SALMS (1;2;3;4)

Letôr: Massimiliano Verdini

Salms

Libri I

1 Il just, l’om propit furtunât

1Furtunât l’om che nol va daûr dal consei de int triste,

che no si ferme su la strade dai pecjadôrs

e che te congrèghe de int cence sintiment no si sente,

2ma te leç dal Signôr si console

e la sô leç dì e gnot al rumie.

3Al è come un arbul plantât ad ôr des aghis,

cjamât di pomis te stagjon juste

e lis sôs fueis no colaran par mai;

a laran in puart dutis lis sôs voris.

4No cussì ve, no cussì pe int triste:

a son come il stranc che l’aiar lu sparnice.

5Par chel i triscj no rezaran intal judizi

e nancje te cunvigne dai juscj i pecjadôrs.

6Parcè che il Signôr al cognòs ben il troi de int juste,

ma la strade dai triscj e va in ruvine.

2 La paronance universâl dal Signôr e dal so consacrât

1Parcè mo dute cheste rogance jenfri i popui,

cheste int fûr di plomp ch’e masane?

2Si son rivoltâts i rês de tiere

e i sorestants a complotin cuintri dal Signôr e cuintri dal so Messie:

3“Crevìn lis lôr cjadenis,

butìn di bande lis lôr peandis!”.

4Chel ch’al è sentât in cîl i ven di ridi,

di adalt il Signôr ju cjol vie.

5Po ur fevele plen di rabie,

e te sô fumate lui ju inglace:

6“Il gno re lu ài consacrât jo di persone

là sù in Sion, su la mê mont sante”.

7Il decret dal Signôr o contarai:

lui mi à dit: “Tu tu sês gno fi,

jo vuê ti ài fat nassi.

8Domandimal e ti doi in ereditât i popui

e la paronance fint ai confins de tiere.

9Tu ju crevarâs cuntune mace di fier,

tant che vâs di crep tu ju fruçonarâs”.

10E cumò, sorestants, fasêt judizi,

mendaitsi, vualtris ch’o judicais la tiere!

11Servît il Signôr cun timôr,

bussait i siei pîts plens di pôre:

12che no i vegni sù e che no pierdês la strade.

La sô rabie intun moment s’infoghe.

Furtunât chel che li di lui al va a parâsi.

3 Il Signôr, scût ch’al pare

1Salm di David cuant che al scjampave di so fi Assalon.

2Signôr, cetancj che mi son contraris,

a son tancj chei che mi fasin cuintri,

3une vore chei ch’a disin de mê anime:

“Nancje il so Diu nol rive plui adore di salvâle!”.

4Ma tu, Signôr, tu sês un ripâr che mi contorne,

tu sês la mê braure e il gno cjâf tu alcis.

5Viers dal Signôr cun dute la mê vôs o berli,

lui mi rispuint de sô mont sante.

6Ve, mi pon tal gno jet e mi indurmidìs vie.

Mi dismôf parcè che il Signôr mi sostente.

7Un esercit di miârs di lôr no mi fâs pôre

che si campin cuintri di me di ogni bande.

8Jeve sù, Signôr;

salvimi, gno Diu.

Patafe ducj i miei nemîs,

pare in fruçons i dincj de int triste.

9Dal Signôr e je la salvece.

Che la tô benedizion e vegni jù sul to popul.

4 In Diu la vere pâs

1Al mestri dal coro. Cun struments a cuardis. Salm. Di David.

2Cuant che o berli, rispuindimi, Diu de mê justizie;

tai miei fastidis, viergimi une strade;

ve dûl di me e scolte la mê preiere.

3Fîs di om, fin cuant sbelearêso la mê glorie,

larêso daûr dal nuie e cirarêso la bausie?

4Tignît a ments che il Signôr pal so amì al fâs robonis,

il Signôr mi scolte cuant che o berli viers di lui.

5Pensait ben dentri di vualtris e no stait a pecjâ;

inrabiaitsi tai vuestris stramaçs ma tasêt.

6Ufrît sacrificis seont justizie

e stait fidâts tal Signôr.

7A son tancj ch’a disin: “Cui nus daraial moments di gjonde?

Si è slontanade di nô, Signôr, la lûs de tô muse”.

8Intal gno cûr tu âs metude la gjonde

plui di cuant che a àn forment e most in bondance.

9A pene che mi pon, m’indurmidìs in pâs,

parcè che dome tu, Signôr, tu mi fasis polsâ sigûr.