1 RÊS (6)

Letôr: Federica Angeli

Costruzion dal templi

61Cuatricent e otante agns dopo che i israelits a jerin saltâts fûr de tiere dal Egjit, tal cuart an che Salomon al regnave su Israel, tal mês di Ziv, ven a stâi tal secont mês, al tacà a fâ sù il templi dal Signôr. 2Il templi che il re Salomon i fasè sù al Signôr al jere lunc sessante comedons, larc vincj e alt vincjecinc: 3la jentrade denant dal salon dal templi e veve vincj comedons di lungjece tal sens de largjece dal templi e dîs comedons di largjece tal sens de lungjece dal templi.

4Al fasè tal templi barcons a cuadri cui gàtars. 5Al fasè sù, atac dal mûr dal templi, une ale torator dal salon e dal Sant dai Sants e al fasè plans dilunc fûr. 6Il plan disot al jere larc cinc comedons, il mezan sîs comedons e il tierç siet comedons, parcè che, tal fâ l’ale torator dal templi, al veve calât par ordin, par no ch’e tocjàs i mûrs dal templi. 7Il templi lu faserin sù in claps di gjave; no si sintì ni martiei ni picons ni nissun altri imprest di fier tal templi biel che lu fasevin sù. 8La jentrade pal plan di sot e jere sul cjanton a drete dal templi e cuntune scjale a cai si leve tal plan mezan e dal mezan tal tierç. 9Al fasè sù il templi e lu finì e al cuviergè il templi cuntun sufit a casson, di cedri. 10Al fasè sù ancje l’ale torator dal templi; e jere alte cinc comedons e e jere peade tor dal templi midiant di trâfs di cedri. 11La peraule dal Signôr si fasè sintî di Salomon: 12“Rivuart a cheste cjase che tu stâs fasint sù, se tu cjaminis daûr des mês leçs, se tu fasis ce che ti ordeni e se tu vâs daûr tai miei comants cun fedeltât, alore jo o mantignarai la mê peraule sun te, chê che je ài dite a to pari David; 13o starai framieç dai israelits e no bandonarai par mai il gno popul Israel”.

14Salomon al fasè sù il templi e lu finì. 15Al riviestì di breons di cedri la façade interne dai mûrs dal templi, dal paviment infinamai ai trâfs dal sufit al metè un riviestiment di len par dentri, e al riviestì il paviment dal templi di breis di ciprès. 16Al riviestì ancje cui breons di cedri i vincj comedons dafont dal templi, dal paviment fint ai trâfs e a forin metûts di bande pal Sant dai Sants. 17Il templi al veve corante comedons, ven a stâi il salon denant dal Sant dai Sants. 18Ancje dentri, tal templi, and jere cedri sculpît cun disens di cocis e di bocui di garofui; dut in cedri, che no si viodeve un clap. 19Pa l’arcje dal pat dal Signôr al prontà une cele te part plui segrete dal templi. 20La cele interne e jere lungje vincj comedons, largje vincj comedons e alte vincj comedons. Le riviestì di aur rût e al fasè un altâr di cedri. 21Salomon al riviestì par dentri dut il templi di aur rût e al fasè passâ, denant de cele, un vêl ch’al scoreve midiant di cjadenutis d’aur e lu cuviergè di aur. 22E dut il templi al fo riviestût, par dentri, di aur, e al riviestì di aur ancje dut l’altâr ch’al jere inte cele.

23Tal Sant dai Sants al fasè doi cherubins di len di ulivâr salvadi, alts dîs comedons. 24Une ale dal cherubin e veve cinc comedons e chê altre ale dal cherubin e veve cinc comedons; dîs comedons di une estremitât a chê altre des alis. 25Il secont cherubin al veve ancje chel dîs comedons: stesse grandece e stesse lavorazion pai doi cherubins. 26Un cherubin al jere alt dîs comedons e compagn chel altri. 27Al sistemà i cherubins te part plui segrete dal templi, tal santuari. I cherubins a vevin lis alis spalancadis, di mût che l’ale di un e tocjave il mûr e l’ale di chel altri e tocjave chel altri mûr e lis lôr alis si tocjavin tal mieç dal templi, ale cuintri ale. 28Ancje lôr a jerin riviestûts di aur.

29Sun ducj i mûrs dal templi, torator, al sculpì cherubins, palmârs e bocui di garofui, tant par dentri che par difûr. 30Al riviestì di aur il paviment dal templi, tant dentri che fûr.

31Al fasè la puarte dal Sant dai Sants cui antîi in len di ulivâr salvadi e l’ante a cinc taps, 32dôs voladis in len di ulivâr salvadi. Al sculpì cherubins, palmârs e bocui di garofui, che ju riviestì di aur; al slargjà l’aur a sfueuts parsore dai cherubins e dai palmârs. 33Al fasè ancje te puarte dal salon i antîi in len di ulivâr salvadi e l’ante a cuatri taps, 34cun dôs voladis di len di ciprès: une volade e jere dople e e girave e ancje chê altre e jere in doi tocs ch’a giravin. 35Al sculpì cherubins, palmârs e bocui di garofui e ju riviestì di aur slargjât parsore de sculture. 36Al fasè sù il mûr dal curtîl di dentri cun trê cors di pieris scuadradis e un cors di breons di cedri.

37Tal cuart an, tal mês di Ziv, a forin butadis lis fondis dal templi; 38Tal undicesim an, tal mês di Bul, ch’al sarès l’otâf mês, il templi al fo finît seont ducj i progjets e ducj i furniments. Salomon lu fasè sù in siet agns.