1 CRONACHIS (23)

Letôr: Emanuela Rossi

Organizazion dai levits

231David, aromai vieli e passût di zornadis, al nomenà so fi Salomon re parsore di Israel. 2Al clamà dongje ducj i sorestants di Israel, i predis e i levits. 3Si contarin i levits, dai trent’agns in sù; segnâts, un par un, and jere trentevotmil. 4“Di chescj, vincjecuatrimil ch’a diregin il lavôr dal templi dal Signôr, sismil ch’a sedin scrituriscj e judiçs, 5cuatrimil puartonîrs e cuatrimil ch’a laudin il Signôr cun ducj i struments che jo o ài inventât par laudâlu”. 6David al dividè i fîs di Levi par classis: Gherson, Keat e Merari.

7Dai ghersonits: Laadan e Simei. 8Fîs di Laadan: Jechiel, il prin, Zetan e Gjoel: in trê. 9Fîs di Simei: Selomit, Caziel, Aran: in trê. Chescj a son i sorestants des fameis di Laadan. 10Fîs di Simei: Jacat, Zize, Jeus, Berie; chescj a son i cuatri fîs di Simei. 11Jacat al jere il prin e Zize il secont. Jeus e Berie no àn vût tancj fîs; par chel ch’al rivuardave il cens, ju considerarin tant che une famee sole.

12Fîs di Keat: Amram, Isear, Ebron e Uziel: in cuatri. 13Fîs di Amram: Aron e Mosè. Aron al fo sielzût par consacrâ lis robis santis, lui e i siei fîs, par simpri, cun chê di ufrî incens denant dal Signôr, di servîlu e di benedî in so non par simpri. 14Par chel ch’al rivuarde Mosè, famei di Diu, i siei fîs a forin contâts te tribù di Levi. 15Fîs di Mosè: Gherson e Eliezer. 16Fîs di Gherson: Sebuel, il prin. 17I fîs di Eliezer a jerin Recabie, il prin. Eliezer nol veve altris fîs, cu la cuâl che i fîs di Recabie a jerin une sdrume. 18Fîs di Isear: Selomit, il prin. 19Fîs di Ebron: Jerie il prin, Amarie il secont, Jacaziel il tierç, Jekameam il cuart. 20Fîs di Uziel: Miche il prin e Icasie il secont.

21Fîs di Merari: Macli e Musi. Fîs di Macli: Eleazar e Kis. 22Eleazar al murì cence fîs, ch’al veve dome fiis; lis cjolerin i fîs di Kis, lôr fradis. 23Fîs di Musi: Macli, Eder e Jeremot; in trê.

24Chescj a son i fîs di Levi seont lis lôr fameis, i caposfamee daûr dal cens, contâts un par un, ch’a vevin l’incariche des voris pal servizi dal templi, dai vincj agns in sù. 25Parcè che David al veve dit: “Il Signôr, Diu di Israel i à dade pâs al so popul; lui si è sistemât in Gjerusalem par simpri 26e ancje i levits no varan plui di puartâ ator il santuari e dute la robe ch’e covente pal so servizi”. 27Seont lis ultimis disposizions di David, il cens dai fîs di Levi lu faserin dai vincj agns in sù. 28Par chel ch’al rivuardave il servizi tal templi, a vevin di stâ sot dai fîs di Aron; a vevin l’incariche dai curtîi, des cjamaris, de purificazion di ogni robe sante e di dut ce che si faseve tal templi, 29dal pan de ufierte, de farine, de ufierte, des fuiacis cence levan, des robis di cueilis su la gridele e di fridilis e di dutis lis misuris di pês e di lungjece. 30A vevin di presentâsi ogni dì a buinore par laudâ e dâi glorie al Signôr e compagn sore sere. 31A vevin l’incariche di ducj i olocauscj di ufrîi al Signôr tes sabidis, tes lunis gnovis, tes fiestis distinadis, seont un numar precîs e seont lis lôr regulis, simpri presince dal Signôr. 32A proviodevin ancje al servizi de tende de cunvigne e al servizi dal santuari e a stavin a ce che ur ordenavin i fîs di Aron, lôr fradis, in merit al servizi dal templi.