SALMS (9;10;11)

Letôr: Vanda Toppano

9-10 Il Signôr judiç dai popui e salvadôr dai umii

1Al mestri dal coro. Seont “La muart dal fi”. Salm. Di David.

Alef

2O vuei laudâti, Signôr, cun dut il cûr;

o vuei cjantâ dutis lis robonis che tu âs fatis;

3o vuei jessi content e plen di ligrie,

o vuei cjantâ il to non, o Altissim.

Bet

4I miei nemîs fruçâts a scjampavin

e a sparivin de tô presince.

5Parcè che tu âs cjapade a pet la mê reson e la mê cause;

judiç just, tu ti sês sentât su la tô sente.

Ghimel

6Tu âs menaçâts i popui e fruçade la int triste,

scancelant il lôr non in eterni e par simpri.

7I miei nemîs a son finîts,

e lis citâts che tu âs sdrumadis a restaran maseriis par in secula.

He

8Ve, il Signôr al è sentât par simpri,

al à fate la sô sente pal judizi.

9Lui al judiche il mont cun justizie,

al rêç come cu va i popui.

Vau

10Il Signôr ch’al sedi pal tibiât une fuartece,

une crete tai moments dal pericul,

11li di te a van a parâsi chei che il to non a cognossin.

Parcè che tu, Signôr, no tu âs mai lassâts implantâts chei che ti cìrin.

Zain

12Cjantait al Signôr, ch’al è a stâ in Sion,

contait framieç dai popui lis sôs voris;

13parcè che lui al cjale chei ch’a vain,

dal lôr lament si vise e nol dismentee il berli dai puars.

Het

14Al à vût dûl di me il Signôr,

si è sbassât a cjalâ l’avilizion ch’o ài,

ce che mi àn procurât chei che mi àn in asse;

des puartis de muart lui mi tire vie.

15Par chel o contarai lis tôs lauts

tes puartis de fie di Sion.

Par chel o gjoldarai pe tô salvece.

Tet

16I popui a son plombâts inte buse ch’a vevin sgjavade,

il lôr pît si è inçopedât te rêt ch’a vevin tindude.

17Il Signôr si è palesât pe sentence ch’al à fate,

tal vuluç des sôs mans il trist si è ingredeât.

Jod

18Ch’e torni tes inferis la int triste,

ducj i popui che si dismentein di Diu.

19Parcè che nol dismentee il puar par simpri,

la sperance dai puars no va deludude in eterni.

Caf

20Jeve sù, Signôr, par che l’om no si esalti;

denant de tô face ch’a sedin judicâts i popui.

21Met parsore di lôr, Signôr, la tô pôre.

Ch’a sepin i popui ch’a son oms e vonde.

10

Lamed

1Parcè mo, Signôr, stâstu in lontanance,

ti platistu tal moment de conseguence?

2Il biât al ven tibiât dal trist cun prepotence,

al è cjapât dentri tai trucs ch’al à prontât chel altri.

3Il trist si ten in bon des vois de sô anime,

al spresee il Signôr chel che no ’nd à mai avonde.

Nun

4Te sô rogance il trist il Signôr al spresee:

“Nol vignarà a viodi. No ’nd è Diu di sorte!”.

Ve dut ce che lui al pense.

5I siei trois a sfloregjin di un continui.

I tiei judizis a son masse alts par lui,

ducj i siei nemîs, ur spude in muse.

6Al dîs dentri di sè: “No cloparai.

O larai indenant cence disgraciis di une ete in chê altre”.

Pe

7La sô bocje e je plene di bramazions, imbrois e tristeriis,

sot de sô lenghe rude inicuitât e prepotence.

8Tai siei campaments al tint la vuate

par fâ fûr il nocent di sot vie,

i siei vôi no pierdin un lamp il debul.

Ain

9Al sta in vuaite tal so côf come il leon te sô tane,

al sta in paisse par dâi la gafe al puar,

tirantlu te sô rêt il puar al brinche.

10Al plombe abàs, si scrufuie

e a colin i debui te fuarce des sôs sgrifis.

11Tal so cûr al à dite: “Diu si è dismenteât;

al à platade la muse e nol viodarà mai altri!”.

Qof

12Jeve sù, alce la tô man Signôr Idiu,

la biade int no sta lassâ dismenteade.

13Il trist al à remenât Diu,

disint intal so cûr: “Tu no tu bacilis?”.

Res

14Ma tu tu âs viodude la disperazion e la strussie,

e tu sês pront cu la tô man par apaiâlis.

Si poe intor di te chel che nol pò altri:

parcè che tu sês tu chel ch’al pare il vuarfin.

Sin

15Creve il braç dal trist e dal om cence cussience,

cjastiiju pe lôr tristerie, che no si le viodi altri.

16Il Signôr al è re in eterni e par simpri,

i forescj a son sparîts de sô tiere.

Tau

17Il berli dai puars, Signôr, tu tu lu scoltis,

tu i dâs spirt al so cûr, tu slungjis la tô orele.

18Se tu ti metis de bande dal sotan e dal vuarfin,

nissun om in chest mont nol fasarà plui pôre.

11 I vôi di Diu sul bon e sul trist

1Al mestri dal coro. Di David.

Li dal Signôr o soi lât a parâmi, cemût podêso dîmi:

“Come une passare su pes monts svole vie”?

2Ve che i triscj il lôr arc a prontin,

a àn metude la frece su la cuarde

par trai tal scûr a di chei ch’a àn la cussience monde.

3S’a slachin lis fondis,

il just ce fasaraial?

4Il Signôr al à tal templi il so santuari,

il Signôr al à intai cîi la sô sente.

I siei vôi a cjalin,

la lûs dai siei vôi e stage i fîs dai umign.

5Il bon e il trist il Signôr ju ten di voli,

lui al à in asse chel che si pas di tristerie;

6al fâs plovi sui triscj

cjarbons di fûc e solfar,

un aiaron ch’al sboente ur tocjarà di gloti.

7Parcè che il Signôr al è just e i ten a lis robis justis;

la int di cussience e viodarà la sô muse.