1 CRONACHIS (16)

Letôr: Valter Pitton

161Cussì a menarin dentri e a sistemarin l’arcje di Diu tal mieç de tende tirade sù di David par chel cont; po a ufririn olocauscj e sacrificis di comunion denant di Diu. 2Finîts i olocauscj e i sacrificis di comunion, David al benedì il popul tal non dal Signôr. 3Al dè fûr a ducj i fîs di Israel, oms e feminis, une pagnoche e une purizion di cjar e une pete di uve.

Inaugurazion dal servizi levitic

4Al distinà che un pôcs di levits a stessin in servizi denant da l’arcje dal Signôr par ringraciâ, puartâ e dâi glorie al Signôr, Diu di Israel. 5A jerin Asaf, il sorestant, Zacarie, il so secont, Uziel, Semiramot, Jechiel, Matatie, Eliab, Benaià, Obed-Edom e Jeiel, ch’a sunavin struments di musiche, arpis e citaris; Asaf al sunave lis covertoriis. 6I predis Benaià e Jacaziel cu lis trombis a jerin simpri denant da l’arcje dal pat di Diu. 7Propit in chê dì David, pal prin viaç, ur consegnà a Asaf e ai siei fradis cheste laut al Signôr:

8Laudait il Signôr, clamait il so non;

contait framieç dai popui lis sôs maraveis.

9Cjantait in so onôr, dait sù par lui un salm,

contait a ducj i siei spiei.

10Vantaitsi tal so non sant,

che s’indalegri il cûr di chei ch’a cirin il Signôr.

11Cirît il Signôr e la sô fuarce,

cirît la sô muse di un continui.

12Visaitsi des robonis ch’al à fatis,

dai siei spiei e dai judizis de sô bocje.

13Gjernazie di Israel, so famei,

fîs di Jacop, che lui al à sielzût.

14Lui al è il Signôr, il nestri Diu,

par dut il mont a son i siei judizis.

15Visaitsi simpri dal so pat,

de peraule dade par mil etis,

16dal pat concludût cun Abram,

dal zurament che i à fat a Isac,

17confermât a Jacop tant che une leç,

a Israel tant che un pat par simpri:

18“Ti darai a ti la tiere di Canaan

come part de vuestre ereditât”.

19Seben ch’a jerin un troput,

pôcs e ancjemò forescj inte tiere.

20A passarin di un popul a di chel altri,

di un ream a di un altri popul.

21Lui nol lassà che nissun no ju tibiàs;

par colpe lôr al cjastià i rês:

22“No stait a tocjâ i miei consacrâts,

no stait a fâur dal mâl ai miei profetis”.

23Cjantait al Signôr, int di dute la tiere;

contait di dì in dì la sô salvece.

24Berlait framieç dai popui la sô glorie

framieç di ducj i popui i siei spiei.

25Parcè che il Signôr al è grant e al merte propit laudât,

lui ch’al è trement sore di ducj i dius.

26I dius dai popui no son nuie di nuie;

il Signôr invezit al à fat il cîl.

27Sflandôr e maiestât a stan denant di lui;

potence e gjonde tal so santuari.

28Dait al Signôr, fameis dai popui,

dait al Signôr glorie e onôr.

29Dait al Signôr la glorie dal so non;

puartait ufiertis e vignît denant di lui.

Adorait il Signôr tai furniments sacrâi!

30Trimait denant di lui, int di dute la tiere;

lui al ponte il mont par no ch’al clopi.

31Che s’indalegrin i cîi e ch’e gjoldi la tiere;

ch’a disin fra i popui: “Il Signôr al regne!”.

32Ch’al sbalci il mâr cun dut ce che lu jemple,

ch’e salti la campagne cun dut ce ch’e à intorsi.

33Ch’a scriulin di gjonde i arbui dal bosc

presince dal Signôr ch’al ven

par judicâ il mont.

34Laudait il Signôr, parcè che al è bon,

parcè che il so boncûr al è par simpri.

35Disêt: “Salvinus, Diu de nestre salvece;

tirinus dongje e sfrancjinus dai popui

par ch’o podìn onorâ il to non sant,

e tignîsi in bon de tô laude.

36Benedet seial il Signôr, Diu di Israel,

di une eternitât a chê altre”.

E dut il popul al disè: “Amen” e al laudà il Signôr.

37Podopo David al lassà Asaf e i siei fradis denant da l’arcje dal pat dal Signôr par ch’a funzionassin denant da l’arcje seont lis regulis des funzions di ogni dì; 38al lassà Obed-Edom fi di Idutun, e Cosà, insieme cun sessantevot fradis come puartonîrs. 39Al predi Zadok insieme cui siei fradis predis i consegnà il servizi dal santuari dal Signôr ch’al jere sul çuc di Gabaon, 40par che i ufrissin olocauscj al Signôr sul altâr dai olocauscj, cence mai sostâ, a buinore e sore sere, seont ce ch’al è scrit te leç che il Signôr i veve ordenât a Israel. 41Cun lôr a jerin Eman, Idutun e ducj chei altris sielzûts e incaricâts par non di laudâ il Signôr, parcè che il so boncûr al è par simpri. 42A vevin daûrsi trombis e covertoriis par sunâ e altris struments pal cjant a Diu. I fîs di Idutun a vevin l’incariche de puarte. 43A la fin dut il popul al tornà cjase sô e David si voltà par benedî la sô cjase.