GJOSUÈ (19;20)

Letôr: Elga Mauro Bazzichetto

Teritori di Simeon

191Il secont lot i tocjà a Simeon, a la tribù dai fîs di Simeon, daûr des lôr fameis: la lôr legjitime e capità framieç de legjitime dai fîs di Gjude. 2Ur tocjà in ereditât Bersabee, Sebe, Molade, 3Cazar-Suse, Bale, Asem, 4Eltolad, Betul, Corme, 5Siklag, Bet-Marcabot, Cazar-Suse, 6Bet-Lebaot e Saruchen: tredis citâts cui lôr borcs; 7En, Rimon, Eter, Asan: cuatri citâts cui lôr borcs, 8cun dutis lis borgadis che a jerin dulitor di chestis citâts finamai a Baalat-Beer e Rame dal Negheb.

Cheste e fo la legjitime de tribù dai fîs di Simeon, daûr des lôr fameis. 9La legjitime dai fîs di Simeon le gjavarin dal toc dai fîs di Gjude, parcè che la part dai fîs di Gjude e jere masse grande par lôr; par chel ai fîs di Simeon ur tocjà la part framieç de legjitime dai fîs di Gjude.

Teritori di Zabulon

10Il tierç lot ur tocjà ai fîs di Zabulon, daûr des lôr fameis. Il toc de lôr legjitime al leve fint a Sarid.

11Il lôr confin al leve sù a mont viers Mareale, al rivave fint a Dabeset e al riul che al è in face di Jokneam. 12Di Sarid il confin al voltave de bande che al jeve il soreli, fint a Chislot-Tabor; al saltave fûr de bande di Daberat e al leve sù a Jafie. 13Di li al voltave a soreli jevât des bandis di Gat-Efer e Et-Kasin, al saltave fûr a Rimon e al pleave de bande di Nee. 14Il confin adalt al leve viers Anaton e al leve a finîle ta valade di Iftac-El. 15Al cjapave dentri ancje Katal, Naalal, Simron, Ideale e Betlem: dodis citâts cui lôr borcs. 16Cheste e fo la legjitime dai fîs di Zabulon, daûr des lôr fameis: chestis citâts e chescj paîs.

Teritori di Issacar

17Il cuart lot i tocjà a Issacar, daûr des lôr fameis. 18La lôr part si slargiave viers Izreel e e cjapave dentri Chesulot, Sunem, 19Afaraim, Sion, Anacarat, 20Rabit, Kision, Abes, 21Remet, En-Ganim, En-Cade e Bet-Pases. 22Il confin al rivave fint a Tabor, Sacasim e Bet-Semes, e al leve a finîle tal Gjordan: sedis citâts cui lôr borcs. 23Cheste e fo la legjitime de tribù dai fîs di Issacar daûr des lôr fameis: chestis citâts e chescj paîs.

Teritori di Aser

24Il cuint toc i tocjà a la tribù di Aser, daûr des lôr fameis. 25Il toc al cjapave dentri: Elkat, Ali, Beten, Acsaf, 26Alamelek, Amead e Miseal; al rivave fint al Carmel a mont e a Sicor-Libnat. 27De bande che al jeve il soreli, il toc al leve finamai a Bet-Dagon, al confinave cun Zabulon, cu la valade di Iftac-El adalt, Bet-Emek e Nejel, al saltave fûr des bandis di Cabul a çampe, 28cun Ebron, Recob, Amon e Kane fint a Sidon la Grande. 29Po il confin al voltave de bande di Rame e finamai al fuart de citât di Tîr. Daspò al leve a Ose e al finive, sul mâr, a Macleb e Aczib, 30cun Aco, Afek e Recob: vincjedôs citâts cui lôr borcs. 31Cheste e fo la legjitime de tribù dai fîs di Aser, daûr des lôr fameis: chestis citâts cun chescj paîs.

Teritori di Neftali

32Ai fîs di Neftali ur tocjà il sest toc, daûr des lôr fameis. 33Il lôr confin al leve di Efel e dal rôl di Beniamin, cun Adam-Nekeb e Jabneel fint a Lakum e al finive tal Gjordan. 34A mont il confin al voltave par Aznot-Tabor, di li al saltave fûr a Ukok e al tocjave Zabulon par disot, Aser, a mont e il Gjordan a jevade. 35Lis citâts plui fuartis a jerin: Sidim, Ser, Amat, Rakat, Gjenezaret, 36Adame, Rame, Cazor, 37Kedes, Edrei, En-Cazor, 38Ireon, Migdal-El, Orem, Bet-Anat e Bet-Semes: disenûf citâts cui lôr borcs. 39Cheste e fo la legjitime dai fîs di Neftali daûr des lôr fameis: chestis citâts cun chescj paîs.

Teritori di Dan

40A la tribù dai fîs di Dan, daûr des lôr fameis, ur tocjà il setim lot. 41Il lot de lôr legjitime al cjapave dentri: Soree, Estaol, Ir-Semes, 42Saalabin, Aialon, Itle, 43Elon, Timne, Ekron, 44Elteke, Ghibeton, Baalat, 45Jeud, Bene-Berak e Gat-Rimon; 46e de bande dal mâr Jerakon cun dute la regjon ch’e je in face di Jope. 47Ma il toc dai fîs di Dan si slargjà plui in là, parcè che i fîs di Dan a lerin a combati cuintri di Lesem, che le cjaparin e ju passarin ducj a fîl di spade. Vint cjapade la paronance, si stabilirin li e a Lesen i meterin non Dan; che Dan al sarès il non dal lôr von. 48Cheste e fo la legjitime de tribù dai fîs di Dan daûr des lôr fameis: chestis citâts e chescj paîs.

La part di Gjosuè

49Finide la division de tiere, confins e dut, i israelits i derin a Gjosuè, fi di Nun, une part framieç di lôr. 50Daûr ordin dal Signôr, i derin la citât che le veve domandade, Timnat-Serac, su la mont di Efraim; al tornà a fâ sù la citât e si stabilì li. 51A son chestis lis parts de division che il predi Eleazar, Gjosuè, fi di Nun, e i sorestants des fameis a faserin tirant a bruscjete fra lis tribûs di Israel a Silo, presince dal Signôr, su la puarte de tende. Cussì e rivà in puart la division de tiere.

Lis citâts di lâ a parâsi

201Il Signôr i disè a Gjosuè: 2“Feveliur ai israelits cussì: Cjataitsi fûr lis citâts cun dirit di pupîl che us ài fevelât a mieç di Mosè, 3là che al podarà lâ a parâsi chel che al à maçât un altri par sbalgjo e cence volêlu e che al varà dibisugne di cjatâsi un sotet cuintri di chel che al vûl svindicâsi dal sanc. 4Chel che al à maçât al varà di lâ a parâsi intune di chestis citâts. Si fermarà su la jentrade de citât e al contarà il so câs ai anzians de citât. Lôr lu lassaran jentrâ te lôr citât e i meteran a disposizion un lûc là che al puedi vivi framieç di lôr. 5Se chel che al cîr di svindicâsi dal sanc i cor daûr, lôr no i consegnaran tes sôs mans chel che al à copât, parcè che i à petât al so prossim cence volêlu, cence vê vût cuintri di lui nissun rusin vieri. 6Chel che al à maçât al resterà in chê citât fintremai che, vignût a murî il prin predi che al sarà in carighe in chei dîs, al varà di presentâsi a rispuindi denant de semblee. Dome in chê volte chel che al à copât al podarà tornâ te sô citât, a cjase sô, te citât che al veve scugnût fuî”.

7A sielgerin alore Kades in Galilee, su la mont di Neftali, Sichem su la mont di Efraim, e Kiriat-Arbe, vadì Ebron, su la mont di Gjude. 8Di chê altre bande dal Gjordan a jevade di Gjeric, a sielgerin tal desert, sul plan, Bezer de tribù di Ruben, Ramot in Galaad, de tribù di Gad, e Golan in Basan, de tribù di Manasse. 9Chestis a forin lis citâts sielzudis par ducj i israelits e pai forescj sistemâts framieç di lôr, par che al podès lâ a parâsi ognidun che al veve par disgracie copât un altri e che al scjampave des mans di chel che al voleve gjavâsi il svindic dal sanc fin cuant che no si presentave a rispuindi denant di ducj.