ESTER (1:1a-1r)

Letôr: David Mizza

Ester

Il sium di Mardocheu

11aTal secont an dal ream dal grant re Assuero, la prime dì di Nisan, Mardocheu fi di Jair, fi di Simei, fi di Kis, de tribù di Beniamin, al fasè un sium. 1bAl jere un gjudeu ch’al jere a stâ te citât di Suse, un om in alt, ch’al veve une incariche tal palaç dal re 1ce ch’al jere dal trop di chei che Nabucodonosor re di Babilonie ju veve menâts vie di Gjerusalem sot di Jeconie re de Gjudee. 1dChest al jere duncje il so sium: ve berlis e savoltons, tons e taramot, dut un ribalton su la tiere. 1eE ve a vignî indenant doi dragons grancj di fâ pôre, ducj i doi pronts par combati; e si sintì, trement, il lôr sivîl. 1fSintint il lôr sivîl, ogni gjernazie si prontà pe vuere, par combati cuintri dal popul dai juscj. 1gVe une zornade di scûr e di fumate, di tribulazion e di spavent, di malstâ e di grant savoltament su la tiere. 1hDute la gjernazie dai juscj e fo sotsore: a vevin pôre che par lôr e fos finide e si prepararin a murî e a berlarin viers Diu. 1iMa dal lôr berli al jessì, tant che di une piçule risultive, un grant flum, aghis che no finivin altri. 1kE vignì fûr la lûs e il soreli: i piçui a forin alçâts e a diluviarin i prepotents. 1lIn chel Mardocheu si sveà: al veve viodût chest sium e ce che Diu al veve distinât di fâ; al leve indenant rumiantlu dentri di sè e al cirive di splanâlu fint in font, in dut ce ch’al voleve dî, fin ch’e rivà la gnot.

Mardocheu al pant il complot

1mMardocheu al viveve tal palaç cun Bigtan e cun Teres, i doi cjastrâts dal re ch’a vuardeavin il palaç e, 1nsintint i lôr resonaments e lant a scrutinâ tai lôr progjets, al vignì a savê che lôr doi si preparavin a meti lis mans sul re Assuero. Alore al visà il re. 1oIl re al fasè interpelâ i doi cjastrâts: a confessarin e a forin maçâts. 1pPo il re al fasè scrivi chescj fats tes cronachis; ancje Mardocheu ju metè jù par scrit. 1qIl re al nomenà Mardocheu sorintendent dal palaç e i fasè regâi sore di chestis robis. 1rMa al jere ancje Aman, fi di Amedate, l’agaghit, ch’al jere scoltât cetant dal re, e al cirì il sisteme di fâi mâl a Mardocheu e al so popul pe cuistion dai doi cjastrâts dal re.