NEEMIE (3)

Letôr: Vittorina Sgoifo

Sudivision des voris

31Eliasib, prin predi, insieme cui siei fradis predis si meterin a fâ sù la puarte des Pioris; le consacrarin e a meterin i cancars; a lerin indenant fasint sù fint a la toresse di Mee, che po le consacrarin, e fintremai a la toresse di Cananeel. 2Dongje di Eliasib a lavoravin i oms di Gjeric e dongje di lôr al lavorave Zacur, fi di Imri. 3I fîs di Senaà a faserin sù la puarte dai Pes; a faserin il telâr e a meterin i cancars, i clostris e i gatars. 4Dongje di lôr al comedave Meremot fi di Urie, fi di Akoz; dongje di lôr al comedave Mesulam, fi di Berechie, fi di Mesezabeel; dongje di lôr al comedave Zadok fi di Baane; 5dongje di lôr a comedavin chei di Tekoe; ma i lôr sorestants no plearin gran il cuel par dâ une man te vore pal lôr paron. 6Joiadà fi di Paseac e Mesulam fi di Besodie a restaurarin la puarte Viere; i faserin il telâr e i meterin i cancars, i clostris e i gatars. 7Dongje di lôr a comedavin Melatie il gabaonit, Jadon il meronotit, e i oms di Gabaon e di Mizpà, ch’a jerin sot dal governadôr d’Oltriflum; 8dongje di lôr al comedave Uziel fi di Caraie, un dai oresins, e dongje di lui al lavorave Ananie, un di chei dai bonodôrs. A vevin rinfuarçât Gjerusalem fint al Mûr Larc. 9Dongje di lôr al comedave Refaie fi di Cur, sorestant di mieç distret di Gjerusalem. 10Dongje di lôr al comedave, in face de sô cjase, Jedaie fi di Carumaf e dongje di lui al lavorave Catus fi di Casabnià. 11Malchie fi di Carim e Casub fi di Pacat-Moab a restaurarin chel altri toc di muris e la toresse dai Fôrs. 12Dongje di lôr al comedave, insieme cu lis fiis, Salum fi di Aloches, sorestant di mieç distret di Gjerusalem. 13Canum e la int di Zanoac a restaurarin la puarte de Concje; le tornarin a fâ sù, a meterin i cancars, i clostris e i gatars. In plui a faserin mil comedons di mûr fint a la puarte dal Ledan. 14Malchie fi di Recab, sorestant dal distret di Bet-Kerem, al restaurà la puarte dal Ledan; le tornà a fâ sù, al metè i cancars, i clostris e i gatars. 15Salum fi di Col-Coze, sorestant dal distret di Mizpà, al restaurà la puarte de Risultive; le tornà a fâ sù, le cuviergè, al metè i cancars, i clostris e i gatars. In plui al fasè il mûr de vascje di Siloe, dongje dal zardin dal re, fintremai a la scjalinade che si va jù te citât di David. 16Daûr di lui Neemie, fi di Azbuk, sorestant di mieç distret di Bet-Zur, al comedà fint ai tombâi di David, fint a la vascje artificiâl e fint a la cjase dai Oms di valôr. 17Daûr di lui a comedavin i levits, sot di Recum fi di Bani; dongje di lui al lavorave pal so distret Casabià, sorestant di mieç distret di Keilà. 18Daûr di lui a comedavin i lôr fradis, sot di Binui fi di Chenadad, sorestant di chel altri mieç distret di Keilà; 19dongje di lui Ezer, fi di Gjosuè, sorestant di Mizpà, al comedave un altri toc di muris, in face a la subide dal dipuesit di armis, de bande dal cjanton. 20Daûr di lui Baruc fi di Zacai al comedave cun passion un altri toc, dal cjanton fint a la puarte de cjase di Eliasib sorestant dai predis. 21Daûr di lui Meremot, fi di Urie, fi di Akoz, al comedave un altri toc, de puarte de cjase di Eliasib fintremai là ch’e finive la cjase di Eliasib. 22Daûr di lui a lavoravin i predis ch’a jerin a stâ tal circondari. 23Daûr di lôr Beniamin e Casub a lavoravin denant de lôr cjase. Daûr di lôr Azarie fi di Maaseie, fi di Ananie, al lavorave dongje di cjase sô. 24Daûr di lui Binui, fi di Chenadad, al restaurà un altri toc di muris, de cjase di Azarie fintremai a la voltade, vadì al cjanton. 25Palal fi di Uzai al lavorà denant de voltade e te toresse ch’e ven fûr dal plan adalt dal palaç dal re e che si viôt jù il curtîl de preson. Daûr di lui al lavorave Pedaie, fi di Pareos. 26I oblâts ch’a jerin a stâ sul Ofel a lavoravin denant de puarte des Aghis, de bande ch’al jeve il soreli, e denant de toresse che si viodile in fûr. 27Daûr di lôr chei di Tekoe a restaurarin un altri toc, denant de grande toresse in fûr e fint al mûr dal Ofel. 28I predis a comedavin parsore de puarte dai Cjavai, ognidun denant di cjase sô. 29Daûr di lôr Zadok, fi di Imer, al lavorave denant di cjase sô. Daûr di lui al lavorave Semaie, fi di Secanie, vuardean de puarte a jevade. 30Daûr di lui Ananie, fi di Selemie, e Canum, sest fi di Zalaf, a restaurarin un altri toc di muris. Daûr di lôr Mesulam, fi di Berechie, al lavorave denant de sô cjamare. 31Daûr di lui Malchie, un dai oresins, al lavorave fint a la cjase dai oblâts e dai marcjadants, in face de puarte de Rassegne e fint al plan adalt dal cjanton. 32I oresins e i marcjadants a comedarin fra il plan adalt dal cjanton e la puarte des Pioris.

Gnûfs contrascj e menacis

33A pene che Sanbalat al vignì a savê che nô o fasevin sù lis muris, si disdegnà, si inrabià, al sbeleà i gjudeus 34e al disè presince dai siei fradis e dai soldâts di Samarie: “Ce vuelino fâ mo chescj disgraciâts di gjudeus? Tornâ a fâ sù lis muris e tornâ a tacâ daurman cui sacrificis? Vuelino distrigâle tune zornade? Vuelino fâ torna a vivi pieris sepulidis sot di grums di pulvin e arsinidis dal fûc?”. 35Tubie l’amonit, ch’al jere li in bande, i disè: “Ch’a fasin sù tant ch’a vuelin! Se ur salte sù une bolp, ur fasarà sdrumâ il lôr mûr di clap!”.

36Sint, Diu nestri, cemût che nus spresein! Fâs plombâ parsore di lôr dut il lôr sghignî e moliju tes sgrifis dal nemì tune tiere di sclavitût! 37No sta taponâ la lôr tristerie e il lôr pecjât che nol sparissi mai dai tiei vôi, parcè che a àn cjolt vie chei ch’a fasevin sù.

38E intant nô o tornavin a fâ sù lis muris, ch’a forin puartadis pardut a miege altece; il popul al veve cjapade a pet la vore.