Chel ch’al spresee l’om plen di tristerie

ma chei ch’a àn timôr dal Signôr ju onore,

e, se ancje al à zurât a so damp, nol volte peraule.

5Chel che nol dà i siei bêçs fasint usure

e cuintri dal nocent nol cjape regâi.

Chel ch’al fâs cussì,

nol cloparà par mai.