ESTER (6;7)

Letôr: Fabio Zuliani

Onôr a Mardocheu

61In chê gnot il re nol rivave a cjapâ sium. Alore al ordenà che i puartassin il libri des memoriis, lis cronachis, e a forin letis presince dal re. 2Si cjatà scrit che Mardocheu al veve denunciât Bigtan e Teres, i doi cjastrâts dal re vuardeans de puarte, ch’a vevin cirût di meti lis mans su la persone dal re Assuero. 3Alore il re al domandà: “Ce si àial fat par dâi a Mardocheu onôr e grandece sore di chest?”. I zovins ch’a servivin il re i rispuinderin: “No si à fat nuie par lui”. 4Dissal il re: “Cui isal tal andit?”. Par cumbinazion, Aman al jere vignût tal andit juste fûr dal palaç par dîi al re di picjâ Mardocheu tor dal pâl ch’al veve prontât par lui. 5I zovins fameis dal re i diserin: “Ve chi ch’al è Aman tal andit”. Dissal il re: “Ch’al vegni dentri!”. 6Aman al jentrà e il re i disè: “Ce si àial di fâi a di un om che il re al vûl dâi onôr?”. Aman al pensà: “A di cui varessial mo di dâi onôr il re, se no a mi?”. 7Aman al rispuindè: “Pal om che il re al vûl dâi onôr, 8si à di cjoli la tonie reâl che par solit al met intor il re e il cjaval che par solit lu monte il re e sul so cjâf si à di meti une corone reâl; 9si à di consegnâi la tonie e il cjaval a un dai princips plui nobii dal re; si à di riviestî di chê tonie l’om che il re al vûl dâi onôr, si à di fâi passâ a cjaval fûr par fûr lis stradis de citât e si à di berlâ denant di lui: Cussì i sucêt a di chel om che il re al vûl dâi onôr”. 10Alore il re i disè a Aman: “Svelt, cjol sù la tonie e il cjaval, come che tu âs dit, e fâsii cussì a Mardocheu il gjudeu, ch’al è dongje de puarte dal re; no sta lassâ fûr nuie di ce che tu âs dit”. 11Aman al cjolè sù la tonie e il cjaval, al rivestì cu la tonie Mardocheu, i fasè passâ a cjaval fûr par fûr lis stradis de citât e al berlave denant di lui: “Cussì i sucêt a di chel om che il re al vûl dâi onôr”. 12Po Mardocheu al tornà dongje de puarte dal re, ma Aman al lè inmediato a cjase, dut cuintrifat e cul cjâf taponât cuntun vêl. 13Aman i contà a Zeres, la sô femine, e a ducj i siei amîs ce che i jere sucedût. I siei conseîrs e la sô femine Zeres i diserin: “Se Mardocheu, che tu âs scomençât a sbassâti denant di lui, al è de gjernazie dai gjudeus, no tu podarâs fâ nuie cuintri di lui; che anzit ti tocjarà di socombi denant di lui”.

14A jerin ancjemò daûr a fevelâ cun lui ch’a rivarin i cjastrâts dal re e a spessearin a compagnâ Aman al gustâ che Ester e veve prontât.

Il secont gustâ di Ester: la disgracie di Aman

71Il re e Aman a lerin duncje a gustâ cu la regjine Ester. 2Ancje in cheste seconde zornade, intant ch’al jere daûr a bevi il vin, il re i disè a Ester: “Ce robe vûstu domandâmi mo, regjine Ester? Ti sarà dade. Ce bramistu? S’al fos magari mieç dal gno ream, al sarà fat!”. 3Alore la regjine Ester i rispuindè: “Se i tiei vôi mi àn a grât, re, e se cussì i pâr al re, o domandi che mi sedi lassade la vite e o brami ch’al sedi sparagnât il gno popul. 4Parcè che jo e il gno popul o sin stâts vendûts par jessi fruçâts, copâts, svinidrîts. S’o fossin stâts vendûts par deventâ sclâfs e sclavis, o varès tasût; ma il nestri nemì nol è plui in stât di comedâ il dam ch’al varà il re”. 5Alore il re Assuero i domandà a la regjine Ester: “Cui isal e dulà isal chel ch’al à pensât di fâ un at di cheste sorte?”. 6I rispuindè Ester: “L’aversari, il nemì al è chel delincuent di Aman”. Viodint il re e la regjine, Aman si voltà di sanc pal terôr. 7Il re, fûr di sè, al jevà sù de taule e al jessì tal zardin dal palaç, biel che Aman al restà li par domandâi la gracie de vite a la regjine Ester, parcè che al viodeve benon che de part dal re la sô fin e jere segnade. 8Po il re al tornà dal zardin te sale che si gustave; intant Aman si jere butât cu la muse par tiere denant dal jet là ch’e jere poiade la regjine Ester. Alore il re al berlà: “Àial forsit chê di doprâ la regjine sot i miei vôi, in cjase mê?”. A pene che cheste peraule e saltà fûr de bocje dal re, a Aman i meterin un vêl parsore de muse. 9Carbonà, un dai cjastrâts, al disè presince dal re: “Ve, a àn parfìn plantât un pâl di cincuante comedons in cjase di Aman, fat prontâ di Aman par Mardocheu, ch’al veve fevelât pal ben dal re”. Dissal il re: “Picjaitlu lui!”. 10E cussì Aman al fo picjât tor dal pâl ch’al veve prontât par Mardocheu. E la fumate dal re si bonà.