1 CRONACHIS (10)

Letôr: Ennio Zampa

IL REAM DI DAVID

Disfate e muart di Saul

101I filisteus a tacarin Israel; i fîs di Israel a scjamparin denant dai filisteus e a colarin, colpîts a muart, su la mont di Gjelboe. 2I filisteus, corint daûrji a Saul e ai siei fîs, a coparin Gjonate, Abinadab e Malchisue, fîs di Saul. 3Il pês de batae al plombà dut sun Saul; i arcîrs lu lumarin e al restà ferît di un di lôr. 4Alore Saul i disè al so scudîr: “Tire fûr la spade e passimi fûr par fûr, par no che cheste int cence circuncision e vegni e mi ridi daûr”. Ma il scudîr, plen di pôre, nol volè savênt. Alore Saul al cjolè la spade e si butà parsore di jê. 5Ancje il scudîr, viodût che Saul al jere muart, si butà parsore de spade e al murì. 6Cussì al finì Saul insieme cui trê fîs; dute la sô famee e finì insieme. 7Cuant che i israelits de valade a vioderin che i lôr le vevin tovade e che Saul e i siei fîs a jerin muarts, a bandonarin lis lôr citâts e a scjamparin. A rivarin i filisteus e si sistemarin li.

8Tal indoman i filisteus a lerin a dispueâ i muarts e a cjatarin Saul e i siei fîs distirâts su la mont di Gjelboe. 9Lu dispuearin, i cjonçarin il cjâf e i puartarin vie lis armis; podopo a mandarin par dute la tiere dai filisteus a contâur la vitorie ai lôr dius e a la lôr int. 10A meterin lis sôs armis tal templi dal lôr diu; la crepe le inclaudarin tal templi di Dagon.

11Cuant che la int di Jabes di Galaad a vignirin a savê ce che i filisteus i vevin fat a Saul, 12ducj i lôr vuerîrs a lerin a puartâ vie il cuarp di Saul e i cuarps dai siei fîs e ju puartarin a Jabes; a soterarin i lôr vues sot dal terebint di Jabes e a zunarin par siet dîs.

13Cussì Saul al murì par colpe de sô infedeltât al Signôr, parcè che nol veve volût scoltâ la sô peraule e parcè che al veve clamât di ca un spirt par interpelâlu. 14Nol veve interpelât il Signôr; par chel il Signôr lu fasè murî e i passà il ream a David, fi di Jesse.