2 CRONACHIS (4;5)

Letôr: Marzio Serena

I furniments sacrâi

41Salomon al fasè l’altâr di bronç lunc vincjecinc comedons, larc vincjecinc e alt dîs. 2Al fasè il mâr di metal fondût larc dîs comedons, taront, alt cinc comedons; par peâlu torator e coventave une cuarde di trente comedons. 3Sot dal ôr, dilunc vie, al veve nemâi ch’a semeavin bûs, dîs par ogni comedon, disponûts sun dôs riis e fondûts insieme cul mâr. 4Chel al jere poiât sun dodis bûs: trê a cjalavin de bande di miegegnot, trê de bande di soreli a mont, trê de bande di misdì e trê de bande di soreli jevât. Il mâr al jere poiât parsore e i nemâi a jerin cul daûr voltât par dentri. 5Al jere penç une cuarte; l’ôr al jere tant che l’ôr di un cjaliç a forme di gi. Al tignive trê mil bat.

6Al fasè ancje dîs concjis pe purificazion e ant metè cinc a drete e cinc a çampe; li dentri a lavavin ce che si doprave pal olocaust. Il mâr al jere par che si lavassin i predis.

7Al fasè ancje dîs cjandelîrs d’aur, seont lis regulis in merit, e ju sistemà tal templi: cinc a drete e cinc a çampe.

8Al fasè dîs taulis e lis sistemà tal templi, cinc a drete e cinc a çampe.

9Al fasè il curtîl dai predis, il grant curtîl e lis puartis dal curtîl, che lis riviestì di bronç. 10Al sistemà il mâr a man drete, di soreli jevât a misdì.

11Curam al fasè lis cjalderiis, lis paletis e i sborfadôrs. Al finì la vore ch’al veve di fâ tal templi di Diu pal re Salomon: 12lis dôs colonis, i doi globos dai cjapitei parsore des colonis, i doi reticolâts par cuviergi i globos dai cjapitei parsore des colonis, 13i cuatricent miluçs ingranâts pai doi reticolâts, dôs riis di miluçs ingranâts par ogni reticolât par cuviergi i doi globos dai cjapitei parsore des colonis, 14i dîs çocui e lis dîs concjis parsore dai çocui, 15il mâr e i dodis bûs sot vie, 16lis cjalderiis, lis paletis, i pirons e ducj i imprescj che Curam-Abi al fasè cul bronç plui fin pal re Salomon pal templi. 17Il re ju fasè fondi te valade dal Gjordan, te fondarie, jenfri Sucot e Serede. 18Salomon al fasè ducj chescj imprescj in grande bondance, che no si rivave nancje a stimâ il pês dal bronç.

19Salomon al fasè ducj i imprescj distinâts al templi: l’altâr d’aur e lis taulis che si meteve parsore i pans de ufierte, 20i cjandelîrs e lis lampadis d’aur di impiâlis, come ch’al jere ordenât, in face dal Sant dai Sants, 21i flôrs, lis lampadis, i smocjadôrs d’aur, dal plui fin, 22i curtìs, i sborfadôrs, lis copis e lis fugheris d’aur rût. Par chel ch’al rivuarde lis puartis dal templi, tant lis puartis di dentri, che si jentrave tal Sant dai Sants, che lis puartis dal templi, che si jentrave tal salon, a jerin d’aur.

Traspuart da larcje

51Cussì al fo finît dut ce che Salomon al veve ordenât pal templi. Alore Salomon al fasè puartâ i imprescj sacrâi di David so pari e al sistemà l’arint, l’aur e dut il furniment tal tesaur dal templi.

2Alore Salomon al clamà a semblee in Gjerusalem ducj i anzians di Israel e ducj i sorestants des tribûs, i prins des fameis di Israel, par traspuartâ l’arcje dal pat dal Signôr de citât di David, ven a stâi di Sion. 3Si derin dongje ator dal re ducj i fîs di Israel pe sagre ch’e scjadeve tal setim mês. 4Cuant che a forin rivâts ducj i anzians di Israel, i levits a alçarin sù l’arcje. 5A traspuartarin l’arcje e la tende de cunvigne e ducj i imprescj consacrâts ch’a jerin te tende; ju traspuartarin i predis e i levits. 6Il re Salomon e dute la comunitât di Israel, dade dongje ator di lui, a sacrificavin denant de arcje pioris e bûs, tancj di no rivâ nancje a contâju parcè che and jere masse. 7I predis a puartarin dentri l’arcje dal pat dal Signôr tal so puest, te cele dal templi, tal Sant dai Sants, sot des alis dai cherubins. 8Di fat i cherubins a slargjavin lis alis parsore de arcje; a cuviergevin di adalt l’arcje e lis sôs stangjis. 9Lis stangjis a jerin plui lungjis, par chel lis pontis si viodevilis stant tal Sant, in face de cele, ma però no stant di fûr; cussì fint in dì di vuê. 10Te arcje nol jere nuie, dome lis dôs pieris che Mosè al veve dât sul Oreb, lis pieris dal pat che il Signôr al veve fat cui fîs di Israel cuant che a jerin saltâts fûr dal Egjit.

11Al sucedè che, jessûts i predis dal Sant – di fat ducj i predis ch’a jerin li si jerin smondeâts cence lâ daûr des classis –,12intant che ducj i levits cantôrs, vadì Asaf, Eman, Idutun e i lôr fîs e fradis, vistûts di fîl, cun covertoriis, cun arpis e cun citaris a stavin in pîts a soreli jevât dal altâr e intant che dongje di lôr cent e vincj predis a sunavin lis trombis, 13al sucedè che, cuant che i sunadôrs e i cantôrs a faserin sintî ducj insieme la lôr vôs par laudâ e par dâi glorie al Signôr e si sintì il sunôr des trombis, des covertoriis e di chei altris imprescj par laudâ il Signôr parcè che al è bon, parcè che il so boncûr al è par simpri, alore il templi si jemplà di un nûl, ven a stâi de glorie dal Signôr. 14I predis no poderin plui restâ pes lôr funzions par vie dal nûl, parcè che la glorie dal Signôr e veve jemplât il templi di Diu.